Read Hatam YEHEZKIEL 20 Bible Online

YEHEZKIEL 20 - Hatam bible

YEHEZKIEL 20

¹Nijam di nibong ei ningkiaisi dima ug ei ari bingwam gi nimuhwindacan ei njap gi nisimnai mem bed gi nimuhwi leu api nibou di ibie tut mben Israel ibou poi ikwei hig ser da tut Allah ningon kanti mem yok. Tirigi ikwei gwam ei doho bei,

²lene dimiap TUHAN nihyet di pai bida,

³“Na di tungwatu di ayaijo kikau bi e, ambrap bit nibou dima yok ba, apai biyok bipia Da di TUHAN Di Dinyeng Jei Bibor dipai ‘Jikwei brim jingkek bibor ba, jahara Da mem gima dindo dingon kanti bijeni e? Dipai tug hon Da di Allah di niyaijo dinyeng bipia midice tut gi jahara Da tut dingon kanti mem je bi! Da di TUHAN Di Dinyeng Jei Bibor disimbot dat tu.’

⁴Na di tungwatu di ayaijo kikau bi e, atin ei mem gima ambus yo dini ingonti tu e? Gi nok ne ma ambus ingonti hak ug! Apingok ingonti leu binhyepo igyok ngon kep mun di suwok bibor di idigup bat-idigai bat nya ibon nya.

⁵ Atri tut dihyet di dipai biyok. Tirigi didimig mben Israel ei lene dipreu ei mem yok. Dindo Danti biyok ei minu Mesir bidibipai biyok bipia ‘Dani ne ide TUHAN Allah ri.’

⁶Mpe dima lene diba neheng bipai bipia midibuwak yok kwei leu minu Mesir ndam minu gom di dimig ei mem yok. Minu dima bon ninnumti di kei kin dihyei di kei bibor kei dor njiriek minu nindigsi ei dihyeisi dini hagom.

⁷Dicuk yok ba, suar icom kwar di suwok bibor di ijoi sut kei di icem kep di ikuk yok bak dima. Diggai ser yok leu binhyepo ibindei ba, map kui yokti tug hon gi ikuk yok bak mben Mesir ide kwar nya bu au. Lewo Dani ne ide TUHAN Allah ri.

⁸Noro yaham imbuk kep Da ba, igimiap dihyet bi. Ikou sut gima icom kwar di suwok bibor di ikuk yok bak dima lene ibikes hon gi ikuk yok bak mben Mesir ide kwar cem. Mpe dino ingat rin ei minu Mesir ne ditin ei mem gima dikes Ditde niggati ei yok dip.

⁹Lo, digiyai nok ditin eisi mem yok dima bi. Leu binhyepo mben Mesir di ibong ei minu di Ditde limwa nya ibong eisi dima ighyet kinei sut dinyeng bi. Lewo dipai bak Ditde limwa nya ei mben Mesir dima yahagom yoho bei bipia midibuwak yok biyehei leu minu Mesir.

¹⁰Leu api dibuwak yok biyehei leu minu Mesir bimbut bei iggum ndigsi.

¹¹ Lene diyai Ditde nicukti nya biyok ba, dingginau yok tut Ditde niggai serti nya di suar ice tut bibit lewo yo di ice tut bibit nya migyaijo ba, ide njap jei.

¹² Dicuk yok leu binhyepo igyok ngon kep Njap Nigwam Kep Ninghuisi di bindo tut gi preu di dipreu ei mem yok. Lewo gima bisok kep yok leu binhyepo igyok ngon kep bipia Da di TUHAN didimig yok pijum ei mem Da.

¹³ Noro tirigi ingat rin ei iggum ndigsi ne yaham imbuk kep Da. Itunggwei Ditde nicukti nya birok Ditde niggai serti nya di bindei ba, yo di ice tut bibit nya igyaijo ba, ide njap jei. Ibindei ba, map kui Njap Nigwam Kep Ninghuisi bibor. Gima rino ditin ei mem gima dikes Ditde nigga biborti ei yok dip ba, dibindei sar yok cem ei iggum ndigsi.

¹⁴Lo, diyai nok gi ditin ei memti dima bi drek dip Ditde ninyeng jeisi. Leu binhyepo mben di ingat gi dibuwak yok kwei leu minu Mesir ipai dinyeng kinei bi.

¹⁵ Gima rino tirigi ingat rin ei iggum ndigsi ne diba neheng bipai kep yok bipia midibuwak yok ba, icoi ug ei dihyei di bon ninnumti di kei kin dihyei di kei bibor kei dor njiriek minu nindigsi ei dihyeisi dini hagom di ditin ei mem yok tu pima bi.

¹⁶Diba neheng dima bipai kep yok lewo iba ikou yai Ditde nicukti nya ba, itunggwei diggai serti nya bibindei ba, map kui Njap Nigwam Kep Ninghuisi cem. Iba yoho rok nikuk no bak ide kwar nya dor njiriek gi ikuk yok biDa.

