Read Hatam YEREMIA 40 Bible Online

YEREMIA 40 - Hatam bible

YEREMIA 40

¹Nipou ne tentara nya iba lante biteu da bipi bibuwak da kin timiei Yehuda kin minu ndig Yerusalem nya ug ei minu Babel. Noro mpe dino digwam kep dinghuisi ei minu ndig Rama lene TUHAN bindei ba, Nebuzaradan di ya tut nide limwa nya pima pas lante leu dinda leu api diyati kwes hanyen.

²Nibou pran dima hig da ter bipai “Ade TUHAN Allah com nihyet mem gima bindei minu dini bitimek ba,

³mun dima hagom cut igkep yok tu. Lewo mben ade ibon sisar ba, igibit TUHAN nihyet bi.

⁴Nogindini dipas lante di ibiteu anda dini leu lene dibikes na hak. Gino ajoi sut ne abit nye ug ei minu Babel leu api midinyohou nani ei minu dima. Gino ajoi sut bi lene dwai. Minu dini kou nisurti-nipekti jo hak mem na ba, aug ei mpia di tou bit leu angon kanti.”

⁵Nipou tirigi Nebuzaradan mbut bigyo lene pai bida “Gino ajoi sut lene ma angkwei hanyen ndam Gedalya di Ahikam nipmot di Safan nignyon di nibou ndig mem minu Babel ta nok nibou hanjop mem minu ndig ngot di jo ei minu Yehuda hagom. Lene abong bit noni kin limwa di isima bigyo nya. Gi bi ne aug ei mpia di tou bit leu angon kanti.” Pai nok leu api noni kwas njita di mui ngug-ngau hi tut da binjei mun di kei hi bida leu api bikes da biduug.

⁶Duug ngat Gedalya ei Mizpa bidibong bit noni ei limwa di ikes yok di ibong ei minu Yehuda nya ikieti.

⁷ Nibou ndig minu Babel ta Gedalya ba, kui bigwam nok nibou hanjop Yehuda leu api ninyeng tak kep limwa di yuhui mbum bibor nya di ingat rin ei hanjop dima. Nibou tentara Yehuda nya ibou poi di ingwes ngun leu tentara Babel nya inda nsi imiap tut gino Gedalya kui bigwam nok nibou hanjop dima.

⁸Leu api Ismael di Netanya nipmot kin Yohanan di Kareah nipmot kin Seraya di Tanhumet nipmot kin Efai di kwei leu Netofa nimunggwom bat nya kin Yezanya di kwei leu Maakha igya tut ide limwa nya ba, yuug ngat Gedalya ei Mizpa.

⁹Gedalya pai biyok “Ma jittin tut gi jikes jenti ei nibou ndig Babel ninda nsi au. Jibong hak ei ide minu dini ba, jinok awak mem noni hak ug. Dipreu ei mem je bipia mijingwes ngun tug hon dani.

¹⁰Jibong hak ei jitimieisi nya bit leu jingon kanti. Lene ma jipian ba anggur ningat ba, jinju keyam kin biei ngat nya kin mini zaitun ba, jinju keyam. Dibong ei Mizpa ba, diya hacan mem limwa nya mpe di tentara Babel nya ikwei ei minu dini.”

¹¹Lene mben Israel di ingat rin ei minu Moab kin Amon kin Edom kin gi ingat rin ei minu hiter nya yahagom imiap tut bipia nibou ndig minu Babel ta Gedalya tu. Noni kui bigwam nok nibou hanjop ba, ninyeng tak kep limwa nya imang bu bi su.

¹²Gima rino ikiju bikwei leu ingkiaisi di intek gimahap ug eisi nya ba, ingkwei hanyen kwei ei minu Yehuda. Ikwei krau Mizpa lene Gedalya ninyeng tak kep yok. Lene yoni kin limwa nindigsi nya inda jo kep midyai nimbus ba anggur ngat kin biei ngat nya mang bibor mem yonti.

¹³Gima leu lene Yohanan ya tut nibou tentara di ikes yonti ei siceu indati bi pima yok bikwei ngat Gedalya ei Mizpa,

¹⁴bipai bak “Akan tut gino Baalis di nok nibou ndig mem Amon cuk Ismael mem gima yai nimai bina e?” Noro Gedalya ba ningon com yok tut ipaisi dima bi.

¹⁵Leu api Yohanan pai nyahan bak Gedalya “Ma asindui sut ba, duug yai nimai bak Ismael hak leu ba, hi dima kan tut no di yai nimai bak bi. Nggon rima isindui sut ba, noni yai nimai bina i? Leu gima mibindei ba, timiei Yehuda di idem yam ei bit na intek gimahap hanyen bu. Ba, mun dima mibindei sar limwa niken di ingat rin ei Yehuda yahagom.”

¹⁶Noro Gedalya buhup bak “Ayai nok gima au! Mun di apai sut Ismael dima ne igbit bi!”