Read Hatam YEREMIA 52 Bible Online

YEREMIA 52 - Hatam bible

YEREMIA 52

¹Tirigi po Zedekia sindi nok nibou ndig mem minu Yehuda pima lene nide njap ug ei ari bingwam ningot can ba, gom leu api ninyeng tak kep limwa nya mem ari bingwam simnaibrimiggom bu. Nipmem ninyeng Hamutal di Yeremia leu Libna nipmisop.

²Noro Nibou Ndig Zedekia bon sisar tut TUHAN noyam kin Nibou Ndig Yoyakim.

³Gima rino TUHAN ningon sibui sut timiei minu ndig Yerusalem kin timiei Yehuda nya nindig bibor bijji yok lene gi nyohou yok bu bi. Mpe dima lene Zedekia ham nimbuk kep Nebukadnezar di nok nibou ndig mem minu Babel.

⁴ Gima rino nibou ndig dima ya tut nide tentara yahagom ba, ikwei kon pran bit timiei minu ndig Yerusalem mem njap nisimnai ei bed nisimnai tirigi Zedekia ninyeng tak kep timiei Yehuda nya mem ari bingwam muhwindatai tu. Tentara dima yok yohok ide prak meng yati bigyon ttai ngug tig ei minu ndig Yerusalem nisai ba, ibon ide ngug tig di bipu kep tibor ninggwenti nya cem.

⁵Ba, igya ser timiei minu ndig Yerusalem nya kikau bipek Zedekia ninyeng tak kep yok mem nijam ari bingwam simnaibrimiggom.

⁶Ug ei njap nimuhwindatai mem bed nibitai ei ari bingwam dima tirigi ninggum nindig bibor hwen timiei minu ndig Yerusalem ba, njita hagom ngwig leu yok tu,

⁷ lene ide siceu nya inggek ngug tig dima bicoi bigyai minu ndig Yerusalem bigyati. Mbro nok gino siceu dima yok igyon ttai minu dima lo, tentara Yehuda yahagom imbris nyahan ei nibou ndig de miai bunggan ba, yehei kak dimbou hui di itu ei ngug tig nipuig can kieti binang bingwes ngun ndam Minyei Yordan.

⁸Noro tentara Babel yuhuk bram Nibou Ndig Zedekia bikat noni ei briep bou him dideu minu ndig Yerikho leu api tentara Yehuda yahagom ikes Zedekia ei binang ningwig leu noni.

⁹Leu api tentara Babel ibuwak Zedekia ug ei Nebukadnezar noho bei tirigi noni ningat rin ei minu ndig Ribla leu api Nebukadnezar kes hukum ei noni dip.

¹⁰Zedekia nipmot bat nya kin nibou di igya kui noni nya yahagom itug ndei nimai bou Zedekia niyai him ei mpia dima.

¹¹ Leu api Nebukadnezar cuk yok biket Zedekia niyai njep leu lene iba lante biteu noni bibuwak ug ei minu Babel. Noni sima ei ig bui nsi ei minu dima kikau ug bipek niyaijo ningwig honti.

¹²Tirigi Nibou Ndig Nebukadnezar ninyeng tak kep mben Babel mem ari bingwam simnaimuhwidip brimigtehibitai tu lene Nebuzaradan di pingok kep nibou ndig ningonti di nok nibou pran cem kwei ei minu ndig Yerusalem ei njap nisimnai mem bed nimuhwi bicoi ug ei minu dima.

¹³ Noni ndig TUHAN De Ig kin nibou ndig de ig kin timiei minu ndig Yerusalem di inyeng jei nya ide ig hagom bitimek bingwig ba,

¹⁴nide limwa nya inggek ngug tig di krop ttai minu dima cem.

¹⁵Noni kat timiei nya kin tukan nya kin yo di itti kin nibou ndig minu Babel di ibong ser minu dima bibuwak yahagom ug ei minu Babel.

¹⁶Noro noni sindui sut yo di yuhui mbum bibor ibou poi di ide dihyei hanjop nsi ninda rom hi bi ba, icuk yok leu binhyepo inyohou miai ba anggur nghousi kin beisi nya hagom.

¹⁷ Tentara Babel inggek cou ngkimom-tembaga kin kroba kin bokor di nindig bibor hagom di jo ei TUHAN De Ig bingwig bipwoi ngkimom-tembaga di ibui kukiau hagom bimbut tut ug ei minu Babel.

¹⁸Yoni ipos skop nya kin tong di iket atriem leu nimbar hum dok eisi nya kin mini njeng nimbumbati nya kin bokor di itau mindhe ninggrom eisi nya kin bokor di indig biei nggrai di ui-gwang kei eisi nya kin mun nyeng nindigsi di iba ngkimom-tembaga bibon hagom di imam nya ikrau kep tirigi ibon midut ei TUHAN De Ig ba, imbut tut hagom.