¹⁷Noro niabiati bu ne dingondut yok. Apino diyai nimai biyok ei iggum ndigsi di wer iggum dima bi a.

¹⁸Noro dipingok ei pilei di ingat rin ei ikieti nya ingonti bidipai ‘Ma jibit nidimigsi nya di jidigup bat-jidigai bat nya ibon ei su nya bijiyai bram igyai kepti nya cem au. Ma jibindei ba, map kui jeti tug hon gi jikuk je bak jidigup bat-jidigai bat nya ide kwar di ikuk yok bak nya au.

¹⁹Jide TUHAN Allah riDani. Ma jibit Ditde niggai serti nya kin dicukti nya.

²⁰Ma jinggei sut Njap Nigwam Kep Ninghuisi di nok mun di bindo tut ide nipreu ei biyamti di bindei ba, jibiyok ngon kep bipia jide TUHAN Allah riDani.’

²¹Noro pilei nya ei nijam dima cem yaham imbuk kep Da. Itunggwei Ditde nikos tutti nya ba, iba ikou yai Ditde nicukti nya di dem mem yo di ice tut ibit nya igyai niyaijo ba, ide njap jei cem. Ibindei ba, map kui Njap Nigwam Kep Ninghuisi bibor. Gima rino ditin ei mem dikes Ditde nigga biborti ei yok dip ei iggum ndigsi dima ba, dibiyai nimai bak yahagom.

²²Noro diyai nok gi ditin ei mem yokti dima bi ser nhyema ngkiai nya di ingat gi dibuwak mben Israel kwei leu minu Mesir ipai dinyeng kinei bi.

²³ Gima rino tirigi ingat rin ei iggum ndigsi ne diba neheng bipai kep yok bipia midibindei ntek gimahap yok bibong bidem dihyeisi dini nisurti-nipekti.

²⁴Lewo iba ikou yai Ditde nicukti nya ba, itunggwei diggai serti nya cem lene ibindei ba, map kui Njap Nigwam Kep Ninghuisi ba, ikuk yok bak kwar di idigup bat-idigai bat nya ikuk yok bak nya bijo kikau cem tu.

²⁵Niabiati bu lene diyai niggai serti di kei bi kin nicukti di bit bon yai niyaijo biyok kan bi nya biyok.

²⁶Disindui sut ba, ibindei bimap kui yokti tug hon ide midut di indig ei nimbar hum dokti nya. Ba, ibui ide munggwom pinai mighumbou nya bindig yok ei nimbar hum dokti bak ide kwar di ikuk yok bak nya. Dikes hukum ei yok dip tug hon nisinati dima leu binhyepo ikan tut bipia Ide TUHAN riDani.

²⁷Gima rino na di tungwatu di ayaijo kikau bi e, ma atri tut mun di Da di TUHAN Di Dinyeng Jei Bibor dipai bak mben Israel. Gini ne bindo hiter di bindo tut notou jidigup bat-jidigai bat nya ighyet tigut Da ba, iba ingon gom bibit Da bi ri.

²⁸Mpe dino dibuwak yok kwei ei minu di dipreu ei mem yok dini leu api ingat mbigdip di anai nya kin biei di nimeng nggrou nya lene ibon midut nindig mindhe-ndhe ei nimbar hum dokti mem ide kwar di ikuk yok bak ei mpia dima yok. Ibindei ba, digga yok drek dip ide midut dima yok kin anggur di ikwas tut kwar nya di ikuk yok bak.

²⁹Dihig ser yok bipia mpia di jo anai mindei rino icem kep dima i? Apino indat kep mpia pima yok inyeng ‘Mpia di jo anai nya’.[15]

³⁰Gima rino ma atri tut mun di Da di TUHAN Di Dinyeng Jei Bibor dipai biyok ‘Nggon rino jibon sisar noyam kin gi jidigup bat-jidigai bat nya ibon kep pima i? Nggon rino jikuk je bak kwar di bindei ba, tungwatu nya igyai ttin ningat pima noyam kin jidigup bat-jidigai bat nya pima i?

³¹Jibindei ba, map kui jeti tug hon midut nikwas mun tut Da kin midut nindig jimunggwom bat nya ei nimbar hum dokti bak kwar di jikuk je bak cem kikau kwei bipek njap di ammani kep. Leu api jibrim jingkek kep da bijihig ser Da tut dingon kanti mem jeni e? Dipai tug hon Da di Allah di niyaijo kin TUHAN Di Ninyeng Jei Bibor dinyeng bipia midice tut gima jahara da bidindo puig bije bi.

