Read Hatam YEREMIA 5 Bible Online

YEREMIA 5 - Hatam bible

YEREMIA 5

¹Je di timiei minu ndig Yerusalem e, jijop jide puig ngot ei jide minu ndig ba, jingig jiyai kep bidem bijingat bou jiyai him. Jingig jiyai kep bidem puig mien di jo bidem jide minu ndig bijingat tungwagom di ningon sren di brim ningkek mem Allah biningon gom tut Noni bou jiyai him e? Gino tungwagom ningat rin lene TUHAN mikos ser timiei minu ndig Yerusalem nya ide sisar.

²Mbro nok gino jipai bipia jikuk je bak TUHAN noro jiyai igbit jipaisi dima bi.

³Ningat ne TUHAN ningon ya mem yo di iba ingon gom bibit Noni. Noni bui je tu noro jisem tut Noni. Noni bindei bijinem-nnai noro jikou sut nide nipingok jeti. Jingkek ndok ba, jikou sut gi jittin ser jide sisar.

⁴Di kan “Nok ug e. Yo dini ne limwa di ibon inyeng ba, ikan tut mun nyeng hi bi nya ri. Iba ingon mbum bibon mun lewo ikan tut TUHAN Allah ningon kanti mem yok kin Nide niyok ningon mem yokti cem bi.

⁵Nna ba duug ngat pinjoi ndig nya bidimbrap bit yok. Lewo ningat ne yoni ikan tut TUHAN Allah ningon kanti kin Nide niyok ningon mem yoti.” Diyai nok gima tu noro ningat ne yahagom ikou sut TUHAN ninyeng tak kep yokti ba, ikou sut gima ibit nihyet.

⁶Gima rino singa di lus-lus nyen kwei leu bigbehei nya mikwei ttem yok biyai nimai biyok. Lene nsien bigbehei di lus-lus nyen kwei leu iggum ndigsi nya mikrau nikwai tut yok birik-rik nyen ingkek. Macan di nillikti mimbut-mbut wai binggok mun di yem dideu minu ndig nya. Ba, mindhe macan dima mittem bikwop no di hei leu minu ndig. Mun dima yok hagom cut igkep yok lewo ibon sisar mang bibor ba, iba inghim bak Allah nyen-nyen cem tu.

⁷TUHAN pai “Nggon rima dikos ser Ditde limwa nya ide sisar nya i? Iba inghim biDa bikuk yok bak kwar nya tu. Dikwas njita tut yok ba, igyem bindei yok noro ibon sisar nicut tut yamti ba, icem kep sop di ikrar jut nya.

⁸Idem kep kuda nikre di nimmau joti cem di bit niwek igkei ba, bikwop yahagom ingon pri kep isut nitnem.

⁹Suar dikes hukum ei yok dip drek dip igyai munti dima ba, dibuhup biyok tut mun di ibon nya.

¹⁰Midicuk siceu nya ba, inggek yo dini ide ba anggur nghousi nya lo, inggek bisar ningwig hak bi. Midicuk siceu dima yok ba, ikos yo dini ide ba anggur ninda leu. Lewo ninda dima yok ne Ditde bi.

¹¹Mben Israel kin timiei Yehuda nya yaham imbuk kep da bibor tu. Da di TUHAN disimbot dat tu.”

¹²TUHAN de limwa nya ipai mun di igbit bi tut Noni. Ipai “Nok ug e. Noni mibon mun nyeng hi bi. Nyeni mitug ndei mun di buhun bicut ei pranti kin nimai ninggumti cem bi.

¹³Jikwei ba, ibibon nabi dima yok nok yo di itri tut nihyet hou he lewo TUHAN nihyet di sok kwei jo bit yok bi.”

¹⁴Leu api TUHAN Di Sindem Bibor pai bida “Yeremia e, yo dima mitug ndei mun di buhun bibor drek dip ipaisi dima ri. Midibindei ba, dihyet dem kep hum di sror kwei leu ahui him. Mben dini midem kep biei nindig di irop ei su lene Ditde hum miyem yok bingwig.”

