Read Hatam YEREMIA 46 Bible Online

YEREMIA 46 - Hatam bible

YEREMIA 46

¹TUHAN mbrap bit da tut ngkiai nya ba,

² kinyon ei nimbrap tut mben Mesirti bibie. Noni pai bida tut Nekho di nok nibou ndig mem minu Mesir de tentara di Nebukadnezar di nok nibou ndig mem minu Babel hwen yok di icut bak ei Karkemis. Minu ndig dima jo dideu Minyei Pmem Ndig Efrat. Mpe dima lene Yoyakim di nok nibou ndig mem minu Yehuda ninyeng tak kep limwa nya buug cut ari bingwam gi nibitai tu ri. TUHAN pai sut mun nyeng dima,

³“Nibou tentara Mesir nya ijem bak ide nimpung tentara nya bitin ei yonti ba, ipai ‘Ma jitin ei jide mun di jibipukep tibor ninggwenti nya gi nindig kin gi nimien ba, jibicoi ug ei nikon pranti bit siceu nya o!

⁴Jisien micim cem binggwen o! Jijuk sinsun pran bijiba topi yeng ngkuong cem bijuk jibou o! Je di nimpung tentara di jiba kuda bikon pran e, jiba jide mun di jigwamti bijibikri kuda ninghim o! Jibri jide kuda ba, juug bikon pran o!’

⁵Noro Da di TUHAN dingat lo, tentara dima ingon ttin bibor ba, isujou leu ide siceu nya di ibindei timek yok ba, iba nittin binang bihigom lene igikiek kep inghim dip bi.

⁶Yo di idor sindem nya iginang kan bi. Yo di isindem di mimbri kui ingkek nya ingwes ngun leu siceu inda nsi kan bi. Indrat mpia bicut ei Igmem Ndig Efrat nipimat ei nite dima ug ei nite bei mpia nijjai.

⁷Tou ridem kep Igmem Ndig Nil di kui mpia bidem kep igmem di su di yon kep nipimat nya dima i?

⁸Gima ne minu Mesir di kui mpia bidem kep igmem di su di yon kep nipimat nya ri. Minu Mesir com nihyet ‘Midikiju ba, dinyeng mitak kep dihyeisi dini titut yam. Dibindei sar minu ndig nya kin timiei di ibong ser nya cem.

⁹Kuda e, ma jidor sindem! Kroba pran e, ma jiyai je ba, jinggan! Je di pinjoi ndig di mimbri kui jingkek bijikon mun di jibipukep tibor ninggwenti ba, jitimieisi leu minu Sudan kin Libia bitut je di pinjoi ndig Lidia di jikri tibor kan e, ma jibrim jingkek!’ ”

¹⁰Noro da di Yeremia dipai bipia njap di ammani ne TUHAN Di Ninyeng Jei ba, Sindem Bibor cem Nide njap ngon bou ri. Noni buhup bak Nide siceu nya yahagom mem njap di ammani. Nide singau simeda miyem yok lene midut inggrom cem bindei. TUHAN Di Sindem Bibor bui Nide mun di bibon midut nya ei nite bei mpia nijjai dideu Igmem Ndig Efrat mem njap di ammani.

¹¹Je di timiei minu Mesir e, ma juug ei Gilead[14] mem gima jinggok obat a! Mbro nok gima lo, obat hi di mimpu jibokti nya bijikei hanyen bi.

¹²Jide mun di bibon nimmaisi jo brei ba, ngkiai nya ikan tut. Jihyet di jibaharati tibim ba, yahagom imiap tu. Tentara nya yonti indrat yam ba, yahagom ikinoi ug ei dihyeisi tu.

¹³ Tirigi Nibou Ndig Nebukadnezar kwei bicoi minu Mesir bihwen lene TUHAN mbrap bit da bipai,

¹⁴“Yeremia e, apai bidem mben Mesir ide minu ndig nya bitut Memfis kin Migdol kin Tahpanhes hagom ‘Jitin ei mem gima jikon pran gau jenti. Lewo siceu nya mibindei sar mun di jinyeng tut nya hagom ei pranti!

