Read Hatam YEHEZKIEL 23 Bible Online

YEHEZKIEL 23 - Hatam bible

YEHEZKIEL 23

²“Na di tungwatu di ayaijo kikau bi e, sop ibou can di ikindig bat-ikinjoi bat yam ingat ri.

³Mpe di ipilei yo ne ibong ei minu Mesir ba, ide nipilei ngatti cut leu yok ei minu dima leu api ibon munti nok sop di krar igkei.

⁴Gi mighumbou ninyeng rino Ohola di bindo tut Samaria. Nikinjoi ninyeng rino Oholiba di bindo tut minu ndig Yerusalem. Diwak yahacem lene isrek tut munggwom biDa.

⁵Mbro nok gino Ohola nok ditnem tu lo, bon mun nok sop krar bijo kikau. Lene ba noho rok nikrar kep nisut bat di mben Asyur nya.

⁶Yo dima ne tentara di ijuk sinsun nghei nta kin pinjoi ndig nya kin nibou tentara di ibri kuda kan nya rin ba, iimaisi ubbu ngat.

⁷Ohola ya kin pinjoi ndig dima yok ba, ningon pri kep yok bibor. Gima bindei bimap kui noti tug hon gi kuk no bak ide kwar nya.

⁸Noni yai kep midyai sop krar dima bijo kikau noyam kin gi bon ei minu Mesir nipou po nide nipilei ngatti cut leu no bigyo pima. Yo dima ijou noni ba, ibibon noni nok sop krar habiei leu nimien yo kwei su.

⁹Gima rino dikes noni ei nisut bat di mben Asyur di ingon pri kep yok bibor dima inda nsi.

¹⁰Mben Asyur iba yo yai noni bijuk sinsun leu noni apino ya tut nijou hangwangti. Leu api iba singau simeda biyai nimai bak lene ibipos nimunggwom bat nya cem. Niyai munti dima bindei ba, nimpung sop nya ipui kep ninghapti tirima-tirima.

¹¹Mbro nok gino nikinjoi Oholiba ngat mun di cut igkep nikindig tu lo, ningon kui bibor tut gi cut tut pinai nya dor njiriek Ohola niyaisi.

¹²Oholiba cem ningon pri kep mben Asyur bibor hak ug. Yo dima ne tentara pinai pilei di ubbu ngat di ibri kuda kan nya kin pinjoi ndig nya kin nibou di inyeng jei nya kin tentara di ijuk sinsun ningwoi-nghei nta ri.

¹³Dingat lo, Oholiba dima ne krar bibor noyam kin nikindig cem.

¹⁴Oholiba nikrarti kum eisi kikau. Ningon pri kep pinai ingwes di ikilis ei dring tigti kin mben Babel ingwes di iba cet ngwoi di dem ninggrom bihwen.

¹⁵Nikilisti dima yok hagom bindo tut nibou tentara Babel tut mun di kei-kau di ibikri kep intig bou kin minghas di nyan di ibingot ibou nggram him ri.

¹⁶Tirigi Oholiba ngat yo dima ingwes lene ningon pri kep bibor bipinak srat nibijem tentara dima yok kwei leu minu Babel ba,

¹⁷ijou noni. Ibibon noni kinei apino noni bikou ser yok.

¹⁸Gima leu api noni yai bram sop krar niyai munti brei bibindo ningat nguti nyen brei bou tungwatu nya igyai him. Tirigi dingat noni lene dingon him wei sut noyam kin gi po dingon him wei sut nikindig cem.

¹⁹Noni cut tut pinai nyen-nyen bijo noyam kin mpe di pilei po wer no sop krar ei minu Mesir pima cem.

²⁰Ningon pri kep pinaisi nya kum eisi lene nikrarti dima bindei ba, pinai nya ide ningon kui kep noti dem kep nok kuda nikre ningon kuisi ba, ningon pri kep yokti bibor he. (

²¹Oholiba e, ningat ne ajoi sut ayai bram ayai kepti di kinei di abon mem apileisi mpe di po pinai Mesir nya ikrau ado biyoom-om nyen pima hanyen.)”

²²TUHAN Di Ninyeng Jei Bibor pai “Oholiba e, angon kou angon kieti nya tu. Noro midipingok ei ingonti leu binhyepo igga na bigyon ttai na.

²³Midinduk yok keyam kwei leu minu Babel kin Pekod kin Soa kin Koa kin Asyur kin mben Kaldea kwei bingwig kep na. Dibuwak pinai pilei po ubbu ngat pima di inyeng jei nya kin pinjoi ndig nya kin yo di ibon inyeng nya kin nibou tentara di ibri kuda kan nya kwei bingwig kep na.

²⁴Yo dima minjei sut tentara nindig kin kroba pran kin kroba di pian ndigban di bahati tut yok nya hagom leu nite bei mpia nijjai kwei mem gima ihwen nani. Yoni miba ide mun di ibipukep tibor ninggwenti nya kin topi yeng ngkuong bicuon ser igyaisi nya ba, ibiyon ttai na. Midisindui sut yok ba, imbus angonti bit leu yonti ide niggai serti nya.

²⁵Digga nani. Gima rino midisindui sut yok ba, iba ide nisibutti bibibon nani hak bikos ahwap kin atingou meng leu lene ibindig amunggwom bat nya tut igyai-yaisi ei humti.

²⁶Yoni mibindei ba, ajou hangwang leu api mipos ade mimau nya hagom.

²⁷Tug hon nisinati dima midibindei ba, akes hon ade nikrar kepti kin ade nicut tut pinaisi nya di abon habiei mpe di po angat rin ei minu Mesir pima hagom. Aba angon com kwar di tungwatu nya ikuk yok bak ba, ayok ngon kep minu Mesir cem bu bi.”

