Read Hatam YEHEZKIEL 16 Bible Online

YEHEZKIEL 16 - Hatam bible

YEHEZKIEL 16

²“Na di tungwatu di ayaijo kikau bi e, ma ando minu ndig Yerusalem nibon munti di kinei bibor di bon tu nya bak.”

³TUHAN Di Ninyeng Jei Bibor cuk da leu binhyepo ditri tut nisok ei da dip dini bak minu ndig Yerusalem “Na di minu ndig Yerusalem e, asrek ei minu Kanaan. Acig mben Amori. Lene apmem mben Het.[12]

⁴Mpe di asrekti lene hi di kos abrum leu cem krau na ba, akek minyeiti cem ba nsim bidip[13] na cem ba sre nghas binggai na cem bi.

⁵Hi di ngondut na leu dima bon mun dima yok mem na ugwai cem bi. Mpe di asrek lene hi gingondut na bi. Noro icom na hak ei miaisi.

⁶Leu api dimbut ei mpia dima bidingat na dino atoi anggrom di ut-ut nyen ei lo, disindui sut ba, amai bi.

⁷Dinek na ba, andig nok njita kioi di nnum kei. Ba, andig didiyam cem anghuisi kwes cem anghuisi llei cem ba, awer na sop gwam nitta pilei ndig cem. Ba, ado mbuk lene abou nta cem bijei noro ajou hangwang.

⁸Tirigi dimbut ei mpia dima bu lene dingat lo, ade njap dem mem gima apai pinai tu. Diba Ditde sinsun ndok di jei bijuk na ser ade ningat nguti dima. Dipreu ei bina tut Ditde ningon ngakei nati. Gima igbit rin ba, dibon nipreu sut niwak yamti bit na. Ba, Ditde nani tu. Da di TUHAN Di Dinyeng Jei Bibor disimbot dat tu.

⁹Duug tau minyei ba, dibipiap anggrom leu angkek dip bidiba mini zaitun bidip.

¹⁰Leu api dijuk sinsun sop di ibien he kin srop di iba mindhe ngkek di nggriu-nggrop kei bibon kin mun nibingot nibou di iba minghas linen binap kin sinsun ndok sutra di jei di cut di gwam amig ggom di leu sutra ei nati.

¹¹Diba tig permata kin mbrawin kin srak nya bimau na.

¹²Diba srak mien bimau ahwap jou lene diyai mitingou him kin topi di nibou ndig de di kei bibor cem bina.

¹³Aba mas kin perak bimau na ba, ajuk sinsun di iba minghas linen kin minghas sutra bibien he. Lene ayem roti di iba tepun di kei bibor kei bikang kin ahwei lon kin mini zaitun. Ade nuubbuti bibor he ba, awer na nok nibou ndig nitnem hi ri.

¹⁴Ngkiai nya yahagom ikon anyeng tut ade nuubbuti di ubbu ngat dima. Lewo Dani rino dibindei di anok sop ubbu ngat. Da di TUHAN Di Dinyeng Jei Bibor disimbot dat tu.

¹⁵Noro aba ade nuubbuti kin anyeng di jei dima bibon mun tunggwei tirigi ajou pinai di icem kep na nya yahagom.

¹⁶Aba ade sinsun bihi bimau mpia di akuk na bak kwar nya eisi. Anok sop sundal di yai nonti bak pinai nya yahagom leu binhyepo cut tut yok.

¹⁷Aba mas kin perak di diyai bina bibon kwar di noyam kin pinai nya leu api acut tut yok.

¹⁸Ajuk sinsun di iba mong di nggriu-nggrop kei bibien di diyai bina ei kwar dima yoti. Lene aba mini zaitun kin biei nggrai di ui-gwang kei di diyai bina bikuk na bak.

¹⁹Diyai njita nok tepun di kei bibor kei kin ahwei lon kin mini zaitun di pimbai kei bina. Noro aba gima yok hagom bikuk na bak kwar nya leu binhyepo abipwoi ingona. Da di TUHAN Di Dinyeng Jei Bibor disimbot dat tu.

²⁰Leu api abui amunggwom bat pinai nya kin sop nya ba, andig yok ei nimbar hum dokti leu api abikuk na bak kwar nya. Ade ningon gom tut da bisi dima dem mem nani bi e?

²¹Suar ma ayai dimunggwom bat nya cem ba, abui yok ba, andig yok ei nimbar hum dokti mem abikuk na bak kwar pima yok e?

²²Tirigi ayai bram sop sundal niyai munti di bindei di igyai ttin lene agikan kep tirigi po amien yo po ajou hangwang cem atoi anggrom di ut-ut nyen ei pima poi mien cem bi e?”

