Read Hatam YEREMIA 51 Bible Online

YEREMIA 51 - Hatam bible

YEREMIA 51

¹TUHAN pai “Midikes hou nibinggek[17] di ninnei miep ug ndam minu Babel kin timiei di ibong ser nya cem.

²Midipinak ngkiai nya di ibindei timek minu Babel noyam kin hou di nimig ten di ninnei ttei gandum nicaba. Mpe di njap di buhun dima dem ne yo dima micoi ug ei minu dima bihwen leu nima kwei-nima kwei ba, icok tut bipwoi kei.

³Ma jiyai nituti bak tentara Babel nya bikri ide tibor gom bikes ba, ijuk ide sinsun pran au. Ma jisindui sut ide tentara pinai pilei nya bigyaijo au. Ma jibindei timek ide tentara nya yahagom hak ug!

⁴Yoni mitug ndei ibokti di buhun ba, imai kak puig di mbut minu ndig di ide nya.

⁵Mbro nok gino mben Israel ibon sisar tut Da tu lo, Da di TUHAN Di Disindem Bibor cem Di Kwes Bibor bidinok mben Israel ide Allah cem midikes mben Israel kin timiei Yehuda nya ei bi.

⁶Ma jiteu jenti bijingwes ngun ug! Ma jinang leu minu Babel hak leu ma jitug ndei nimai drek dip yo dima ide sisar! Lewo tto bou dem mem dibirop mben Babel ide nisibutti ba, dikes hukum ei yok dip bit leu ibon munti di kinei nya.

⁷ Nipou ne minu Babel dem kep mok mas di dikrau ei dindati di bindei ba, mben dihyeisi dini hagom ibou ngwak sibui sut. Ngkiai nya yahagom idut ba anggur ngei eisi apino bindei di yahagom intin kiek a.

⁸Noro minu Babel cut bikimbo kros hak. Ma jipim tut noni bijinggok obat mem nibokti nya. Leu hi rima kei hanyen e?

⁹ Ngkiai nya di ibong ei sirima ipai biyam “Igyai ibou tut gima impu mben Babel tu lo, nituti njiriek tu! Gi kei mem ipri hak leu minu dini bingkwei hanyen ug ei itimieisi hak ug. TUHAN ba Nide nisindemti bikes hukum ei mben Babel dip ba, bindei timek yok bitimek krebou tu.”

¹⁰TUHAN de limwa nya ipai biyam “TUHAN ndo brei bipia nyeni inggre kin nimpung di ibon mun di igbit. Jikwei ba, ingkwei hanyen ug ei minu ndig Yerusalem leu binhyepo itri tut mun di ide TUHAN Allah bibon nya ei sirima.”

¹¹TUHAN pingok nibou ndig minu Media nya ingonti leu binhyepo ingon sibui sut mben Babel bibindei timek yok drek dip gi ibindei timek Nide Igya. Nibou tentara nya icuk ide limwa nya “Jisien jide singau tibor nya! Jitin ei jide mun di jibipukep tibor ninggwenti nya cem!

¹²Jiyai bindo di bitto mem gima jicoi bijihwen minu Babel de ngug tig nya. Lene ma jibindei sindem yo di igya dikti nya bijikes yo di igya ser nya bigya ngkiem ser. Jikes tentara di ikos dik ser minu ndig dima!” TUHAN bindei ba, ningon kanti di tin ei mem minu Babel pek kep tu.

¹³ Minu dima nyeng bibor ba, nide minyei pmem nya mang. Noro ttou bou dem ba, niyaijo ningwig honti tau kep tu.

¹⁴TUHAN Di Sindem Bibor heng bitug hon Nonti njem bipia Noni mipinak tungwatu imangti bidem hai nimangti mem gima injei bihwen minu Babel. Yoni mimbos-hi-mbos bigyai nillei tut gi yoom kep yok.

¹⁵TUHAN ba nide nisindemti bipai tes dihyeisi dini. Noni ba ningon kiti bibon minu nya hagom lene ba nintin kimboti bikes mpia-bbed him cem bijo nijoti.

¹⁶Noni ba nicukti he bibindei ba, minyei nibimbi bong ei niban di bikwas minyei leu yam[18] ei mpia-bbed him nidip. Noni bindei hei bumbuhui bikiju kwei leu dihyei nohon keti. Noni bindei hei kigyei cem ba, ninjeng srei bigetti leu api bipinak hou cem kwei leu nijo habieisi.

