Read Hatam YEHEZKIEL 12 Bible Online

YEHEZKIEL 12 - Hatam bible

YEHEZKIEL 12

¹TUHAN mbrap bit da hanyen bu bipai,

² “Na di tungwatu di ayaijo kikau bi e, abong ei yo di yaham imbuk kep Allah tu nya ikieti. Ibon igyai noro igingat mpia bi. Ibon itingou noro igimiap mun cem bi. Lewo yaham imbuk kep Da kikau.

³Gima rino na di tungwatu di ayaijo kikau bi e, ma acat ndigban ade nya keyam ei sre nghas di nindig gomti mem njap noyam kin no di tungwatu nya icom no nibon kepti bou yahagom igyai him. Ambut leu abongti ug ei mpia ttou nsi hiter bu noyam kin no di icom ug ei ningkiaisi cem bou yahagom igyai him. Mpaba yo di yaham imbuk kep Da mingon huk niti bipia nani tereu nok no di tungwatu nya icom ug ei ningkiaisi ri.

⁴Nipou tirigi mmun bigyo lene abindei hei ndigban ade bou yahagom igyai him ba, ahei sut leu ade ig di abong niti noyam kin no di tungwatu nya icom ug ei ningkiaisi. Ma asindui sut ba, yahagom ingat ambutti bou igyai him.

⁵Atu mihye gom ei dring tigti bou igyai him leu api attei buwang ade di ndigban ade joti nya ba, abehei sut kak mihyeti dima.

⁶Akon buwang tut ndigban ade nya ei anghat dip ba, ambut tut mem mmun di dindi-kai. Anggai ser ayai leu binhyepo angat puig di ambut kak bi. Nna ba mben Israel yahagom ingat mun di abon dima yok hagom bou igyai him. Ayai gima yok hagom nok mun di bisok kep ingonti ba, igyok ngon kep.”

⁷Leu api diyai igbit TUHAN nicuk dati. Njap dima lene dicat ditde ndigban nya kui buwang gom noyam kin no di bong-bong nyen bidem minu pimo. Mmun tu rino diba dinda bibek tig leu mihyeti ei ditde dring tigti dideu ditde ig leu api dehei kak mihyeti dima. Dikon buwang ei dinghat dip bidimbut tut bou yahagom igyai him ba, ingat tu.

⁸Njapti kui lene TUHAN pai bida,

⁹“Na di tungwatu di ayaijo kikau bi e, mben Israel di yaham imbuk kep Da ihig ser na tut mun di abon kep dima.

¹⁰Gima rino ma atri tut mun di Da di TUHAN Di Dinyeng Jei Bibor dipai sut biyok. Disokti dini mem nibou ndig di ningat rin ei minu ndig Yerusalem kin timiei di ibong ei minu ndig dima yahagom.

¹¹Ma apai sut biyok bipia mun di abon dima ne abingon mingon tut mun di micut igkep yok lewo inok yo di itug ndei nicom yok ug ei ingkiaisi cem yo di isima cem nya ri.

¹²Ide nibou ndig mikon nide buwang ei ninghat dip bimbut tut mem mmun di dindi-kai. Tungwatu nya mitu mihye ei dring tigti mem nibou ndig leu binhyepo hei kak mihyeti dima. Noni nggai ser niyai apino ngat puig di mbut kak bi a.

¹³ Noro midicom Ditde jala ser leu api dibikat noni. Leu api midicom noni ug ei minu Babel. Noni mimai ei sirima leu ba, ngat nitimieisi di nang leu bu bi sren.

¹⁴Yo di yahagom di ibong bit nibou ndig ei nide ig bitut yo di ipingok kep ningonti kin yo di igya ser noni pijum midibindei yo dini bintek gimahap nima ug-nima ug. Miduhuk yok bidiyai nimai biyok.

¹⁵Mpe dino dibindei bintek gimahap ug ei ngkiai nya ikieti lene yoni mikan tut bipia Dani ne TUHAN ri.

¹⁶Midisindui sut ibou poi he bingwes ngun leu pran kin ninggum kin nsuwer ajar cem leu binhyepo ingon huk niti tut ide nibon munti di kinei bibor nya ei ngkiai nya ikieti. Yoni mipai jit bipia Dani ne TUHAN ri.”

¹⁷Lene TUHAN pai bida,

¹⁸“Na di tungwatu di ayaijo kikau bi e, ma adigit-digoi ei mpe di ayem njita. Lene ma ade nittinti bindei ba, aji kibi-kibou yam tut mpe di adut minyei.

¹⁹Ma atri tut nihyet di Da di TUHAN Di Dinyeng Jei Bibor dipai bak timiei minu ndig Yerusalem di ibong ser ide ig nya. Yoni midigit-digoi ei mpe di igyem njita ba, nittinti mihwen yok ba, iji kibi-kibou yam ei mpe di idut minyei. Ide dihyei ngoi-nga lewo yo di yahagom di ibong ei minu dima ipigau Ditde nikos tutti nya bijo kikau tu.

²⁰Siceu nya mibindei timek minu ndig di mpung tut timiei nya hagom ba, miai di ide nya miwer iggum ndigsi. Leu api yoni mikan tut bipia Dani ne TUHAN ri.”

²¹Lene TUHAN pai bida,

²²“Na di tungwatu di ayaijo kikau bi e, nggon rino mben Israel ijoi sut indat kep nihyet nibiti nindati dini nyen-nyen i? Ipai ‘Nijam luei nijam sindam noro mun di itri tut bipia mipek kep ei nidipti bu dima pek kep bi.’

²³Nogindini ma atri tut biyok bipia Da di TUHAN Di Dinyeng Jei Bibor dibuhup: Mididip tut nihyet nibiti nindati dima. Apino indat kep gima ei Israel bu bi. Ma apai biyok bipia nihyet di biluei nihyet dima bu pai biyok bipia nijam tau ba, nimbot kepti nya sindi pek kep tu.

²⁴Ningat-hi-ngat kin nimbot kepti di nitrowai hi mijo ei minu Israel bu bi.

²⁵Da di TUHAN Di Dinyeng Jei Bibor dimbrap bit mben Israel bu ba, mun di dipai nya hagom micut igkep yok ba, miditum dingon tut gima bu bi. Je di nimpung naham nimbuk kep Allah e, ma jingig jitingou mem! Dibindei mbut mun nyeng hagom di disok kep je tut nya mem nijam di jiyaijo yo dini. Da di TUHAN Di Dinyeng Jei Bibor disimbot dat tu.”

²⁶Lene TUHAN pai bida,

²⁷“Na di tungwatu di ayaijo kikau bi e, mben Israel ikan bipia mimbrek-mimbrek ei nidipti bu dima kwei ne ade ningat-hi-ngat kin ade nimbot kepti nya dima mipek kep ri.

²⁸Gima rino ma apai biyok bipia Da di TUHAN Di Dinyeng Jei Bibor dipai bipia mun di dipai nya hagom micut igkep yok ba, miditum dingon tut bu bi sren. Da di TUHAN Di Dinyeng Jei Bibor disimbot dat tu.”