Read Hatam NIBWOS-BWOS NYENTI 2 Bible Online

NIBWOS-BWOS NYENTI 2 - Hatam bible

NIBWOS-BWOS NYENTI 2

¹TUHAN ba niggati biyai nibou tut bibindei ba, nidinditi jun nungug Sion o! Noni com minu Israel ninyeng di jei di kui sur mpia-bbed him ug ei dihyeisi tu o! Njap dima ne TUHAN gga bibor bikes Nide Ig ei nungug Sion bijo ei o!

²TUHAN ngondut yo po ibindei sar bikwop minu mien ei minu Yehuda hagom bi o! Noni ba Nide niggati bihwen tentara nibousi di igya coi nya di ibicuon minu dima hagom bilus ningwig o! Noni bindei timek nibou ndig nya bitut ide ninyeng tak kep limwati nya yahagom ei minu dima apino nimmai jun yok o!

³Noni ba niggati di cig-cai bidahat minu Israel de nisindemti o! Tirigi siceu ihwen nye lene Noni ba niyai ngat nye he ba, mpu nye bi o! TUHAN nigga yahagomti dem kep hum di ninjeng sindem bibor di cok tut mun nyeng hagom di sar hak ug o!

⁴Noni bon Nonti binok siceu lene kri Nide tibor nya hagom leu api ba ninggwenti binai hammi nye o! Noni yai nimai bak ide limwa di ipwoi nyeni ingon nya ningwig o! Noni pio niggati di dem kep hum kwei ei nye di nibong ei minu ndig Yerusalem dip o![3]

⁵TUHAN bon Nonti nok siceu bibui minu Israel kikau bitti o! Noni ya kep tentara nibousi di igya coi nibicuon niyaisi nya bitut ig nibou ndig cem ba, hagom timek ningwig lene biyai ningon ngguk biborti bijo ninno bak timiei minu Yehuda nya o!

⁶Noni bindei timek Nide Ig[4] di nok mpia di mem Nide limwa nya idem yam mem gima ikuk yok biNoni eisi o! Lene bindei ba, tungwatu ibbwe ser Njap Nigwam Kep Ninghuisi kin njap nindig nya o! Lewo TUHAN gga bibor ba, rok imam nya kin nibou ndig ei su o!

⁷TUHAN rok Nide nimbar hum dok di kwes ei leu ba, kes nonti Nide Ig ei su o! Noni sindui sut ba, siceu inggek ngug tig nya ba, lus ningwig o! Siceu imbos-hi-mbos ei mpia di nipou nikuk nye bak TUHAN binibon pesta eisi lewo yoom kep nye tu o!

⁸TUHAN kos tut ningon kanti bipia suar siceu nya inggek ngug tig di bikrop ttai Sion nya bilus ug o! Noni nai ngug tig nya leu binhyepo bindei timek hagom o! Nogindini ngug tig nya kin ig tentara di jo-jo yam dip nya timek biwer ig kum-kroi tu o!

⁹Ngug tig di lus dima dram dimbou pmem nya ba, mun di ibikibi dimbou nya dahat ningwig o! Nibou ndig kin yo di igya kui noni di inyeng tak kep limwa nya isima ug ei ingkiaisi o! Imam nya iba TUHAN de nicukti nya bingginau limwa nya bu bi o! TUHAN sindui sut ba, nabi nya ingat ningat-hi-ngat hi bu bi o!

¹⁰Ndigpoi ndig nya igwam bbwe ei dihyeiti ba, ikam dihyei ndung bikes ei ibou nggram himti lene ijuk sinsun kron di bindo tut ingon di ngguk o! Sop gwam nitta pilei ningat nya cem igwam biyuhuk bou lene iba ingwak bikik dihyei o!

¹¹Diyai dwoi lewo dipim bidihyet jo kikau ba, dinnei kinei-kinau leu ug o! Dingat timiei nya ei minu di cut dini cem dingat munggwom nya kin ningwoi-ngwoi nya di imai di imbris-bris nyen bidem simpak nya ei minu ndig dini cem apino dingon nem-nnai bingwig o!

¹²Iba ninghuisi di jet bipim biyahara njita kin minyei bak ipmem bat nya ba, idem kep yo di ibok-ba di itti-tti wai ei puigsi nya leu api imai ei ipmem bat nya imigsi ei o!

¹³Ayo! Na di minu ndig Yerusalem di minu ndig Sion di dingon ngakei e, ade ninggekti kui sur mpia bidem kep muk ndigsi o! Dipai mindei mem gima dibigwam ser angon e? Lewo minu ndig hi giyai ninghuisi wei noyam kin gi na di minu ndig Yerusalem ayai bi sren o! Jit o! Bit bon hi dima miwin nani hanyen kan bi sren o!

¹⁴Mun di nabi nya itri tut bina ne niris munti kin nisuglaisi ningkom he rin o! Igindo ade sisar ei nibreisi bi sren o. Gima rino bitig dino agittin ser ade sisar bi ug o! Noro itri tut nihyet nisuglai di brim angonti he o!

¹⁵Yo di yahagom di injiriek kep na nya ighyet wer mpiahi tut na lewo atimek titut yam tu o! Ikit ibou nyen leu bipai “Gima ne minu ndig di kei bibor kei di tungwatu dihyeisi dini hagom inggap leu rin e?”

¹⁶Ade siceu nya di ibindei timek na iba ingon di kinei sut na bitou kep aimasi ba, ibipa ndip na leu api yuhumpo bit na o! Ipai “Nibindei sar minu ndig dima tu o! Nijam di ibet ingon mem bijo ninno tu dima tau kep nye tu o!” Lene nok.

¹⁷TUHAN bindei ba, gi pai nihwen di nipou yo tin ei ningon kanti tut bisok kep nye tut pima kwei cut igkep nye tu o! Noni ba ningondut nye bisi bindei timek nye ba, ide siceu di imbuk tut nye ibindei timek nye tu o! Noni bindei ba, siceu nya igyai nillei tut gi ingat nyende nicutti bou igyai him o!

¹⁸Ngug tig ei minu ndig Yerusalem e, ma jahara bak TUHAN o! Jipim ba, jiyai nggwei kibor bibiam bidem minyei di biam mem mmun-njap o! Ma jikes jihyet au. Jipim kikau bibou jinghuisi mbris tut ug e o!

¹⁹Jikiju-kiju nyen mem mmun jei leu binhyepo jahara bak TUHAN ba, jipai jit mun di jo jingon bei hagom bak Noni. Jahara bak Noni leu binhyepo ngondut jimunggwom bat di ninggum hwen yok di imbris inggum bidem simpak nahau yamti nya ug o!

²⁰TUHAN e, angat yo di ayai niwei biyok dima ba, angig ayai kep yok ug o! Apo abibon yo di hiter noyam kin gi abibon yoniti dima tu e? Sop nya igyem yonti imunggwom bat di ingon ngakei yok nya o! Siceu nya igyai nimai bak imam kin nabi nya ei Ade Ig di kwes-kwau o!

²¹Ndigpoi nya kin munggwom pilei nya imai sinsiou ba, pinai pilei nya kin sop gwam nitta pilei nya imai tug hon singau simeda o! Njap dima ne ayai nimai biyok drek dip Ade nigga biborti rin o!

²²Anduk siceu di nittin kwei mem gima ibon pesta nisibut ttai nye o! Igyai nimai bak yo di nyeni ninyohou di ningon ngakei yok yahagom rin o! Hi di nang leu anda nsi mem Ade njap di agga bibor dima kan bi o!