Read Hatam YEHEZKIEL 10 Bible Online

YEHEZKIEL 10 - Hatam bible

YEHEZKIEL 10

¹ Leu api dikiek da bidicap ug ei niban di jo anai kerub[8] dima yok dip bidingat mun di dem kep banggo mbrei di iba tig nilam bibon.

² Leu api Allah pai bak no di juk sinsun linen “Acoi ug ei kroba nimig ninghau di jo kerub dima yok nibehei ikieti ba, akam hum bom ei anda bia bei leu api agimahap hum mbom dima ug ei minu ndig dini dip.” No dima bit nihyet biditou kep noni nggilun.

³Tirigi noni coi lene kerub dima yok ingat rin ei TUHAN De Ig ei nite bei mpia nibiho. Bumbuhui nggop gom kieng kep mpia di jo bas hak ei ninsi di jo TUHAN De Ig pima lene bikieng kep Ig dima titut yam.

⁴Nipigati di piga mpia kei di bindo tut TUHAN di ningat rin ei mpia dima piga mpia ei kerub dima yok igyati bipri ug ei dimbou hui di ibicoi TUHAN De Ig. Apino nipigati dima piga mpia kei ei mpia di jo bas hak ei TUHAN De Ig.

⁵Kerub dima yok inyehei di tittem nibimbiti tibim kikau ug ei mpia di jo bas hak ei nisai ma kwei. Dimiap lo, gima dem kep nok Allah Di Sindem Bibor nihyet.

⁶Tirigi Allah cuk no di juk sinsun linen bikam hum mbom ei ninda bia bei kwei leu kroba nimig ninghau di jo kerub dima yok nibehei nikieti lene no dima ug biya simin kroba nimig ninghau dima yok gom.

⁷Leu api kerub gom di srig kerub dima yok ikieti su ninda ei hum di jo ei kroba nimig ninghau ikieti bikam hum bom poi biyai bak no di juk sinsun linen. Noni yai hum bom dima leu kerub nindati buug sut.

⁸Dingat lo, mun di dem kep tungwatu nda no jo bei kerub dima yok gom-gom ninyehei behei.

⁹ Dingat lo, kroba nimig ninghau bitai jo simiak kerub dima yok hagom ba, kroba nimig ninghau gom jo simiak kerub ningat gom bidingat lo, kroba nimig ninghau dima sieng-siau kei bikei bibor dem kep nok tig permata.

¹⁰Dingat lo, bikwop kroba nimig ninghau bitai dima bon kroba nimig ninghau gom kin bu di jo jiti ei ninggimau yon.

¹¹Kroba nimig ninghau dima bindei ba, kerub dima yok imbut ndam inggangti nite hi nite hi cem ba, ibiho kin ijjai cem hagom. Dem mem imbut nok gom biyuug ei mpia di ijoi sut hak bikiek-kiek nyen yonti ingut bi.

¹² Igyai njep mang bibor kieng kep ingut titut yam kin intig bou kin inda kin inyehei kin ide kroba nimig ninghau nya hagom cem.

¹³Dimiap lo, hi ndat kroba nimig ninghau dima yok ninyeng “Hou di nimig ten bibor di sibui didiyam.”

¹⁴ Bikwop kerub dima ibon iimaisi bitai di ter leu yam. Niimaisi gi nigom dem kep sapi banteng niimaisi. Gi nican dem kep tungwatu niimaisi. Gi niningai dem kep singa niimaisi. Lene gi nibitai dem kep ha krubri niimaisi.

¹⁵Kerub dima yok ripo nipou yo dingat ei Minyei Pmem Kebar nipimat pima. Lene ipri bikui ug ei anai.

¹⁶Gino kerub dima yok imbut nyen lene kroba nimig ninghau dima yok cem mbut nyen simin yok. Gino kerub dima yok ikon inyehei mem gima ipri bimba leu dihyei njek dip lene kroba nimig ninghau dima yok cem kui leu dihyei ninjek dip.

¹⁷Gino kerub dima yok igya igyati lene kroba nimig ninghau dima yok cem ya niyati lewo kerub dima yok ibie bisindem tut yok.

¹⁸Leu api nipigati di piga kei di bindo tut TUHAN di ningat rin ei mpia dima kiju leu dimbou hui di ibicoi ug ei TUHAN De Ig dima pri biya anai ei kerub dima yok dip.

¹⁹Dingat lo, kerub dima yok ikon inyehei ba, idimba leu dihyei njek dip ba, yuug lene kroba nimig ninghau dima yok cem bit yok. Leu api yuug ya simin dimbou pmem nuhui di jo nite bei mpia nipriti ei TUHAN De Ig lo, nipigati di piga kei jo kikau ei anai yoni dip.

²⁰Diyok ngon kep bipia gima ne kerub nya di nipou yo dingat yok ei Allah Israel nibehei ei Minyei Pmem Kebar nipimat pima ri.

²¹Bikwop kerub dima yok gom-gom bon niimaisi bitai ba, bon ninyehei bitai cem. Mun di dem kep tungwatu nda ntun inyehei behei nya.

²²Iimaisi nya[9] cem noyam kin kerub nya di dingat ei Minyei Pmem Kebar nipimat pima iimaisi. Ba, bikwop kerub dima gom-gom mbut hallu ndam bei noho bei.