¹⁷Tungwatu nya ingat gima yok lene ingon huk niti bipia ingon mbum ba, ingon dor niti bi. Tukan mas nya igwam nimmaiti. Lewo ide kwar di ikuk yok bak di ibon bou inda him nya ne kwar di nitrowai nya rin ba, innei joti bi.

¹⁸Kwar di ikuk yok bak nya bon ninyeng bi ba, dem mem tungwatu nya iba ighyet bicig ba, ipai kinei cem. Mpe dino tto bou dem lene kwar nya misar bingwig.

¹⁹Yakub de Allah noyam kin kwar di ikuk yok bak dima yok bi. Noni ne No di pai tes mun nyeng hagom ri. Ninyeng rino TUHAN Di Sindem Bibor ba, Noni dimig Israel binok Nide limwa nya.

²⁰TUHAN pai “Minu Babel e, adem kep apak ba, anok Ditde minggwen di dibikon pran ri. Diba nani bingget igkep ngkiai nya kin nibou ndig ide ninyeng tak kepti nya.

²¹Diba nani biya kep kuda nya kin tungwatu di ibri nya bitut kroba pran kin yo di ibri nya bisar ningwig a.

²²Diba nani biyai nimai bak pinai nya kin sop nya cem ndigpoi nya kin pilei nya cem sop gwam nitta pilei nya kin munggwom pilei nya cem yahagom bisar bingwig.

²³Diba nani bindei sar gembala nya kin mindhe-ndhe nimuhup tu nya kin yo di igyai miai kin sapi di ibikkin dihyei nya kin nibou di inyeng tak kep limwa nya kin nibou tentara di inyeng jei nya yahagom.”

²⁴TUHAN pai “Nogindini dibirop bak minu Babel kin timiei Babel nya tut ide niyai mun kineisi di bitut minu ndig Yerusalem hagom hanyen ba, jingat gima bou jiyai him a.

²⁵Minu Babel e, adem kep nungug di bindei timek dihyeisi dini hagom. Noro Da di TUHAN midihwen nani. Midibrim nani bidirim na lene dibisindui sut ba, hum yem na leu api anok atriem ndung.

²⁶Hi yai tig nindak gom ngat leu ade ig kum kroisi dima mem gima bingot ig bu bi. Adem kep iggum ndigsi bijo ninno bijo kikau. Da di TUHAN disimbot dat tu.”

²⁷Je di nibou ndig leu nite bei mpia nijjai e,[19] jiyai bindo di bitto mem gima jicoi bijihwen! Jimiep pun mbrei leu binhyepo ngkiai nya yahagom imiap! Jinjei sut ngkiai nya bijikon pran bit mben Babel! Jicuk nibou ndig Ararat kin Mini kin Askenas bitut ide limwa nya ba, icoi bihwen. Jikon nibou pran gom mem gima bie tut nimpung tentara nya di icoi di ihwen dima. Jinjei sut kuda di nimangti dem nimpung hai nya.

²⁸Jitin ei ngkiai nya mem gima jibikon pran bit mben Babel a. Jijem nibou ndig minu Media nya binjei sut yo di igya kui yok nya bitut pinjoi ndig nya kin tentara nya di ingat rin ei ide minu di inyeng tak kep nya kwei.

²⁹Dihyei bingmai ba, ugwa-kwei lewo TUHAN sindi bindei mbut ningon kanti di tin ei mem gima bindei ba, minu Babel minok iggum ndigsi di tungwatu ibong ser bi.

³⁰Tentara Babel ikes inda tut nikon pranti leu ba, igwam bidem tentara nibousi di igya coi nya di ibicuon igyaisi nya tu. Lewo mimbri cut leu yok ba, ibrim ingkek ba, isindem bu bi. Siceu nya inggek dimbou pmem ei minu ndig dima leu ba, icoi bindig ig nya tu.

³¹Yo di itri tut mun di buhun dima idor bram yam bipai nibimbiti bak nibou ndig minu Babel bipia siceu icoi bihwen minu ndig leu nima kwei-nima kwei bidem hagom tu.

³²Siceu igyai mpia di isigon minyei kigkepti dima bigyati tu. Ba, indig tentara nibousi di igya coi nya tu apino tentara Babel nya ingon tai-tai bou.

