Read Hatam YEREMIA 50 Bible Online

YEREMIA 50 - Hatam bible

YEREMIA 50

¹ TUHAN sok kep da tut minu ndig Babel bitut timiei Babel nya bipai,

²“Abon mun di bindo lene abipai bidem ngkiai nya yahagom bipia minu Babel cut tu! Ma aku mimun tut nicutti au! Siceu nya ibindei minu Babel de kwar di ninyeng Merodakh bindung-ndiem tu. Kwar di mben Babel nya ide dima di bindei di tungwatu icut ei mun di kinei nyati dima ki kukiau bikinei-kinau tu.

³Mben ngkiai nya gom mikwei leu nite bei mpia nijjai binjei siceu kwei bihwen mben Babel lene bindei minu dima biwer iggum ndigsi ri. Tungwatu nya kin mindhe-ndhe nya inang ningwig leu ba, hi dima bong ei minu dima bi.”

⁴TUHAN pai “Mpe dima lene mben Israel kin Yehuda yahagom iba nipim bittei yam kwei binggok ide Allah di Dani.

⁵Yoni ihig ser puig di ug ei Sion leu api imbut hallu ndam minu ndig dima. Mpe dima lene ibon gi preu di jo ninghig-niker bit Da bikrau kep gi preu dima bijo ninno bijo kikau.

⁶Ditde limwa nya idem kep domba di ide gembala nya isindui yok di israwir ei nungug him. Ba, imbut-mbut wai leu nungug hi ug ei nungug hiter bu ba, igikan tut itimieisi bu bi.

⁷Ba, yo di ittau kep yok yahagom ihwen yok ba, igyai ninghuisi wei biyok cem. Ide siceu di iba nitok biyok nya ipai ‘Nyeni itunggwei sut mun di ibon biyok nya bi lewo yoni ibon sisar tut TUHAN. Idigup bat-idigai bat nya iba ingon com TUHAN ba, ningat ne ma suar yoni cem iba ingon di gom bibit Allah kikau.’

⁸ Je di Ditde limwa mben Israel e, ma jikiju bijinang hak leu minu Babel! Jeni rino jinang nimbie him ngat apino nindigsi nya ibram je hwou a.

⁹Midiba ngkiai nya di isindem bibor di ikwei leu nite bei mpia nijjai bicom yam mem gima injei bihwen minu Babel. Yoni midimig ide nimpung tentara mem gima ikon pran bibindei timek yok cem. Yo dima ne tentara di ikri tibor kan di iprindei tunggwei kan bi ri.

¹⁰Siceu dima mipos ndigban di timiei nya inju ei minu Babel ba, icat mun nyeng hagom bit leu yonti ingon kanti. Da di TUHAN disimbot dat tu.”

¹¹TUHAN pai “Mben Babel e, jicut igkep Ditde limwa nya bijipos ndigban leu yok. Apino jinggei-hi-nggei bijipri-pri nyen ba, jidem kep kuda di bon nihyet kin sapi di yem kep minta pimo.

¹²Noro mijinok mben di ibon inyeng bi bibor ei mben nindigsi nya ikieti ri. Yo dima ighyet kinei sut jide minu ndig ba, ibiyai nimmai cem bije. Jide minu dem kep iggum ndigsi di ngoi-nga bingak cai ri.

¹³Minu Babel wer ig kum kroi di tungwatu hi gi bong ser bi drek dip Ditde nigga biborti. Yo di imbut di injiriek mpia dima yahagom idigit tut ba, inghuisi mpig sut cem.

¹⁴Je di jikri tibor kan e, jidimig jide nimpung tentara nya leu binhyepo jinjei siceu bijiyon ttai minu Babel leu api jicoi bijihwen. Jikri jide tibor bijikes ndam minu Babel bihigom lewo ibon sisar tut Da tu.

¹⁵Jikon jihyet nindig bijihyet sra tut pran ttai minu ndig dima! Nogindini mben Babel ikes yonti ei jinda nsi tu. Siceu nya ihwen ngug tig binjei bitti tu. Dani dibirop hanyen bak mben Babel. Gima rino ma jibibon yok nok gi ibibon nindigsi nya.