²³TUHAN Di Ninyeng Jei Bibor pai “Buhun bibor mem nani! Buhun bibor jit! Abon mun di kinei dima yok hagom,

²⁴leu api awin mpia di mem akuk na bak kwar nya eisi ba, acut tut pinai nya eisi bidem minu ndig nya cem simin puig nghas hagom cem.

²⁵Nanti abindei kinei ade nuubbuti. Aba nanti angut bitigtai pinai nya yahagom di icem kep na apino ayem njita tut yok bijo kikau.

²⁶Minu Mesir di ningat rin simin na di ningon priti nindig bibor dima ne awak ba, abibong tu ri. Abisinggre mem gima abibon Ditde niggati tug hon nicut tut pinaisi nya.

²⁷Nogindini diyai dibou tut na bidikes hukum ei na dip bidipos mun di kei di dikwas tut na cem leu na. Dibikes na ei mben Filistin di ingon kinei sut na di ingon him wei sut ade nibon munti di kinei bibor dima indati.

²⁸Noro angon gicut hon bigyo. Gima rino ajop-jop nyen mben Asyur ba, abon nanti nok ide sop sundal. Noro ibindei ba, angon cut hon yoni cem bi.

²⁹Leu api anok mben Babel di inok nitri-nipek mun cig nya ide sop sundal bu. Noro ibindei ba, angon cut hon yoni cem bi.”

³⁰TUHAN Di Ninyeng Jei pai “Abon munti dima yok hagom dem kep sop sundal di bit bon kan tut nimmai sut nonti kan bi.

³¹Awin mpia di jo simin puig nghas hagom ei minu ndig nya mem abikuk na bak kwar nya eisi. Noro nani ne sop sundal nitu di suar mitiei he bi ri.

³²Adem kep sop wak cam di kiek nimig jou tut nijjep ba, ayai pri kep pinai hiter nya.

³³Pinai di icut tut sop mmun nya iba mitiei bigo yok. Noro ayai nok gima bi. Nani rino akwas mun di kei tut pinai nya di abou buwei kep yok. Aba mitiei bihwen ingon leu binhyepo ikwei leu nima kwei-nima kwei bicut tut na.

³⁴Nani ne sop sundal di mipbor ngat ri. Hi bidip huk na mem gima jiyem njita tut yam lo, go na bi ba, nanti ago gau nanti. Ningat ne nani ne sop sundal di titer leu sop sundal nindigsi nya.”

³⁵Na di sop sundal minu ndig Yerusalem e, angig atingou mem mun di TUHAN Di Ninyeng Jei Bibor simbot dat a.

³⁶TUHAN Di Ninyeng Jei Bibor pai “Ajuk ade sinsun leu na ba, ajou hangwang binok sop sundal ba, akes angut bak pinai di abou buwei kep yok nya kin ade kwar di akuk na bak nya di bindei ba, tungwatu nya igyai ttin dima tu. Abui amunggwom bat nya ba, andig yok ei nimbar hum dokti ba, abikuk na bak kwar nya tu.

³⁷Gima rino midinduk pinai di abou buwei kep yok nya kin ade di angon kinei sut yok nya cem yahagom keyam. Ba, yahagom igya ttai na leu api mijuk sinsun ade nya hagom leu na bitou kep ajo risti.

³⁸Midikes hukum ei na dip drek dip ade nicut tut pinaisi nya kin ade niyai nimai bak tungwatu nyati di abon nya. Midiba dingon di sibui kin digga biborti bikes hukum nimai ei na dip.

³⁹Midikes na ei asut bat di abou buwei kep yok pima indati ba, yoni minggek ade mpia di jicut tut yam eisi kin gi akuk na bak kwar nya eisi nya. Yoni mipos ade sinsun nya kin ade mimau di abimau na hagom leu na ba, ajo ris hak ei.

⁴⁰Yoni micuk tungwatu imang bibor ba, iba tig bihwen na. Lene iba singau simeda bidigo-digo nyen angut cem.

⁴¹Indig ade ig nya hagom lene induk sop nya kwei mem gima ingat hukum di cut igkep na bou igyai him. Tug hon nisinati dima lene dibindei ade nicut tut pinai nyati bikes hon apino ma akwas mun di kei tut pinai di abou buwei kep yok nya bu bi.

⁴²Gima leu api Ditde niggati micut ba, dingon jo nyahan hanyen bu. Midigga bidingon kinei sut na cem bu bi.

⁴³Dikes hukum ei na dip lewo agiyok ngon kep mpe di po apilei yo po dingondut na pima bi. Abindei ba, digga na tut ade nibon munti di kinei bibor nya. Nggon rino akum ei ade nibon munti nya di bindei di igyai ttin ningat dima yok bu tug hon ade niyem njita tut hiter nijjep i? Da di TUHAN Di Dinyeng Jei Bibor disimbot dat tu.”