³³Jei bi ne yoni mibindei timek yok bico kep yok nyen noyam kin gandum di ico kep ei mpia di ico kep gandum kikep eisi. Da di TUHAN disimbot dat tu.”

³⁴Nibou ndig minu Babel ya kep minu ndig Yerusalem bitimek lene biyem hagom bingwig. Noni bindei minu ndig dima bingwak dem kep nok tungwatu ibindei ngwak ampou a. Minu Babel dem kep mindhe di nindig bibor di pinde minu ndig Yerusalem titut yam lene pos ndigban nyeng di kei hagom biduhwen bicom niken.

³⁵Je di timiei Sion e, ma jipai “Suar minu Babel di niten-pos bibor di bibon nye kinei su dima biang niyai munti nibuhunti!” Timiei minu ndig Yerusalem e, ma jipai “Suar minu Babel biang niyai munti nibuhunti noyam kin nibuhunti di yai binye hak ug!”

³⁶Gima rino TUHAN pai bak timiei minu ndig Yerusalem nya “Midikiju tut jide munhyet ba, midibuhup jide siceu nya ide niyai munti di bitut je nya hanyen biyok ri. Dibindei ba, minu Babel de minyei bousi nya kin minyei pmem nya hagom pingge.

³⁷Minu dima miwer ig kum kroi ba, nok mpia di nsien bigbehei nya iku yo eisi. Tirigi tungwatu ingat gima lene igyai ttin ba, hi di joi sut bong ei mpia dima bi.

³⁸Mben Babel migyau-yau nyen nok singa ba, inggiling nok singa nimien.

³⁹Tirigi ingon kui mem gima igyem njita lene miditin ei njita mem yok. Midibindei njita dima pu yok ba, ibou ngwakti sibui kikau ba, ibibong mai lene igikiju hanyen bu bi.

⁴⁰Midijem yok noyam kin ijem domba mien kin kambir mien kin domba nikre nya dino ibui nok mikwau a. Da di TUHAN disimbot dat tu.”

⁴¹TUHAN pai “Minu Babel di tungwatu nya bidem dihyeisi dini hagom ikon ninyeng dima cut leu su ba, ide siceu nya igyai bigyati tu! Ngkiai nya yahagom igyai ttin ningat minu dima bibor!

⁴²Muk ngei dwoi biyon igkep minu Babel ba, ninggop di tti bram yam di nugwei bong hwen minu dima tu.

⁴³Minu ndig nide nya dem kep mpia di biyai igyai ttin di dem kep iggum ndigsi di ngak-cai. Tungwa hi di joi sut ug bong ei mpia dima bimbut njiriek bi.

⁴⁴Midikes hukum ei mben Babel ide kwar Bel dip ri. Midibindei ba, noni mingkwei mun ngot di pos tu nya hagom hanyen leu api ngkiai nya hi mikuk no bak bu bi. Minu Babel de ngug tig nya hagom lus tu.

⁴⁵Gima rino je di mben Israel e, ma jinang leu mpia dima! Jinang bijingwes ngun leu Ditde nigga biborti di kui mpia.

⁴⁶Ma jittin ba, jingon bos-bos nyen tut nihyet hou di jimiap au. Bikwop ari bingwam ne nihyet hou di ter leu yam tibim bitut nihyet hou di tibim tut timiei minu nya di ikon pran bit yam cem.

⁴⁷Ma jiba jingon com bipia tto bou midem leu api midikes hukum ei mben Babel ide kwar nya dip. Tungwatu nya mipai minu dima titut yam kinei ba, timiei nya yahagom mitug ndei nimai.

⁴⁸ Tirigino minu Babel cut ug ei ngkiai nya di ikwei leu nite bei mpia nijjai di ibindei timek yok indati ne mun nyeng hagom ei mpia-bbed him kin dihyeisi dini mimbos-hi-mbos bigyai nillei ba, ingon kei kep.

⁴⁹ Tungwatu imang bibor bidem dihyeisi dini imai tug hon minu Babel di hwen yok. Noro tini bu ne minu Babel micut drek dip gi ihwen mben Israel di imai su. Da di TUHAN disimbot dat tu.”