¹⁶Ma jisindui sut tungwatu nya bigyai miai lene ita njita kioi ba, igyai ningat ei minu dima au. Ngkiai di ibong ei minu dima yahagom mingkwei hanyen ug ei itimieisi lewo ittin tut tentara di icoi di ihwen yok.”

¹⁷TUHAN pai “Mben Israel idem kep nimpung domba di singa huk yok di bindei di intek gimahap a. Nibou ndig minu Asyur coi bihwen yok nimbie him ngat. Leu api Nebukadnezar di nok nibou ndig mem minu Babel kinam injum nya mien-mien.

¹⁸Gima rino Da di TUHAN Di Disindem Bibor di Allah Israel midikes hukum ei Nibou Ndig Nebukadnezar kin nide minu dip noyam kin gi dikes hukum ei nibou ndig minu Asyur dip.

¹⁹Midingkwei mben Israel hanyen kwei ei itimieisi. Yoni igyem ningat di ntun Nungug Karmel kin Basan him. Yoni igyem ningat di ntun hanjop nsi Efraim kin Gilead him cem.

²⁰Mpe dima lene mben Israel kin Yehuda ingon pwoi-pwau lewo sisar ninyeng hi rap yok bi. Dikos ser yo di diteu yok di ingwes ngun tu nya ide sisar leu yok. Da di TUHAN disimbot dat tu.”

²¹TUHAN pai bak mben gom di ibong ei nite bei mpia nijjai “Jicoi bijihwen mben Merataim kin Pekod ug. Jiyai nimai biyok lene jibindei sar yahagom. Jiyai igbit dipaisi dini hak ug. Da di TUHAN disimbot dat tu.”

²²Nihyet nisra tut pranti dem kep kru di cut tirigi siceu nya ibindei timek timiei minu dima nindig bibor.

²³Mben Babel ikrau apak bibui dihyeisi dini titut yam bindung kei tu. Noro tini bu ne apak dima dahat tu! Ngkiai nya yahagom imiap tut mun di cut igkep minu dima leu api idigit tut.

²⁴TUHAN pai “Mben Babel e, jihwen bit Da. Gima rino jisrei ei bon di diyok ser jeti noro jingon huk niti tut bi.

²⁵Suar Da di TUHAN Di Dinyeng Jei kin TUHAN Di Sindem Bibor diyai midiyai ei minu Babel. Gima rino dikau dimbou leu Ditde ig gudan di minggwen joti bijo hak. Diba Ditde nigga biborti bindei hei minggwen dima yok.

²⁶Siceu jen e, ma jicoi bijihwen mben Babel leu nima kwei-nima kwei ba, jinggek nide ig gudan di inju gandum eisi nya! Jicat ndigban di jipos nya keyam bikui sur mpia noyam kin gi jinju gandum keyam di kui sur mpia pimo! Jibindei sar minu dima! Ma jibet bihi biniken jo ei au!

²⁷Ma jiyai nimai bak ide tentara nya yahagom hak ug! Jiyai nimai biyok ug! Buhun bibor mem mben Babel lewo tto bou dem mem gima itug ndei hukum tu!” (

²⁸Yo di inang leu minu Babel biyuug ei minu ndig Yerusalem ipui sut notou ide TUHAN Allah birop bak mben Babel drek dip ide nibon munti bitut TUHAN De Ig.)

²⁹ TUHAN pai “Jicuk yo di ikri tibor kan nya ba, icoi minu Babel biprindei yok ba, imai ug. Bikwop yo di ikri tibor kan nya ma jinjei sut yok bijiyon ttai minu ndig dima. Ma jisindui sut tungwagom binang ba, ningwes ngun au. Ma jibirop ide nibon munti nya hagom. Ma jibibon yok bit leu ide niyai munti nya. Lewo ibon mun kinei-kinau tut Da di Allah mben Israel Di Dikwes-kwau tu.

³⁰Njap dima ne ide pinai pilei nya mikrop kak simpak bou ei minu ndig dima hagom ba, ide tentara nya yahagom itimek bingwig. Da di TUHAN disimbot dat tu.

³¹Mben Babel e, jingon jei bibor! Gima rino Da di TUHAN Di Dinyeng Jei Bibor kin TUHAN Di Sindem Bibor dihwen je ug a. Tto bou dem mem gima dikes hukum ei jeni dip tu.