⁴⁴TUHAN pai “Minu ndig Yerusalem e, tungwatu nya miba nihyet nibiti nindati dini bipai nani ‘Nipmisop dat nipmemti.’

⁴⁵Ningat ne apmem nipmisop rino nani. Ningon kinei sut nonti nijjep kin nimunggwom bat nya. Adat ade adig-ajoi nisop nya di ingon kinei sut ijjep bat nya kin imunggwom bat nyati. Nani kin ade adig-ajoi di inok minu ndig di jo ttai na nya ipmem rino mben Het lene icig rino mben Amori.

⁴⁶Akindig rino minu ndig Samaria ei nite bei mpia nijjai bitut nide minu mien nya. Akinjoi rino minu ndig Sodom ei nite bei mpia nibiho bitut nide minu mien nya.

⁴⁷Angon cut hon gino aco bram icoti ba, ayai bram igyaisi di bindei ba, igyai ttin ningat dima e? Angon cut hon bigyo! Jei bi ne ayai munti nya kinei bibor dor njiriek yo dima igyai munti bu.

⁴⁸Deheng bitug hon Da di Allah di diyaijo kin Allah Di Dinyeng Jei Bibor dinyeng bipia akinjoi minu ndig Sodom ya tut nide minu mien nya bibon mun kinei bibor noyam kin nani kin ade minu mien nya jibon munti dima bigyo.

⁴⁹Minu ndig Sodom ya tut nide minu mien nya bikon yonti lewo ide njita di jo mem yok nya ne nindig bibor. Ibong nyahan ba, ibong kei igwam kei cem. Noro igingondut nuhwap mbum nya kin nikinei-kinau nya bi.

⁵⁰Ikon yonti ba, ingkek ndok lene ibon kep mun di dingon mpo tut nya. Gima rino dibindei timek yoni nok gi angat tu.

⁵¹Ningat ne minu ndig Samaria bon mun di kinei bibor lo, nide sisar di bon nya noyam kin ade sisar di abon nya bi. Abon mun di kinei bibor dor njiriek leu ade sop adig-ajoi cin dima bu. Ade nibon munti di kinei bibor dima bindei ba, ade sop adig-ajoi cin dima ingon ngun bou tungwatu nya igyai him ba, ikei dor njiriek na.

⁵²Gino ibinai ade adig-ajoi nya kin nani lene dem kep nok yoni igyai mun tunggwei hi bi. Suar ammai sut nanti ba, abisrip huk nanti nok nikinei-kinau.”

⁵³TUHAN pai bak minu ndig Yerusalem “Midibindei ba, minu ndig Sodom kin Samaria bitut ide minu mien nya mibong kei migwam kei hanyen. Gima leu api dibindei ba, nani cem abong kei agwam kei hanyen.

⁵⁴Tug hon nisinati dima lene ammai sut nanti. Lene anyeng di kinei dima mibindo ide nibong kei nigwam keisi bak ade adig-ajoi pima yok bu.

⁵⁵Yoni migya tut ide minu mien nya bibong kei bigwam kei hanyen bu. Lene bitut nani kin ade minu mien nya cem.

⁵⁶Nipou yo tirigi akon nanti pima ne apa ndip minu ndig Sodom lo,

⁵⁷ade nibon munti di kinei jo nibreisi ba, hi kan tut bigyo. Noro tini bu ne nani cem noyam kin noni. Mben Edom kin Filistin kin yo di ibong dideu na nindigsi di ingon kinei sut na nya ipa ndip na nyen.

⁵⁸Suar atug ndei ninghuisi wei drek dip ade nibon munti di rom kin ade nibon munti di bindei ba, igyai ttin ningat nya dima. Da di TUHAN disimbot dat tu.”

⁵⁹TUHAN Di Ninyeng Jei Bibor pai “Midibibon na bit leu ade nibon munti nya. Lewo aba angha bak ade nehengti ba, abitunggwei Ditde nipreu ei mem nati cem.

⁶⁰Noro diyok ngon kep nipreu di dipreu ei bit na mpe di apilei yo. Gima rino midibibon gi preu di jo ninno bijo kikau bit na.

⁶¹Gino abisrip huk ade nibon munti nya lene ma ammai sut nanti ei mpe di dingkwei ade adig-ajoi nya hanyen kwei ndam na. Dibindei ba, yoni inok amunggwom bat nya. Mbro nok gino mun dima jo ei Ditde gi preu di dipreu ei bit nati bi lo, midibon nok gima.

⁶²Midibon gi preu nijep bit na apino akan tut bipia Dani ne TUHAN ri.

⁶³Midikos ser ade nitunggweisi nya hagom. Noro bit bon abbwe ser gima yok bi ba, ahap aji ba, apai jit ade nitunggweisi nya cem kan bi. Da di TUHAN Di Dinyeng Jei Bibor disimbot dat tu.”