Read Hatam NIBWOS-BWOS NYENTI 4 Bible Online

NIBWOS-BWOS NYENTI 4 - Hatam bible

NIBWOS-BWOS NYENTI 4

¹Mas pimbai di jimjit kei pima pimber tu o! Tig di ibingot TUHAN De Ig pima cut biyem mpia ei simpak o!

²Nipou yo ne pinai pilei minu ndig Sion nya idem kep mas di nibok kak o! Noro tini bu ne siceu nya yuubon yok nok dibijig di iba igtuyap bibon he o!

³Lo, nsien bigbehei yai nido bak nimien nya noro ditde limwa nya isibut bibor bidem kep ha unta di mbuk tut nide nimien nya lewo sindui sut nidinggwei bijo ei iggum ndigsi o!

⁴Bit bon ditde limwa nya igyai ido ngei bak munggwom ngwoi nya kan bi apino munggwom nya imai inggobiau ug o! Itindei hiter indati tut njita bigyem lo, hi di yai njita biyok bi ug o!

⁵Yo di igyem kep njita di mmau kei nya di ibong kei igwam kei dor njiriek hiter ei nipou su pima nya tini bu ne ijei-jei nyen binggok njita ei mpia di icom kep mumpiang keyam eisi leu api ibimai inggum ei puig sinon bidem simpak nya o!

⁶ TUHAN kes hukum di buhun bibor ei ditde limwa nya dip dor njiriek timiei minu ndig Sodom di TUHAN Nonti bindei timek yok kros dem kep igyai mpau di bingmai mbigom he. Mun di buhun dima cut igkep yok tug hon tungwatu igyai munti nya bi o!

⁷Nipou yo ne nyende nibou nya[6] ipwoi kei bidem binggum tiei di pwoi-pwau o! Ingut ndig ngat. Mimbri kui ingkek ba, isindem bibor cem inghuisi kwes kei o!

⁸Noro tini bu ne iimaisi rom bibor dor njiriek hum ngum niromti ba, irok kui mpia nyen lo, hi gingat igbit yok bi o! Ingkek njui-juau ba, inggang bai bikinei-kinau bidem kep biei di tok-tau o!

⁹Yo dima icut ei nikineiti ba, inyohou tug ndei nimai poi mien bijo kep yok kikau lewo ide njita hi bi bibor o! Yo di igyai nimai didiyam tug hon nikon pranti nya itug ndei mun di kei dor njiriek yo di imai inggum nya o!

¹⁰ Mun di buhun di cut igkep ditde limwa nya buhun bibor apino sop ndig di isingat kei sut imunggwom bat nya ikwen yonti imunggwom bat nya bigyem kep inghop di wam bibor ug o!

¹¹TUHAN kes Nide nigga biborti di cig-cai biyem minu Ndig Sion bijjem sur dihyei njek dip hak ug su o!

¹²Nibou ndig nya kin ide limwa nya di ingat rin ei dihyeisi dini hi kan bigya bit bon hi dima hwen timiei minu ndig Yerusalem nya binggek dimbou pmem nya bicoi ug ei minu ndig dima kan bi o!

¹³Noro mun dima cut igkep yok drek dip imam nya kin nabi nya ide sisar o! Lewo yoni isiber yo di ingon ngun nya inggrom tu o!

¹⁴Nibou mien nya ei minu ndig Yerusalem idem kep no di niyai tu di tibap-tibap nyen kak simpak nya o! Nimbiam nggrom rus sinsun di ide nya apino tungwatu nya ikou sut gima ingget yok o!

¹⁵Hi mbrua ser yok “Juug leu mpia dini! Ma jingget da au lewo map kui je tu o!” Apino yuug leu mpia dima ba, ibong-bong nyen bidem ngkiai nya ide minu o! Noro timiei minu dima hi di ya um yok bicigit yok kui ig bi ug o!

¹⁶TUHAN yok ngon kep Nide limwa nya bu bi o! Nonti rino bindei di intek gimahap bidem minu o! Nonti rino bindei di imam nya ibon inyeng bu bi ba, hi di ngondut nibou nya bi o!

¹⁷Nicem kep ser puig kikau biniyai mpo. Nibet ningon mem yo di mikwei mpu nye noro hi gi kwei mpu nye bi ug o! Niba ningon com mben hi di mimpu nye lo, mben dima yok hi bon mun nyeng di bahati tut nye bi sren o!

¹⁸Gimbun nehei binimbut kak simpak kan bi. Leu gino nehei leu lene siceu inyohou tou kep nye kikau o! Nyende njap ningwig honti dideu kwei su ba, nyende njap mingwig leu nye ug rin o!

¹⁹Yo di igyon igkep nye imbut sindem bibor ba, ide nimbut sindemti dor njiriek ha krubri nidwopti cem o! Igyon igkep nye ei nungug him kin iggum ndigsi o!

²⁰Ikat TUHAN de nibou ndig di Nonti dimig ei su[7] ba, no dima ne no di nyeni niba ningon com nok no di mibindei ba, nibong kei nigwam kei ba, no di minyohou nye leu siceu di ihwen bit nye inda nsi cem rin o!

²¹Je di mben Edom kin mben Us e, tirigi bon nituti mem je lene ma jingon llei bibor hak ug o! Mun di buhun micut igkep jeni cem lewo jibou ngwak sibui sut mun di pu je ba, mun dima biyai ningat nguti bijenti rin o!

²²Jikan bipia Sion tug ndei hukum drek dip sisar di bon nya tu noro nogindini TUHAN misindui sut nye ei bi ba, micom nye ug ei ningkiaisi bu bi. Noro TUHAN mikes hukum ei na di Edom dip! Noni mihit ade sisar nya bijo nibreisi!