Read Hatam YEHEZKIEL 25 Bible Online

YEHEZKIEL 25 - Hatam bible

YEHEZKIEL 25

¹ Lene TUHAN pai bida,

²“Na di tungwatu di ayaijo kikau bi e, ma asigion minu Amon.

³Ma acuk mben dima leu binhyepo ingig itingou mem nisokti di Da Di TUHAN Di Dinyeng Jei Bibor dipai biyok, ‘Ingon kei kep Ditde Ig di map kui kin dihyei Israel nitimek bingwigsi kin mben Yahudi di isima ug ei ingkiaisi.

⁴Gima rino disindui sut yok di keret di ibong ei iggum ndigsi ei nite bei mpia nipriti ibindei timek yok ug a. Keret dima miyohok ide prak meng yati nya ei minu Amon bibong timiei eisi. Yoni migyem timiei Amon ide biei ngat nya ba, midut ide mindhe-ndhe nimuhup tu nya ido ngei.

⁵Midibindei ba, minu ndig Raba minok mpia di igya ser unta nya eisi. Minu Amon titut yam minok mpia di igya ser domba nya eisi. Leu api ikan tut bipia Dani ne TUHAN ri.’ ”

⁶TUHAN Di Ninyeng Jei Bibor pai “Ma jibien-bien nyen ba, jittem-ttem nyen jinda lene jibiyai nillei. Ba, jingon kei kep minu Israel.

⁷Gima rino midikes je ei mben hiter imang bibor inda nsi. Yo dima mipos ndigban jide nya ba, ibiyai hagom ningwig leu je. Midibindei sar je bibor leu ba, mijiwer je mben gom bi ba, mijima minu hi bou je nok jide cem bi. Leu api jingon hukti tut bipia Dani ne TUHAN ri.”

⁸ TUHAN Di Ninyeng Jei Bibor pai “Mben Moab[20] ipai bipia mben Yehuda dima yok inoyam kin ngkiai nindigsi nya.

⁹Gima rino midisindui sut ba, siceu nya micoi bihwen minu ndig ngot di ya ngkiem ser mben Moab ide hanjop nsi bitut minu ndig di kei bibor kei nya di Bet-Yesimot kin Baal-Meon kin Kiryataim nya cem.

¹⁰Midisindui sut mben di ibong ei iggum ndigsi ei nite bei mpia nipriti icoi bihwen minu Moab bitut minu Amon cem bicut hak. Apino Moab miwer no mben gom bu bi.

¹¹Midikes hukum ei mben Moab dip leu api yoni mikan tut bipia Dani ne TUHAN ri.”

¹² TUHAN Di Ninyeng Jei Bibor pai “Mben Edom ibon mun tunggwei nindig bibor bimbuk tut Yehuda drek dip ingon di sibuisi di jo nipou su.

¹³Gima rino dipai brei bak yahagom bipia midikes hukum ei minu Edom dip. Midiyai nimai bak limwa nya kin mindhe-ndhe nya di ibong ei minu dima hagom. Midibindei minu dima titut yam nok minu prenti di mbum-bra bram ei minu ndig Teman kikau ug bipek kin minu ndig Dedan lewo limwa nya yahagom imai ei pranti leu su.

¹⁴Midiba Ditde mben Israel bibuhup tut dingon sibuisi bak mben Edom. Yoni mibibon mben Edom bit leu Ditde nigga biborti. Mben Edom mibikan tut Ditde nigga nicut igkep yok pijumti. Da di TUHAN Di Dinyeng Jei Bibor disimbot dat tu.”

¹⁵ TUHAN Di Ninyeng Jei Bibor pai “Mben Filistin iba nisibut bibuhup bak ide nitok timiei nya lene iba ingon sibuisi di bijo kwei su bibuhup hanyen biyok ba, iba ingon di kinei bibor bindei sar yok.

¹⁶Gima rino dipai bak yahagom bipia midihwen mben Filistin bidibindei sar yok. Midiyai nimai bak mben Filistin niken-ken di igyaijo di ibong ei les him ei minu Filistin nibiho cem.

¹⁷Midikes hukum di buhun bibor ei yok dip. Dibuhup biyok tut ide nisibutti bipek nipekti ug e. Gino itug ndei Ditde niggati lene ikan tut bipia Dani ne TUHAN ri.”