⁵⁰TUHAN pai bak mben Israel di ibong ei minu Babel “Jingwes ngun leu nimai tu! Ma jikiju bijimbut nogindini hak ug! Ma jigwam-gwam nyen ei au! Mbro nok gino jingat rin ei minu ting leu jitimieisi lo, ma jiyok ngon kep jide TUHAN di Dani kin minu ndig Yerusalem cem.

⁵¹Jipai-pai nyen “Yo dima ipai nye kinei ba, igyai nimmai binye tu. Nigwam nimmaiti lewo ngkiai nya ibong ser ninsi di kwes nya ei TUHAN De Ig hagom bidem ser nye tu.”

⁵²Nok ug e. Ma jingig jitingou mem dihyet dini. Nituti midem leu api midikes hukum ei mben Babel ide kwar nya hagom dip yo. Yo di ibok buhun ighyet di yuun-icot mitibim bidem minu dima nisurti-nipekti yo.

⁵³Mbro nok gino mben Babel ikui ug ei mpia-bbed him ba, iwin tentara nibousi di igya coi di bit bon hi nggek bingwig kan bi mem yonti ei sirima lo, dipinak ninggek kep mun cig nya binggek bihigom. Da di TUHAN disimbot dat tu.”

⁵⁴TUHAN pai “Jingig jitingou mem dihyet bijimiap kep! Tungwatu yuun-bicot ba, iba ingon di ngguk bipim ei minu Babel tut nibindei timekti di cut igkep minu dima.

⁵⁵No digwa kep di dibindei timek mben Babel ba, no dibindei ntus ighyet di kui yam bibor yo. Siceu itausi dem kep muk ngei di tti di nugwei bong ba, siceu ide tentara injei bicoi bihwen ba, ighyet sra tut pran a.

⁵⁶Ikwei mem gima inggek minu Babel ba, ikat tentara nide nya leu api ibidahat minggwen di ide nya. Da di TUHAN di dikes hukum ei yo di ibon mun di kinei nya dip bidibuhup bak minu Babel bit leu nibon munti nya.

⁵⁷Midibindei ba, mun di pu mipu yo di inyeng jei ei minu Babel di ingon ki nya kin nibou nya kin tentara nya tug hon Ditde nigga biborti ri. Ba, yoni mibong mai bikiju hanyen bu bi. Noro ibong mai bijo ninno bijo kikau. Disimbot dat tu. Dani ne nibou ndig ba, TUHAN Di Sindem Bibor ri.

⁵⁸Midibindei timek minu Babel de ngug tig di sindem bibor nya ba, sur yam kin dihyei ninjek dip ri. Dindig dimbou pmem di jei ndig krop nya hagom ningwig a. Ngkiai nya icom yahanggwap mikui-kausi he. Lewo hum miyem midyai di icom yahanggwap tut nya hagom yo. Da di TUHAN Di Disindem Bibor disimbot dat tu.”

⁵⁹No di ya ser Nibou Ndig Zedekia nonti pijum hak rino Seraya. Noni ne Neria nipmot ba, Mahseya nignyon ri. Zedekia di nok nibou ndig mem minu Yehuda ninyeng tak kep limwa nya ug ei ari bingwam gi nibitai lene Seraya bit Zedekia ug ei minu Babel. Apino diyai midyai gom bak noni.

⁶⁰Dipas kep mun di buhun hagom di micut igkep minu Babel kin mun nyeng nindigsi nya di bitut minu dima ei srat kijum gomti.

⁶¹Leu api dipai bak Seraya “Tirigi aug krau minu Babel lene ma ata abou ei nikwop kep mun nyeng hagom di jo srat diniti bak yo di ingat rin ei minu dima.

⁶²Gima leu lene ma angat nadi “TUHAN e, apai bipia abindei timek minu ndig dini ba, tungwatu nya kin mindhe-ndhe nya misar bibor. Lene mpia dini midem kep iggum ndigsi bijo ninno bijo kikau.”

⁶³ Seraya e, tirigi akwop mun nyeng hagom di jo srat diniti bak yo dima tu lene ma angot tig kin srat dini leu api acom ug ei Minyei Pmem Efrat ninggimau yon.

⁶⁴Ba, abipai ‘Gima ne mun di bindo tut hukum di micut igkep minu Babel ri. Mun di buhun di TUHAN kes ei minu Babel dip mibindei sar minu dini ei minyei jou ba, bit bon piar hanyen kan bi.’ ” Yeremia nihyet di pai nya nohonti ndia ri.