²⁸TUHAN Di Ninyeng Jei Bibor pai “Midikes na ei yo di angon kou ningat yok di angon kinei sut yok dima indati.

²⁹Yoni mipos mun di acom amuhup tut nya hagom leu na drek dip ingon di kinei sut na. Agwam tut ajou hangwangti hak nok sop krar ba, yahagom isum igyai ei nati bingat na. Ade nikrar kepti kin ade nicut tut yamti ribindei dino,

³⁰mun di buhun dini micut igkep nani a. Anok sop krar igkei mem ngkiai nya yahagom ba, abindei bimap kui nati tug hon ide kwar di akuk na bak cem.

³¹Ayai bram akindig niyai kepti. Gima rino midikes hukum ei nani dip noyam kin hukum di dikes ei akindig dip.”

³²TUHAN Di Ninyeng Jei Bibor pai “Suar apinde mun di jo ei akindig nide mok nsi hak. Mok dima nindig ba, jut cem. Mok nsi dima mpung tut tungwatu nya yahagom ide niba nihyet bicig nati kin nipa tut nati ba, suar abiang nibuhunti.

³³Akindig Samaria de mok dima jut bimpung tut nittinti kin nibindei timekti. Ba, tirigi adut ei gi mokti dima hagom bingwig lene abou ngwak sibui sut ba, ayai niwei drek dip.

³⁴Tirigi adut hagom bingwig leu api aba mok nisra di abindei mot dima biriu angget. Da di TUHAN Di Dinyeng Jei Bibor disimbot dat tu.”

³⁵TUHAN Di Ninyeng Jei Bibor pai “Suar abiang ade nikrar kepti kin ade nicut tut pinai nyati nibuhunti lewo abbwe ser Da ba, aba anghim biDa cem.”

³⁶Lene TUHAN pai bida, “Na di tungwatu di ayaijo kikau bi e, atin ei mem gima ambus Ohola kin Oholiba ingonti tu e? Apai kep yok tut mun di kinei bibor di ibon tu nya.

³⁷Icut ei sisar nicut tut yamti ba, ibiyai nimai bak tungwatu nya. Icut tut kwar nya di ikuk yok bak ba, ibiyai nimai bak munggwom nya di igyai biDa cem tu. Iba munggwom dima yok bibon midut nindig yok ei nimbar hum dokti bak ide kwar di ikuk yok bak nya.

³⁸Igyai gima he bi noro ibindei ba, map kui Ditde Ig kin Njap Nigwam Kep Ninghuisi di ditak buk kep tu cem.

³⁹Lene njap di igyai nimai bak imunggwom bat nya di igyai biDa pima ba, indig ingut ei nimbar hum dokti bak ide kwar nya di ikuk yok bak pima rino nikindig-nikinjoi nya dima ikwei ei Ditde Ig bibindei ba, map kuisi!

⁴⁰Lene iba srat bijem pinai di ibong minu ting nya leu api yo dima ibit srat nijemti dima ba, ikwei. Ba, yahacem ikek minyeiti bipwoi kei. Iba celak bihwen igyai nggrop ba, indei mimau nya cem mem gima ibiya um pinai di ikwei ngat yok nya.

⁴¹Leu api igwam ei bilen nibongti di kei-kau. Meja di mpung tut njita di itin ei su nya jo yoho bei a. Njita dima yok bitut biei nggrai di ui-gwang kei kin mini zaitun di diyai biyok tu nya cem ri.

⁴²Lene imiap yo di imang bibor di ingon nggei-hi-nggei di ighyet kui yam ingat rin ei nisai ma kwei. Hi nduk yo dima bikwei leu iggum ndigsi. Yo dima ikui srak ei nikindig-nikinjoi cin dima indati ba, iba topi nibou ndig di kei-kau nya bijuk ibou a.

⁴³Leu api dikan ‘Yo dima no ijoi sut gi ingwam kep ingon di pri kep sop krar di iwer sindig-ndau ei nicut tut yamti tu dima yo e?’

⁴⁴Yo dima iluei yam nyen ba, ingkwei-ngkwei nyen kep Ohola kin Oholiba di sop krar cin di ikinei bibor dima.

⁴⁵Noro yo di ingon sren nya migwam nok nikei mem yok bimbus yahacem ingonti drek dip ide nicut tut pinaisi nya kin niyai nimai bak tungwatuti nya cem. Ningat ne yoni igyai mun tunggwei su.”

⁴⁶TUHAN Di Ninyeng Jei Bibor pai “Ma ahig tungwatu di isibut nimpung gom kwei mem gima ihwen bit sop krar cin dima ba, ibipos ndigban nya cem leu yok hak ug.

⁴⁷Nnaba yo dima iba tig bihwen yok ba, injei kwei biba singau simeda bitot yok hak. Nnaba igyai nimai bak imunggwom bat nya bibindig ig di ide nya cem hak ug.

⁴⁸Midicok tut yo di iba yoho rok sisar nicut tut yamti dima leu minu dini nisurti-nipekti. Ditde niyai munti dima mibisok kep bikwop sop nya yahagom leu binhyepo igyok ngon kep ba, icut ei sisar nicut tut yamti nok sop cin dima au.

⁴⁹Ohola kin Oholiba e, midikes hukum ei je dip drek dip gi jicut ei sisar nicut tut yamti kin gi jikuk je bak kwar nya. Leu api mijikan tut bipia Dani ne TUHAN Di Ninyeng Jei Bibor ri.”