Read Hatam YEHEZKIEL 17 Bible Online

YEHEZKIEL 17 - Hatam bible

YEHEZKIEL 17

¹Lene TUHAN pai bida,

²“Na di tungwatu di ayaijo kikau bi e, ma apui sut nihyet nibiti nindati,

³di Da di TUHAN Di Dinyeng Jei Bibor dipai mem yok tut ha krubri di nindig bibor ningut gom di bon ninta kei-kau-kei ba, ninyehei nyan ba, sindem cem. Ha dima kon ninyehei bidimba ug ei nungug him ei minu Libanon bikot biei buom gom ninggrupti,

⁴leu api ttei bikes ei minu ndig di nok nitri-nipek mun bousi di mpung tut nitri-nipek mun cig nya.

⁵Leu api ug yai biei kioi di nimon yo gom ei dihyei Israel bita hanyen ei ninnumti di minyei dem.

⁶Biei kioi dima dem ba anggur kioi di hei kin dihyei lo, ninda di ugwa-kwei kieng ei dihyei dima ba, ninda su buug ninno. Lene ninda hagom su ndam ha krubri pima niteu eisi ba, nigau com ug ei dihyeiti bingkiem apino nggrou kei.

⁷Leu lene ha krubri di nindig krop hiter bu no rinaha ba, ninyehei nta nyan bindok cem. Leu api biei anggur dima su nigau nya kin ninda nya ndam ha krubri hiter bu dima lewo ba ningon com bipia ha dima miyai minyei mang bibor bak bidor njiriek leu minyei di jo miaisi dima.[14]

⁸Lo, ha krubri gi nipou pima ta biei anggur dima ei dihyei di nnum kei di bon minyei yaisi mangti tu. Apino ba anggur nimeng nggrou ba, ningat hun tut biwer ba anggur di kei cem.

⁹Leu api Da di TUHAN Di Dinyeng Jei Bibor dihig ser bipia ba anggur dima hei bingun-ngau cem binindig nut ug e? Ha krubri gi nigom pima mohom tut nigau nya cem mikikam ningat cem midahat ninda nya lene misindui sut biei anggur dima bimbriong bi e? Ningat ne isuar tungwatu imang bibor bitut ide nisindemti kin mben di mimbri kui ingkek mem gima yohom ba anggur dima tut nigau nya bi.

¹⁰Ningat ne biei dima ya bingkiem lo, mehei kikau ba, bindig nut ug e? Gino hou mpia nipriti kuisi lene mimbriong bi e? Mimui ei niyati di ha krubri gi nigom nita eisi pima bi e?”

¹¹Lene TUHAN pai bida,

¹² “Ahig ser naham nimbuk kep Allahti di nijit cig dima yok bipia ingon huk niti tut nihyet nibiti nindati dima e? Apai biyok bipia nibou ndig minu Babel kwei ei minu ndig Yerusalem bikat nibou ndig Yehuda bitut yo di igya kui noni di ibong ei minu ndig dima yahagom buug sut ug ei minu Babel tu.

¹³Leu api noni dimig tungwagom leu nibou ndig minu Yehuda de adig-ajoi nya bipreu ei mem noni bicuk noni leu binhyepo ba neheng bipreu ei bipia miba ningon gom bibit nibou ndig nihyet. Leu api nibou ndig dima kat yo di inyeng jei nya bibuwak yok ug ba, isima

¹⁴ser nhyema timiei Yehuda nya miyaham imbuk kep noni hanyen bi. Noni yai nok gima cem leu binhyepo mun di ipreu ei bit yam micut igbit nijam.

¹⁵Noro nibou ndig minu Yehuda kiek nimig jou tut nibou ndig minu Babel bisok nihyet bak mben Mesir mem gima bitug ndei kuda kin tentara Mesir nya imang bibor. Ningon kanti dima mipek kep e? Nibou ndig minu Babel misindui sut ba, nibou ndig minu Yehuda ningwes ngun e? Dem tut gima noni ngkwei leu nipreu ei mem nibou ndig minu Babelti pima bi ba, ningwes ngun leu gitug ndei hukum cem bi!

¹⁶Deheng bitug hon Da di Allah di niyaijo kin Da di TUHAN Di Dinyeng Jei Bibor dinyeng bipia nibou ndig minu Yehuda muug mai ei minu Babel. Lewo njiriek nehengti kin nipreusi di noni preu ei mem nibou ndig minu Babel di kon noni bigwam nok nibou ndig ei banggo mbrei ninyeng tak kepti dima dip tu a.

¹⁷Bit bon nimpung tentara Mesir di mipbor ngat dima yok misindem mem gima iteu noni leu tentara Babel di injei kwei di ibon dihyei nindenti di injei bikui sur ngug tig nidip kin gi itig got di bikrop ttai mem gima igyai nimai bak nitok nya imang bibor dima ninda nsi kan bi.

¹⁸Gima drek dip gi nibou ndig minu Yehuda di pigau nehengti kin nipreu ei mem nibou ndig minu Babelti pima ri. Gima rino bit bon noni nang ba, hallu leu nide siceu nya inda nsi kan bi.

¹⁹Deheng bitug hon Da di TUHAN Di Dinyeng Jei Bibor dinyeng bipia midikes hukum ei nibou ndig minu Yehuda dip lewo noni pigau nipreu ei mem nibou ndig minu Babelti tu. Noni heng bitug hon dinyeng mem gima yai mun bicim tindei nipreu eisi noro tug hon gima bi.

²⁰Midicom jala ser ba, dibikat noni. Dibuwak noni ug ei minu Babel bidikes hukum ei noni dip ei mpia dima lewo noni ba ningon di gom bibit dihyet bi.

²¹Nide tentara di mipbor ngat nya yahagom mimai ei pranti. Lene gi inang di ihallu ug nya mintek gimahap nima ug-nima ug bidem minu. Leu api Ditde limwa nya mikan tut bipia Da di TUHAN disimbot dat tu.”

²²TUHAN Di Ninyeng Jei Bibor pai “Mididahat buom di jei bibor ninggrupti leu api didahat ninda di krop hi. Midita ninda dima ei nungug di kui sur bumbuhui nijun kepti,

²³di nok nungug di jo anai bibor ei minu Israel. Ninda dima mehei ei sirima bingat ningat cem. Leu api nok buom di kei bibor di ya ngkiem cem. Ha nyeng hagom mitot yaham ei niti biteu ei ninda behei cem.

²⁴Biei nindigsi nya ei minu dima hagom mingon huk niti bipia Dani ne TUHAN ri. Diwim biei di jei ndig nya lene dibindei ba, biei mon nya hei bijei ndig. Dibindei biei di ngun-ngau nya mui bingak-cai lene dibindei ba, biei di mui nya nikioi tug hanyen ba, bimahan kep. Da di TUHAN disimbot dat tu ba, mun di dipai nya hagom mipek kep.”