¹⁵Je di limwa Israel e, TUHAN sindi buwak mben gom kwei leu minu ting mem gima icoi bihwen je. Ngkiai nya dima ingat rin ei nipou yo kwei ba, isindem bibor lo, jimiap ighyet bi.

¹⁶Ide tentara di ikrau hampiap nya isindem bibor ba, mimbri kui ingkek cem. Yoni ingon nggriu sut tungwatu kan bi noro iprindei ide siceu bimai hak ug.

¹⁷Yo dima migyem jide njita beisi leu je leu api migyai nimai bak jimunggwom bat nya ningwig a. Yoni mibui mindhe nimuhup tu jide di nok sapi kin domba nok mikwau bicok tut ba anggur nghousi jide nya kin jide biei ara nya hagom bisar. Yoni migya kep jide minu ndig di bon tentara nibousi di jinang coi di jiba jingon com nya cem hagom bindung-ndiem ri.

¹⁸TUHAN pai “Mbro nok gima lo, ei nijam dima ne midibindei sar Ditde limwa nya yahagom ningwig bi.

¹⁹Yeremia e, gino ihig ser na tut nggon rino diba mun dima yok hagom bihwen yok i? Lene ma apai biyok bipia diba mun dima yok bihwen yok drek dip gi ikou sut Da ei ide minu bikes Da ei leu api yoom yok binok awak mem ngkiai nya ide kwar nya. Gima rino yoni minok awak mem ngkiai nya ei ingkiaisi.”

²⁰TUHAN cuk dani leu binhyepo ditri tut Nide nisok kepti bak yo di intun Yakub him di ibong ei minu Yehuda bipai,

²¹ “Je di jingon mbum ba, jibbwe e, ma jingig jitingou mem dihyet! Jimbun jiyai noro jigingat mpia bi! Jimbun jitingou noro jigimiap mun bi!

²² Dani ne TUHAN ri. Nggon rino jittin tut Da bi i? Suar jidigit tut Da! Dani rino dipai tes muk nintig dip di bikkin ser muk ngei di dwoi njiriek bi bijo ninno bijo kikau. Muk dwoi nindig biroi lo, njiriek hanjop niya kwas yamti dima bi.

²³Noro jingkek ndok bijaham jimbuk kep Da. Jikriek ba, jikes Da ei su.

²⁴Mbro nok gino Dani rino dikes biget mem je ei nijam biget nimbie him kin ningwigsi ba, diyai nijam nikos gandum bikwop ari bingwam mem je cem lo, jikuk je bijibou cut biDa bi sren.

²⁵Noro jide sisar dima yok rino bigen ser mun di kei dima yok hagom dino jingat jingwes eisi bi a.

²⁶Je di jinok Ditde limwa nya e, yo di isibut nya ingat rima ei jikieti. Yo dima icom bon mem gima ibikat tungwatu dem kep nok no di gwam ser bon di yok mem gima bikat ha.

²⁷Yoni inju ndigban di iba niris mun biyai nya kui ig di ide nya dem kep nok no di huk ha di nju ha keyam ei nide bansiti. Igyai munti dima bindei ba, isindem bibor binyeng cem,

²⁸immau jo yokti cem ba, mun di isuar nya hagom dem mem yok. Ibon munti di kinei bibor dima ug hon nohonti bi. Igiba ingon di gom bimbus munhyet di munggwom awak nya ide bi ba, igimbrap gau yo dino hiter ico kep yok nya tut ide munhyet cem bi.

²⁹Noro Da di TUHAN midikes hukum ei yok dip drek dip mun dima yok hagom. Midibuhup mben dini ide niyai munti nya hagom.

³⁰Mun di buhun bibor kin mun di bibon nittinti pek kep ei minu dini,

³¹tug hon nabi nya di iris mun igkei kin imam nya di ibon midut bit leu yonti ingon kanti apino Ditde limwa di jeni jijoi sut igyai munti dima. Noro tirigi njap ningwig honti tau kwei ne mijibon mindei i?”