Read Hatam NIBWOS-BWOS NYENTI 3 Bible Online

NIBWOS-BWOS NYENTI 3 - Hatam bible

NIBWOS-BWOS NYENTI 3

¹Dani ne no di cut ei niweiti lewo TUHAN niggati cut bitak kep da tu o!

²Noni rino kri da ug ei mpia di ting di dindi-kai o!

³Leu api bui-bui nyen da njap jei. Noni gingondut da bu bi o!

⁴Noni rino bindei bidingut bok ba, dibokti buhun lene dinjum nya cem dahat o!

⁵Leu api bindei ba, ningon nggukti kin niweisi nggai da o!

⁶Noni cuk da leu binhyepo duug gwam ei nidinditi noyam kin yo di imai ei nijam pini jug o!

⁷Noni rino ba lante di ngkiem biteu da apino bon puig hi mem gima dingwes ngun leu ninda nsi bi ug o!

⁸Dahara niwei-nidut bak TUHAN bimpu da lo, Noni kou sut gi miap dihyet lene,

⁹ba ngug tig nya bibigen ser ditde puig nyen-nyen o!

¹⁰Noni rino bet ningon mem da nok beruang ba, dem kep singa di tindei ser da cem o!

¹¹Leu api yon igkep da kikau ba, dikriek leu puig ug api ham-ham nyen da leu lene bikes da ei o!

¹²Leu api sror Nide tibor binai hammi da o!

¹³Noni rino prindei da ba, Nide tibor ndei dingon bitibim kikau dingutti tu o!

¹⁴Tungwatu nya yahagom ipa ndip da ba, iba ighyet bicig da njap jei o!

¹⁵Noni yai mun di mpo bibor bida ba, diyem gima kibon kep njita bididut gima kibon kep minyei o!

¹⁶Noni rino ba diimaisi binging dihyei lene ba dikwai bitug tig bitig dino dikwai dahat o!

¹⁷Dibong kei digwam kei bi mimbrek tu o! Dibbwe ser ningon nggei-hi-nggeisi tu o!

¹⁸Niyaijo mem nijam di jeisi hi jo bida bu bi ba, ditde niyok ningon mem TUHANti cut leu da tu o!

¹⁹Dikan-kan nyen tut ditde nijo-jo nyenti kin mun di cut igkep da lene dem kep nok diyem mun di mpo-mpam di kos dikimam o!

²⁰Dikan-kan nyen tut mun dima bijo kikau apino gima buhun tak dingon o!

²¹Mbro nok gima lo, ditde niyok ningon memti kiju hanyen tirigi diyok ngon kep mun nyeng gom bipia,

²²TUHAN de ningon ngakeisi jo kikau bijo mumpui lene nisingat tut nyeti ngwig hon nohonti bi sren,

²³noro jep-jau bikwop njap tekti bijo kikau! Ningat ne TUHAN ningon gom jit!

²⁴TUHAN ne ditde ndigban gom ngat di dingon ce bi rin! Gima rino diba dingon com Noni!

²⁵TUHAN singat tut yo di iba ingon com Noni kin yo di inggok tut Noni.

²⁶Gima rino nna ba nyeni yoom ingon bigwam nyahan bibou TUHAN kwei mpu nye ug e.

²⁷Nnaba ibingon tut noom ningonti tirigi ipilei yo dini.

²⁸Mpe dino TUHAN bindei ba, ninghuisi wei cut igkep nye lene ma ikimut yuhui bigwam nyahan.

²⁹Handei kon ba, yoom nyenti ingon bijo nyahan ba, icut biNoni hak ug leu mpaba TUHAN mimpu nye ei nidipti bu e?

³⁰Mbro nok gino siceu ittem nye bipai nye kinei lo, suar iba ibou coi sut gima yok hagom.

³¹Lewo TUHAN mirok nye bijo ninno bijo kikau bi.

³²Niabiati Noni yai ninghuisi wei binye leu lene mingondut nyeni yo. Lewo Noni ba ningon ngakeisi di ug hon nohonti bi bingon ngakei nye kikau.

³³Ningon ce tut mem gima sindui sut nye ba, itug ndei ninghuisi wei bi.