¹⁵Nggon rino jide kwar Apis di sindem bibor dima kiju di nang tu i? Lewo TUHAN bindei timek noni tu!’

¹⁶Jide tentara imang bibor indrat mpia bicut leu api ipai biyam ‘Jikwei ba, ingkwei hanyen ug ei itimieisi ndam ide bat nya leu binhyepo ingwes ngun leu siceu ide singau simeda ug!’

¹⁷Jiyai ninyeng nijep dini bak nibou ndig minu Mesir, ‘Nikibou bei mbrai cig di bimangkrei nituti.’

¹⁸Dani ne Allah di niyaijo. Dani ne nibou ndig ba, TUHAN Di Sindem Bibor ri. No di mikwei hwen na nide nisindemti dem kep Nungug Tabor di jo anai ei nungug nya ikieti ba, dem kep Nungug Karmel di jo anai leu muk ngwa dip.

¹⁹Je di timiei minu Mesir e, ma jitin ei mem nituti tirigi siceu ikat je dem kep yo di isima nya ba, ikri je biyuug sut. Memfis minok minu iggum ndigsi kin ha ngunti he di mpia mbum-bra bram ri.

²⁰Minu Mesir dem kep sapi pmot di pap-nap kei noro kros gom di kwei leu nite bei mpia nijjai waisi.

²¹Tentara di Mesir ngot kep yok leu di ikwei kon pran mem no nya isindem bi lewo idem kep sapi pmot di ndig ngat bibor. Ba, yahau mem siceu kan bi. Noro yahagom itti kep inghim dip binang leu binhyepo ingwes ngun. Njap di hukum cut igkep yok tau su. Tto bou dem mem gima mun di buhun cut igkep yok.

²²Minu Mesir nang nok wou di ninan sigak a. Lewo siceu ide tentara idideu kwei su lene iba oi bihwen noni dem kep tukan di iwim biei.

²³Lene icok tut baham tindur di dem mem gima imbut ba, yuug ttau nite hi kan bi pimo bijjem hak. Bit bon hi kwop siceu ide tentara imangti kan bi. Lewo imangti dor njiriek hai nya imangti cem. Da di TUHAN disimbot dat tu.

²⁴Mun dima mibindei minu Mesir nimmaisi lewo ngkiai nya di ikwei leu nite bei mpia nijjai ihwen yok apino icut. Da di TUHAN disimbot dat tu.”

²⁵TUHAN di Sindem Bibor di Allah Israel pai “Midikes hukum ei kwar Amon ei Tebe kin minu Mesir titut yam bitut ide kwar nya kin nibou ndig di ide nya cem hagom dip. Tut nibou ndig minu Mesir kin yahagom di iba ingon com noni nya ne,

²⁶midikes yok bak Nebukadnezar di nok nibou ndig mem minu Babel bitut nide tentara di ijoi sut igyai nimai bak ide siceu nya. Noro ei nidipti bu ne tungwatu mibong ei minu Mesir noyam kin gi nipou pima. Da di TUHAN disimbot dat tu.”

²⁷ “Ditde limwa di mben Israel jen e, ma jittin au! Ditde awak Yakub e, ma adigit au! Miditeu nani kin yo di intun nani him nya leu minu ting bibor di ibindei sima je eisi. Mijingkwei hanyen ba, jibong kei jigwam kei ei jitimieisi hanyen. Mijibong nyahan ninghig-niker ba, jittin tut mun nyeng hi bu bi.

²⁸Je di Ditde limwa nya e, ma jittin au. Midikwei teu je bijingwes ngun. Midibindei sar ngkiai nya di dibindei ntek gimahap je ug eisi nya yahagom hak ug. Noro midibindei sar jeni bi. Ningat ne mijingwes ngun leu hukum bi. Noro midikes hukum di igbit di dem mem dikes ei jeni dip hak ba, bit leu dikos tutti. Da di TUHAN disimbot dat tu.”