Read Hatam YEHEZKIEL 11 Bible Online

YEHEZKIEL 11 - Hatam bible

YEHEZKIEL 11

¹Leu api Allah Ninnei kon da bibuwak da ug ei dimbou pmem di jo ei nite bei mpia nipriti ei TUHAN De Ig. Dingat lo, ibou nyatungwagom muhwi ingat rin ei sirima. Lene dingat mben Israel ide nibou nya ibou can di igya hak ei ikieti. Nibou cin dima inyeng rino Yaazanya di Azur nipmot kin Pelaca di Benaya nipmot.

²Allah pai bida “Na di tungwatu di ayaijo kikau bi e, yo dini ne yo di itin ei ingon kanti di kinei bibor ei minu ndig dini rin ba, ipingokti bindei srawir tungwatu nya.

³Yoni ipai “Jei bi ne niwin ig dini yok hanyen bu.[10] Minu ndig dini nok yeng dihyei di iba igtuyap bibon ba, nyeni inok mikwau nghui di jo ninsi a. Nyeni mibong kei migwam kei lewo yeng dihyei dima mingkiem ser nye leu hum di cig-cai yo.”

⁴Gima rino na di tungwatu di ayaijo kikau bi e, ma atri tut Ditde nisok nihyetti tut hukum di micut igkep yoni biyok.”

⁵Leu api Allah Ninnei ya kui da lene TUHAN cuk da bidipai bak limwa mben Israel nya “Je di mben Israel e, dikan tut mun di jipai biyam kin mun di jitin ei jingon kanti tut tu.

⁶Jiyai nimai bak yo di imang bibor ei minu ndig dini tu apino puig hagom mpung tut nimbiam ngut a.

⁷Gima rino Da di TUHAN Di Dinyeng Jei Bibor dipai bije bipia ningat ne minu ndig dini ne yeng dihyei pima rin lo, mikwau nghui di jo ninsi ne jeni rin bi. Noro yo di jiyai nimai biyok nya ingut rino joti a! Midicom je leu minu ndig dini!

⁸Jittin tut singau simeda e? Midicuk yo di ikrau singau simeda kwei ba, icoi bihwen jeni.

⁹Midibuwak je leu minu ndig dini bidikes je bak ngkiai nya lewo dijem nimai gau je tu.

¹⁰Mijimai ei pranti ei jide minu leu api tungwatu nya yahagom mikan tut bipia Dani ne TUHAN ri.

¹¹Ba, mijibong kei jigwam kei ei minu ndig dini ba, jidem kep mikwau nghui di jo ei yeng dihyei pimati bi. Miduhuk je bidikes hukum ei je dip ei mpia di jingat rin eisi ei minu Israel.

¹²Mijikan tut bipia Dani ne TUHAN rin ba, dikes hukum ei je dip drek dip gi jipigau Ditde nidimigsi nya ba, jiba jikou yai Ditde nicukti nya leu lene jibit ngkiai nya di ibong ttai je nya ide niggai serti nya.”

¹³Tirigi ditri tut nihyet dima lene Pelaca cut bimai kros hak. Leu api diba dibiau bicom mpia bidahara “Aye! TUHAN Di Ninyeng Jei Bibor e! Ma ayai nimai bak mben Israel niken dini yahagom ug e?”

¹⁴Lene TUHAN pai bida bu,

¹⁵“Na di tungwatu di ayaijo kikau bi e, timiei minu ndig Yerusalem nya no isimbot kep tut nani kin asut bat di jingat rin ei jingkiaisi a. Ipai biyam ‘Dem mem yo di isima ei ingkiaisi ikuk yok bak Allah ei Nide Ig kan bi. Lewo ingat rin ei minu ting bibor leu minu ndig Yerusalem. Ningat ne TUHAN yai dihyei Israel binye tu.’

¹⁶Ipai nok lo, ma atri tut Ditde nisokti dini bak asut bat nya di ingat rin ei ingkiaisi bipia Dani rino dicom yok ting bibor ug ei ngkiai nya ikieti ba, dibindei bintek gimahap ug ei minu dima yok. Noro dingat rin bit yok mem nijam di ingat rin ei ingkiaisi.

¹⁷Gima rino ma apai biyok Da di TUHAN Di Dinyeng Jei Bibor dipai bipia midinduk yok kwei leu minu di intek ug eisi nya hagom ba, diba yo bicom yam hanyen. Leu api dingkwei dihyei Israel bak yoni hanyen.

¹⁸Tirigi ingkwei hanyen lene suar icom kwar di ikuk yok bak di igyai kou ningat di kinei bibor nya hagom.

¹⁹ Midiyai ningon di nijep kin nikan-kan nyenti di nijep biyok. Diyai ingon di ndok di dem kep tig leu yok lene diba ningon di bit dihyetti biluei bu.

²⁰Leu api yoni iba ingon di gom bibit didimigsi kin dicukti nya hagom. Yoni minok Ditde limwa nya lene dinok ide Allah.

²¹Noro midikes hukum ei yo di iba yoho rok nikuk no bak kwar nya dip lewo kwar dima yok kinei bibor ba, igyai kou ningat a. Gima hagom drek dip ibon munti di kinei bibor.” TUHAN Di Sindem Bibor simbot dat tu.

²² Kerub dima yok ikon inyehei bidimba lene kroba nimig ninghau nya cem idimba bit yok. Nipigati di piga mpia kei di bindo tut Allah Israel ningat no jo anai yok dip.

²³Leu api nipigati dima kes minu ndig Yerusalem leu lene pri ug ei nungug him ei minu ndig dima nite bei mpia nipriti.

²⁴Tirigi dingat ningat-hi-ngat dima lene Allah Ninnei buwak da bingkwei da hanyen bikes da bak yo di ibong ei ingkiaisi ei minu Babel leu api ningat-hi-ngat dima pren leu da,

²⁵bidipui sut mun di TUHAN ndo bida nya hagom bak Nide limwa di isima ei ingkiaisi nya.