³²Jibindei jenti ba, jinoyam kin ngkiai nya kin timiei minu hiter nya di ikuk yok bak biei kin tig. Noro jingon kanti dima mipek kep mem je bi sren.’ ”

³³“Disok kep jeni tug hon Da di Allah di niyaijo kin TUHAN Di Dinyeng Jei Bibor dinyeng bipia midiba dinda di sindem bibor kin dihyet di singga bidinyeng tak kep je drek dip Ditde nigga biborti.

³⁴Midindo Ditde nisindemti brei bou jiyai him tirigi diba je bicom yam ba, dibuwak je bijingkwei hanyen leu ngkiai nya ikieti ei minu hagom di dibindei bijintek gimahap eisi nya.

³⁵Leu api midibuwak je ug ei ‘Iggum ndigsi Di Ngkiai Nya Ide’.[16] Dani kin jeni iba yoho rok yam ei sirima leu api midigwam nok nikei di mbus jingonti.

³⁶Ba, gima noyam kin gi po dibibon jidigup bat-jidigai bat nya ei Iggum Ndigsi Sinai. Da di TUHAN Di Dinyeng Jei Bibor disimbot dat tu.

³⁷Midiwit huk je sindem bibor leu binhyepo jibit Ditde nipreu ei mem jeti.

³⁸Midimbus nihwen mun cig nya kin nisibut cig nya leu jikieti bidibuwak yok biyehei leu ingkiaisi di nogindini ibong niti nya lo, midisindui sut yok bingkwei hanyen ug ei itimieisi di Israel bi. Leu api mijikan tut bipia Dani ne TUHAN ri.”

³⁹TUHAN Di Ninyeng Jei Bibor pai “Je di mben Israel e, nnaba jiyai mun bit leu jingon kanti. Ma jibindei mbut nibon kep sisarti hak tug hon gi juug kuk je bak kwar hak ug! Noro ma jiyok ngon kep bipia niabiati bu ne mijibit dihyet. Ma jikwas munkwas tut jide kwar di jikuk je bak dima ba, jibindei dinyeng di kwes-kwau bikinei bu au.

⁴⁰Lewo je di mben Israel jahagom mijikuk je biDa ei dihyei Israel kin Ditde nungug dip di kwes cem.[17] Midingon kei sut jeni ei sirima bidijoi sut jide midut nindig mindhe-ndhe nya ei nimbar hum dokti nya kin jide munkwas di kei bibor nya kin jide mun di jiyai pijum biDa nya.

⁴¹Niabiati bu tirigi dibuwak je kwei leu minu di dibindei ntek gimahap je ug eisi nya tu ne midiba je bicom yam. Midijoi sut jide midut nindig mindhe-ndhe ei nimbar hum dokti nya. Leu api ngkiai nya yahagom mikan tut bipia Da dini ne Allah Di Kwes-Kwau ri.

⁴²Tirigi dibuwak je hanyen kwei ei jidihyei ei minu Israel di dipreu sut bak jidigup bat-jidigai bat nya leu api jikan tut bipia Dani ne TUHAN ri.

⁴³Mijibisrip tut jide nibon munti di igyai kou ningat nya ei sirima hagom di bindei di map kui jeti nya. Apino jide nibisrip tut nibon munti gi nipou dima mibiyai ningon him wei sut bije drek dip.

⁴⁴Mpe dino dibibon je nok gima mem gima dibicuon Ditde ninyeng jeisi ba, dibibon je bit leu jiyai munti di suwok kin jibon munti di kinei bibor nya bi ne mijikan tut bipia Dani ne TUHAN ri. Da di TUHAN Di Dinyeng Jei Bibor disimbot dat tu.”

⁴⁵Lene TUHAN pai bida,

⁴⁶“Na di tungwatu di ayaijo kikau bi e, akiek na ba, angat nite bei mpia nibiho. Ma apai kep dihyei ninda biho ba, asinsam baham ei hanjop nsi dima.

⁴⁷Acuk baham dima bimiap kep mun di Da di TUHAN Di Dinyeng Jei Bibor dipai bak ‘Angig atingou mem dihyet! Miditin hum di njeng ba, hum dima miyem biei di jo bina nya bingwig bitut biei nimui cem ningun cem hagom. Bit bon tungwa hi dima mu hum di ninjeng cig-cai dima kan bi. Hum dima midwim mpiati ei mpia nibiho kikau ug ei mpia nijjai ba, nidut-yemti mipijuk yahagom.

⁴⁸Yoni mingon huk niti bipia Da di TUHAN rino dibindei di hum dima njeng a. Lene bit bon tungwa hi dima sindem mem gima mu hum dima kan bi.’ ”

⁴⁹Noro da di Yehezkiel dindo dingon buhunti bidipai “TUHAN Di Ninyeng Jei Bibor e, ma acuk da biditri tut nihyet dima au! Yahagom inso-nso nyen tut da drek dip gi diba nihyet nibiti nindati he bitri tut nihyet apino nggruk bibor mem gima ingon huk niti a.”