Read Hatam YEREMIA 4 Bible Online

YEREMIA 4 - Hatam bible

YEREMIA 4

¹TUHAN pai “Ditde mben Israel jen, gino jijoi sut jingkwei hanyen lene ma jingkwei hanyen ndam Da. Ma jicom kwar di dingon mpo tut nya nipou ug e. Leu api jiba jingon gom bibit Da.

²Gino jeheng bitug hon dinyeng ba, jiba ningon srenti kin ningon gomti kin niyaijo igbitti biyai niyai munti lene ngkiai nya yahagom miyahara Da leu binhyepo dinjei mun di kei bak yoni drek dip leu api ibikon dinyenga.”

³ TUHAN pai bak timiei minu Yehuda kin minu ndig Yerusalem “Ma jiyai miai ei dihyei jide di jiyai miai eisi bigyo nya bijindim ningan ei mpia di ndia nggig-nggwen hei eisi au.

⁴Je di timiei minu Yehuda kin minu ndig Yerusalem e, ma jikrau kep jide mun di jipreu ei mem jide TUHAN di Dani ba, jidimig jenti pijum ei mem Da. Gi bi ne Ditde nigga biborti micig-cai nok hum di bit bon tungwa hi mu kep kan bi. Gima yok hagom micut igkep jenti njem drek dip jide nibon munti di kinei bibor.”

⁵Ma jimiep pun mbrei bidem minu dini! Ma jiba nihyet di tibim kin nihyet di nindig bijem ug! Ma jicuk timiei minu Yehuda kin minu ndig Yerusalem inang bicoi ug ei minu ndig di bon tentara nibousi di igya coi nya.

⁶Ma jindo hangi puig di ug ndam TUHAN de Nungug Sion! Ma jipri haninyai ba, jibinyen au. TUHAN tin ei mem mikes mun di buhun kin mun dibindei sar di nindig bibor kwei leu nite bei mpia nijjai.

⁷Nihwen kep mben cig gom sindi mbut kwei mem gima bindei sar timiei Yehuda nya dem kep nok singa di hei leu niku no eisi. Noni minggek minu ndig ngot di jo ei minu Yehuda binggek sinsiou apino hagom midem kep nok ha ngunti ri.

⁸Gima rino ma jipim bijiba nicot pai cem. Jijuk sinsun kron di bindo tut ningon nggukti cem lewo TUHAN De nigga biborti di cig-cai cut leu minu Yehuda bigyo.

⁹TUHAN pai “Ei njap dima lene nibou ndig nya kin nibou di igya kui yok nya ingon dahat ba, imam nya cem ingon digit lene nabi nya cem idigit tut.”

¹⁰Leu api dipai “Na di TUHAN Di Anyeng Jei e, aris bak timiei Yehuda nya kin timiei minu ndig Yerusalem nya tu! Apai bipia minibong kei-minigwam kei. Noro bi. Lewo nogindini siceu mikrau singau simeda tut nye binimai ri.”

¹¹Nituti dem leu api hi mipai bak timiei Yehuda nya kin timiei minu ndig Yerusalem bipia hou umbrek di dut micut kwei leu iggum ndigsi ba, sindi kui ndam yok. Hou dima ne hou nitu he di miep pas ntam di bit nimig rin bi.

¹²Noro hou di nimig ten di cut kwei bit leu TUHAN Nonti nicukti dima mibindei cut hukum ei Nide limwa nya dip ri.

¹³Jingat i, siceu itau kwei ba, idem kep bumbuhui di tap a. Kroba pran di ide nya dem kep hou sigau di cut a. Kuda di ide nya idor sindem dor njiriek ha krubri cem. Ayo! Buhun bibor mem nyeni o! Nyeni yahagom isar ug rin o!

¹⁴Je di timiei minu ndig Yerusalem e, ma jicom jide mun di kinei bibor leu jingonti leu binhyepo jingwes ngun. Jiku jide nikan-kan nyenti di kinei bibor dima ei jingonti ug bipek apig bu i?

¹⁵Hi sok nihyet ei yo di ikwei leu minu ndig Dan kin nungug him ei Efraim dip binye ba, itri tut nihyet di kinei bibor.