¹⁹Ipos mun di tukan nya iba mas kin perak bibon nok mok nya kin bokor mem gima iket hum mbom eisi nya kin bokor di itau mindhe ninggrom eisi nya kin tong di iket atriem leu nimbar hum dok eisi nya kin mini njeng nidihim kin bokor di indig biei nggrai di ui-gwang kei eisi nya kin bokor mem nibon midut nisiber ba anggur ngei eisi nya cem hagom bimbut tut ningwig a.

²⁰Nimbumbati po Nibou Ndig Salomo ba ngkimom-tembaga bibon mem TUHAN De Ig pima nok cou ndig nidihim can kin kroba nindig kin tong nindig krop bitut kwar sapi nikre ningat simnaibrimigcan ei nikiou hagom buhun bibor ba, bit bon ikwop nibuhunti kan bi.

²¹Cou pima hacem nijeisi dem meter muhwindaningai lene nitta ninyanti leu nite hi kikau ug bipek kin nite hi dem meter muhwi biniken. Cou nya ninsi ngwak noro ningkek nindokti ug ei senti muhwindacan.

²²Yahak mun di iba ngkimom-tembaga bibon di nijeisi dem meter can binjiriek ei cou niyenti hu kwei. Niyenti nya di iba ngkimom-tembaga bibon bon kawanggai ei niyenti ba, iba ngkimom-tembaga bibon biei delima ningat ba, ibimau kawanggai dima titut yam.

²³Biei delima ningat sratus gom jo bikwop kawanggai dima him noro ningat ningot muhwindatai ba, muhwindagom he jo brei bou yo di igya kui nikiou nya igyai him.

²⁴Gima leu lene nibou pran Nebuzaradan kat Imam Nibou Ndig Seraya kin Imam Sefanya di ya kui Seraya kin nibou TUHAN De Ig di inyeng jei nya ibou ningai yahagom bikri yok ug ei minu Babel.

²⁵Noni kat nibou pran gom di ninyeng tak kep tentara Yehuda nindigsi nya kin nibou tentara di ya kui nibou pran di gwam kep kintrorti dima kin ibou muhwindacan di ipingok nibou ndig ningonti yahagom bitut yo di inyeng jei nya ibou ningot muhwindagom bu,

²⁶bibuwak yok ug ei nibou ndig minu Babel noho bei tirigi noni ningat rin ei minu ndig Ribla.

²⁷Minu ndig dima jo ei hanjop Hamat. Lene nibou ndig dima bindei ba, tentara nya ibui yahagom binem-nnai leu api igyai nimai biyok. Nok lene siceu nya ikat timiei Yehuda nya bibuwak yok leu itimieisi kikau ug ei ingkiaisi.

²⁸Gino ikwop kep yo di Nebukadnezar kat yok di yuug sima ei ingkiaisi dima imangti ne imangti rinok gini. Tirigi Nebukadnezar ninyeng tak kep limwa nya mem ari bingwam muhwindacan tu lene noni kat ibou sribu ningai ba, nyatungwagom ningai leu api yahagom isima ei ingkiaisi.

²⁹Tirigi ninyeng tak kep mem ari bingwam simnaimuhwidip brimigtehiningai tu lene noni kat timiei minu ndig Yerusalem ibou sratus muhwindaningai ba, ningot ningai can bu. Yo dini cem yuug sima ei ingkiaisi.

³⁰Tirigi ninyeng tak kep mem ari bingwam nyatungwagom ba, ningai tu lene nide nibou pran Nebuzaradan kat ibou sratus muhwindacan ba, ningot bitai muhwi bu leu api isima ei ingkiaisi. Gima rino imangti ibou sribu bitai ba, sratus muhwindagom yahagom isima ei ingkiaisi.

³¹Mpe hi bu tirigi mben Babel ikon Ewil-Merodakh nok ide nibou ndig nijep bu lene ningon nggriu sut Yoyakhin di nibou ndig minu Yehuda bikes noni leu ig bui nsi. Mun dini pek kep mem noni ei njap ningot can ba, muhwi mem bed nisimnaibrimigcan ei ari bingwam ningot ningai ba, muhwindacan ei nijam di noni sima ei ig bui nsi leu su.

³²Ewil-Merodakh ningon nggriu sut Yoyakhin lene bindei ba, ninyeng jei njiriek nibou ndig nindigsi di isima bit noni ei ingkiaisi ei minu Babel.

³³Nibou ndig ce tut ba, Yoyakhin juk sinsun ig bui leu no leu api cigit noni kui nide ig leu binhyepo yem njita bit noni kikau ug bipek niyaijo ningwig honti. Noni kwas mitiei kin mun di Yoyakhin suar nya hagom tut noni.