³⁴Tirigi siceu nya ibindei ba, nyeni ingon buhun ei isimati cem,

³⁵ipos nisindemti po TUHAN yai binye di inyeng tut pima bipror leu nye cem,

³⁶ico kep nikei nya ide nikos tutti di sren nya lo, ningat ne TUHAN kan tut bingig niyai kep tu.

³⁷Gino TUHAN kos tut ningon kanti tut mun nyeng hi bi lene bit bon tungwatu nya igyai mun di njiriek ningon kanti dima kan bi.

³⁸Mun di kei kin mun di kinei hacem ibindei mbut tug hon TUHAN nicukti.

³⁹Gino TUHAN kes hukum ei tungwagom dip drek dip nide sisar lene nggon rima no dima nso-nso nyen tut i?[5]

⁴⁰Jikwei ba, imbus nyenti ingonti bingat igyai munti nya leu ba, ittin ser ide sisar di ibon tut TUHAN Allah ei gwamti.

⁴¹Jikwei ba, iba ingonti titut yam bingat nadi bak TUHAN nok gini,

⁴²“TUHAN e, nibon sisar ba, niba nyende niyai munti bikiek nimig jou tut Na noro agikos ser sisar dima bi.

⁴³Ahuk nye ba, ayai nimai binye. Ade nigga biborti yon kep Ade ningondut nyeti.

⁴⁴Ade nigga biborti dem kep bumbuhui di ndok bibor. Apino bit bon nyende nadi tibim njiriek bihwou ndam Na kan bi a.

⁴⁵Abindei nye bininok mpia di icom kep mumpiang keyam eisi bou tungwatu dihyeisi dini hagom igyai him.

⁴⁶Nyende siceu nya ighyet kinei sut nye ba, ipa ndip nye.

⁴⁷Nuum mun di buhun ba, mun di bindei timek nye cut igkep nye. Mun di bindei ba, ningon ttin bibor cem ninghuisi mpig sut cem tau kep nye bikwop njap ngwa hagom.

⁴⁸Diyai nggwei biam bidem minyei drek dip ditde mben di itimek tu.

⁴⁹Midipim kikau ba, dikes dihyet hon bi,

⁵⁰bibou Na di TUHAN ei gwamti angig ayai kep nye ug e.

⁵¹Tirigi dingat notou nyende siceu nya ibibon sop timiei ngot di ingat rin ei nyende minu ndig lene dingon ngguk tut yok.

⁵²Siceu yuhuk da noyam kin gi yuhuk ha. Ingon kinei sut da mikui-kausi he.

⁵³Icom da tut diyaisi ug ei jui minyei bousi di minyei pingge leu. Leu api iba tig mma nindak gom bikibou kep nuhui hanyen ser da.

⁵⁴Minyei sindi kui ba, ut bipek dibou bidikan bigya ‘Siyaijo ngwig hon ug ri!’

⁵⁵TUHAN e, dahara biNani ei jui minyei bousi di jut bibor dima nijou bidipai bipia,

⁵⁶amiap dihyet o! Dahara Nani leu binhyepo ata kep atingou leu dihyet di dahara Na tut au. Noro ma ampu da o!

⁵⁷Lene amiap ditde nadi leu api akwei dideu da ba, apai ‘Adigit tut au.’

⁵⁸TUHAN e, akiju tut ditde munhyet ba, ateu da bidingwes ngun tu.

⁵⁹TUHAN e, ma akwam munhyet gau da lewo angat siceu nya di ibon mun kinei tut da.

⁶⁰Ingon sibui sut da ba, igyok ingon gom mem da tu.

⁶¹Na di TUHAN amiap ide nihyet nitigut dati ba, akan tut ide niyok nihyet mem yamti di itin ei mem da.

⁶²Ibohom dat dinghapti njap jei mem gima ikinei sut da bitin ei ingon kanti di kinei bibor.

⁶³Iba da bilor yam leu njap tekti kikau bipek mmun kep.

⁶⁴TUHAN e, ma akes hukum ei yok dip dem igbit ide nibon munti nya.

⁶⁵Ma asigion yok ba, asindui sut yok bigyaijo ei ningon di cut leuti ug e.

⁶⁶Ma ahuk yo dima ba, abindei sar yok kikau bibou acok tut yahagom leu dihyei njek dip dini ug e.