¹⁶Yo dima isok kep ngkiai nya kak puig sinon bipai bak timiei minu ndig Yerusalem nya cem bipia siceu injei leu minu ting bibor kwei tu. Yoni mikon ighyet tut pran kep timiei Yehuda nya ide minu ndig nya.

¹⁷Siceu dima migyon ttai minu ndig Yerusalem noyam kin yo di igya ser ide dihyei hanjop nsi nya. Mun dima yok hagom cut igkep timiei Yehuda nya lewo yaham imbuk kep TUHAN tu. TUHAN simbot dat tu.

¹⁸Je di timiei Yehuda e, jenti rino jibindei di mun di buhun dima cut igkep je ug a. Jide niyaijoti di kinei kin jide nibon munti di kinei rino bindei di ninghuisi wei dima biam jingonti a.

¹⁹Dingon buhun bibor! Dingon ngkiem tut niwei bu bi! Dem mem gima doom kep danti bidigwam nyahan bi! Dingon pri ndei dingget ninsi. Lewo dimiap pun mbrei nugwei bong ba, siceu nya ighyet sra tut pran tu.

²⁰Mun di buhun cut igkep nye bijo-jo yam dip lene bindei sar minu dini hagom. Siceu nya inggek ditde prak meng kros hak lene irik minghas nya hagom birik-ta.

²¹Suar dingat nikon pran bit yamti di kinei-kinau bou diyai him ug bipek apig bu i? Dimiap pun mbrei di nibimbi bindei di ditingou nam ug bipek apig bu i?

²²TUHAN pai “Ditde limwa nya ingon mbum bibor ba, igikan igbit tut Da bi. Idem kep munggwom di ingon huk niti tut mun nyeng hi haninyai bi. Ingon guhuk niti poi mien cem bi hak ug. Tut mun di kinei ne ibon kep igkei noro itunggwei sut nibon mun di keisi nya.”

²³Diyai bong kep dihyeisi dini bidingat lo, dihyeisi dini ngwak bingak cai. Dikiek da bidiyai bong kep mpia-bbed him bidingat lo, mbenjen! Mun nyeng hi piga mpia bi.

²⁴Diyai bong kep nungug tou kin mbigdip di anai nya bidingat lo, hagom ugwa-kwei nindig bibor.

²⁵Dimian ser lo, tungwatu hi ningat rin bi ba, ha nya cem hagom dimba leu su.

²⁶Dihyei di nnum kei dem kep iggum ndigsi di ngak-cai. Minu ndig nya hagom lus bingwig ba, nindungti he rijo ei a. Lewo TUHAN gga Nide limwa nya bibor. (

²⁷Nipou ne TUHAN pai bipia dihyeisi dini titut yam minok iggum ndigsi noro Noni mibindei sar hagom bingwig hak bi.)

²⁸Dihyeisi dini migwam ningon di nggukti ba, mpia-bbed him dindi-kai. TUHAN mbrap tu ba, luei ningon kanti tut bi. Noni kos tut ei su ba, misujou nimig ceti gom cem bi.

²⁹Nimpung tentara di iba kuda di ibri bikon pran kan kin gi iprindei siceu kan nya ibindei ba, nugwei bong mpiati apino tungwatu nya yahagom inang-nang wai ba, innei sor. Bihi inang ug ei bigbehei lene bihi inang bikui ug ei nungug tig biku yok ei hak mihyeti nya. Minu ndig nya hagom mbum-bra bram yok. Hi di ngkwei bibong ei sirima hanyen bu bi.

³⁰Je di timiei minu ndig Yerusalem e, TUHAN kes je ei su ba, dem mem gima jibon mun nyeng hi bu bi! Nggon rino jijuk sinsun ngwoi bijiba mas kin perak bimau je ba, jiba celak ngwoi bidip jiyai nggrop i? Jimau jenti dima mikui-kausi he. Lewo yo di jiyem njita tut yok ikou sut je ba, ijoi sut gima igyai nimai bije.

³¹Dimiap nahara ninghuisi wei di noyam kin sop di ninghim dut tut munggwom. Minu ndig Yerusalem pim bininnei cun tut noyam kin sop gwam nitta pilei di sindi srek tut nimunggwom gi nimbie him. Noni su ninda nyen-nyen bahara “Buhun bibor mem da o! Siceu mikwei yai nimai bida ug rin o!”