Read Hatam NIBWOS-BWOS NYENTI 1 Bible Online

NIBWOS-BWOS NYENTI 1 - Hatam bible

NIBWOS-BWOS NYENTI 1

¹Minu ndig Yerusalem di nipou yo timiei nya illei bibor lo, tini bu ne nok mpia ntus ba, mpia mbum-bra bibor cem. Nipou yo ne ninyeng jei ei ngkiai nya igyai him noro nogindini wer kibom. Minu ndig di nipou yo ikon ninyeng dima tini bu ne wer awak tu.

²Ningon ngguk bipim mmun jei lene niyai nggwei kibor bisilipti ningyoi. Nisut bat di ningon kieti nya inang leu su ba, hi di joi sut gwam ser ningon bi. Nisut bat nya yaham imbuk kep noni ba, iba nitok bak cem.

³Timiei minu Yehuda nya ikes ide minu ei su lewo ide siceu nya yuubon yok nok awak bikes niwei-nidut ei yok dip.[1] Tini bu ne ibong srig ngkiai nya ikieti ei mpia di biyai nibong kei nigwam keisi hi biyok bi. Siceu igyon ttai yok leu api bit bon ingwes ngun kan bi.

⁴Hi di kwei ei TUHAN De Ig ei njap nindig nya bu bi o! Sop gwam nitta pilei nya di ipai kep doia nya yuum niwei-nidut ei sirima o! Lene imam nya cem inso-nso nyen o! Tungwa hi gwam kui dimbou pmem nuhui nya bu bi lewo ningon nggukti jun kep minu ndig Sion tu o!

⁵Siceu nya iba ide nisindemti boom kep noni tu o! TUHAN bindei ba, noni tug ndei ninghuisi wei drek dip nide sisar di nindig bibor! Ikat timiei nya bisima ug ei ingkiaisi tu o!

⁶Minu ndig Yerusalem ninyeng di jei ei nijam gi pini jug pror leu no tu o! Nibou nya inghuisi jet bidem kep rusa di nggum bibor pimo tu o! Isindem mem gima ibindei timek siceu di yuhuk yok bi o!

⁷Niabiati minu ndig Yerusalem lus tu ba, tug ndei niwei-nidut leu lene timiei nya ikan-kan nyen tut nijam gi nipou di ima ndigban nindig yo pima o! Tirigi timiei nya icut ei siceu indati lene hi di kwei mpu yok bi o! Yo di ihwen yok nya ingat ig dima nittiti lene ipa ndip yok drek dip o!

⁸Minu ndig Yerusalem ba nirom birus nonti tug hon gi bon sisar di kinei bibor mang-mang o! Yo di nipou yo ibou cut binoni yahagom ingat ningat nguti lene iba ighyet bicig! Minu ndig dima nso-nso nyen lewo gwam nimmaiti o!

⁹Nimap di kui noti jo nibreisi kei lo, gihig ningon ei mun di micut igkep no ei nidipti ug bi! Noni nggek bitti nindig bibor lo, hi di gwam ser ningon bi o! Gima rino hara TUHAN bingondut no lewo siceu nya ibindei timek no tu o!

¹⁰Siceu di ibindei timek no ipos nide ndigban ningwig tu o! Nok gima cem noni ngat gi siceu nya icoi ug ei TUHAN De Ig bou niyai him o! Gima ne niyai munti gom di TUHAN ggai ser ngkiai nya tut rin o!

¹¹Timiei nya iba ninso-nso nyenti binggok njita o! Iba ide ndigban di nibok kak pima biluei njita ba, iboom inghop leu binhyepo imai inggum bi o! Minu ndig Yerusalem hara nok tungwatu bipai “TUHAN e, angat da ba, angig ayai kep da tut ditde ninghuisi wei hagom ug e!”

¹²“Je di jikriau da kak puigsi nya e, jingat bijiyok ngon kep da o![2] Hi dima yai niwei-nidut nindig bibor di ditug ndei nogindini bi! TUHAN kes ninghuisi wei dini ei da dip drek dip nigga biborti o!

¹³Noni bindei juk hum leu mpia-bbed him kwei biyem kikau ug ei dingon bei! Noni com bon ser bei doho bei apino bon srou da di dicut o! Leu api Noni sindui sut ba, ditug ndei ninghuisi wei bidangkom ei njap jei o!

¹⁴Noni mbus ditde sisar nya hagom keyam leu api ngot kin yam binok gom lene ba gima bisrou dikimam apino gima buhun tak da di dinghuisi jet tut o! TUHAN kes da ei siceu nya indati apino bit bon dibindei timek yok kan bi o!

¹⁵TUHAN ngat ditde tentara di mimbri kui ingkek nya nok yo di ibon inyeng bi o! Noni njei tentara ngkiai kwei leu binhyepo bindei ba, ditde pinai pilei nya yahagom isar ningwig o! Noni co kep ditde timiei nya ninyen ba, inem-nnai bidem kep ba anggur ngat di tungwatu nya ikimut o!

¹⁶Gima rino bindei di diyai nggwei kibor didiyam lo, hi di kwei gwam ser dingon ba, yai ningon lleisi bida bi o! Siceu inyeng tak kep ditde timiei nya apino ide mun di imati hagom pror bingwig leu yok o!

¹⁷Disu dinda bak tungwatu bidinggiuk huk yok lo, hi di kwei mpu da bi o! TUHAN pinak siceu leu nima kwei-nima kwei bikwei kon pran bit da o! Yoni ibibon da nok mumpiang di map kui ei ikieti o!

¹⁸Noro TUHAN ningon sren-srau! Dani rino ditunggwei sut Nide nicukti nya tu o! Je di ngkiai nya e, jimiap dihyet ba, jingat bipia dingat rin ei ninghuisi wei diniti o! Siceu nya ikat pinai pilei tde nya kin sop gwam nitta pilei tde nya bibindei ba, isima ei ingkiaisi tu o!

¹⁹Dijem tentara di itti kin da pima yok lo, yaham imbuk kep da o! Imam nya kin nibou mien nya yahagom inggok njita mem gima igyem bibahati tut igyaisi noro imai kak simpak bidem minu ndig dini tu o!

²⁰Na di TUHAN o! Angig ayai kep da tut gi dingon bos-bos nyen cem dingon kku da cem dingon mbris cem tut gi dinjiriek cem tut danti diyai mun tunggwei angon kanti nya nipou pima cem o! Siceu igyai nimai bak tungwatu bidem simpak bou hagom ba, itot nindigsi nya ei ig bei nsi bimai su o!

²¹Na di TUHAN o! Angig atingou mem dinso-nso nyenti leu hi di gwam ser dingon bi o! Siceu di ihwen da nya ingon kei kep da tut gino abindei da di duum mun di buhun o! Abindei ba, njap di apreu ei pima kwei su o! Gima rino ma abindei siceu cem bigyai niwei nidut noyam kin da ug o!

²²Ma angig ayai kep ide nibon munti di kinei dima hagom ba, aubon yoni cem noyam kin gi aubon dani drek dip sisar nyeng hagom di dibon tut Nani tu o! Duun-dicot nyen drek dip ditde ninghuisi wei ba, dingon ngguk bidiwer mindhe cem o!”