³²Limwa jide di ingon jei nya mindrat mpia bicut ri. Hi di mimpu je bijikiju hanyen leu jicut eisi dima kan bi. Midindig jide minu ndig nya hagom apino mun di jo ttai nya hagom sar ningwig a.”

³³TUHAN Di Sindem Bibor pai “Siceu nya ikimut inda kep mben Israel kin Yehuda bimien ei indati. Ba, yo di ikat yok di isima nya yahagom igya ser yok bingkiem kei ba, ikou sut gi ikes yok bimbut cem.

³⁴Noro No di teu yok di ingwes ngun dima sindem bibor. No dima ninyeng rino TUHAN Di Sindem Bibor. Danti rima dibrim dingkek tut ide munhyet dima bidibindei ba, nibong kei nigwam keisi mikieng kep dihyeisi dini. Noro midikes mun di binggek tut ide nibong kei nigwam keisi kin ningon ttinti cem kwei kep mben Babel.”

³⁵TUHAN pai “Jibindei sar minu Babel bitut nide limwa nya kin yo di inyeng jei nya kin yo di ikan bipia ingon ki nya yahagom hak ug!

³⁶Ma jibindei ba, mben Babel ide nabi nya isar hak! Yoni iris mun igkei ba, ibbwe bibor cem. Ma jibindei ba, tentara Babel di mimbri kui ingkek nya isar ba, ittin bibor hak!

³⁷Ma jibindei sar ide kuda kin kroba pran nya bitut tentara ningot kep yok nya hak ug! Yoni inghuisi jet bibor! Ma jicok tut Babel de mun di nyeng tut nya bijipos nide ndigban nya hagom!

³⁸Ma jibindei pingge nide minyei pmem nya kin ngoi dumti nya hagom! Lewo minu Babel mpung tut kwar di bindei ba, nide limwa nya igyai ttin ningat ba, mirei bon yok tut cem.

³⁹ Gima rino minu Babel minok mpia di ninnei rom kin ninnei di sibut nya[16] kin ha unta nya ibong eisi. Hi dima joi sut bong ei minu Babel bi bijo ninno bijo kikau.

⁴⁰ Dibindei timek minu Babel noyam kin gi dibindei timek minu ndig Sodom kin Gomora bitut minu mien ngot di jo ttai nya. Tungwa hi dima bong ei sirima bu bi. Da di TUHAN disimbot dat tu.

⁴¹Mben di isindem gom imig jo kep nimbut kwei leu minu ting bibor ei nite bei mpia nijjai kwei su. Igya tut nibou ndig imang bibor kwei mem gima ikon pran.

⁴²Yo di isibut bibor di igikan tut nikos ser sisarti bi ikiju tut ide hampiap kin micim. Ide kuda di ibri di dor mem gima ibihwen mben Babel nya nibimbiti dem kep muk di tti a. Injei siceu ba, ikinyon ei nikon pran bit mben Babel tu.

⁴³Nibou ndig minu Babel miap tut nibimbiti dima lo, bitbon yai no nyen bu kan bi. Nittinti ngot no bingkiem ba, noni tug ndei ninghuisi wei dem kep nok sop di tta buhun di ninghim dut di gwam tut munggwom a.

⁴⁴Da di TUHAN midikwei bindei mben Babel binang leu ide minu ndig di ibong eisi nya kros hak ba, dinoyam kin singa di hei leu baham tigotti di jo dideu Minyei Yordan ba, kwei ndam minta nidumti di domba nya igyem kep minta eisi. Leu api mididimig nibou ndig gom ei mem gima ninyeng tak kep mben dima. Tou rima ibinai kin Dani i? Tou rima brim ningkek mem gima ba mbrap bit Dani i? Apo nibou hi di hwen bit Da ningat rinaha e?

⁴⁵Gima rino ma jimiap kep mun di ditin ei dingon kanti tut mem minu Babel kin mun di dibibon bak timiei Babel nya cem. Siceu nya mikri munggwom di ide inda biyuug sut apino ide ndigpoi nya yahagom migwam nidigitti drek dip.

⁴⁶Tirigi minu ndig Babel cut lene nihyet di kui yam nindig bibor tibim mpiati. Apino dihyeisi dini hagom ugwa-kwei. Ngkiai nindigsi nya mimiap timiei di ibong minu ndig dima ighyet di icot nya.”