Read Hatam YEHEZKIEL 26 Bible Online

YEHEZKIEL 26 - Hatam bible

YEHEZKIEL 26

¹ Nijam di nibong ei ningkiaisi dima ug ei njap gi nigom mem bed gi hi di nikan tut bi ei ari bingwam gi nisimnaibrimiggom lene TUHAN mbrap bit da bipai,

²“Na di tungwatu di ayaijo kikau bi e, timiei Tirus nya imbos-hi-mbos ba, ibipai ‘Minu ndig Yerusalem timek tu o! Nide nisindemti nitri-nipek munti cut hak tu o! Noni miba nisindemti bibingon nye bu bi o!’ ”

³TUHAN Di Ninyeng Jei pai “Minu ndig Tirus e, Dani ne ade nitok ri! Midibuwak mben imang bibor mem gima dibihwen nani. Ba, yoni minjei kwei nok muk di roi a.

⁴Ba, igya kep ngug tig ade nya bitimek ningwig a. Ibinjei ade ig di bon ninggre nut yam di jo anai nya cem bitti ningwig a. Midicok tut ade dihyei ngot di jo ei sirima hagom ningwig leu ba, gi jo ndia rino tig bou ngwak gom di jo muk ninggimau.

⁵Ninggok kep wau cig nya midis jala di ide nya ei tig dima dip. Da di TUHAN Di Dinyeng Jei Bibor disimbot dat tu. Minu ndig Tirus minok mben imang bibor ide mun di igyem.

⁶Yoni mipos ndigban ba, igyai nimai bak timiei ngot di ibong ser minu ndig ngot di iwin ei nite mam bei dideu minu ndig Tirus nya. Leu api timiei Tirus nya mikan tut bipia Dani ne TUHAN ri.”

⁷TUHAN Di Ninyeng Jei Bibor pai “Minu ndig Tirus e, midibuwak Nibou Ndig Nebukadnezar kwei leu minu Babel mem gima coi bihwen na. Nibou ndig di sindem dima miya tut tentara di nindig bibor kwei leu nite bei mpia nijjai. Noni mikwei sut kuda kin kroba pran kin tentara di ibri kuda kan imang bibor kwei.

⁸Tentara dima yok migyai nimai bak timiei di ibong ser minu ndig di jiwin ei mam bei dideu minu ndig Tirus yahagom ei pran dimati. Tentara dima mitig got di jut bibor mem gima igya nding bitig dihyei binjei keyam bikui sur ngug tig niya nding mem ibiyon ttai nani lene iba ide mun di ibipukep tibor ninggwenti nya di nindig bitas mem gima igya nding leu binhyepo ibihwen na.

⁹Yoni midimig biei ttou di nindig ba, ipindur hammi ade ngug ting nya mem gima ibinggek ngug tig nya lene iba ngkimom nitu binggek ade ig di bon ninggre nut yam di jo anai nya bitti.

¹⁰Ide kuda nya mang bibor apino iba imig di ibidor bindei di dihyei ntui dimba di nggai na nya. Tentara di ibri kuda kan nya ibrim kroba nitu tut mun di bahati tut yok kin kroba pran nya ighyet di sra tut pran midem kep kru di cut a. Tirigi icoi ade dimbou pmem nya bigya kep ade minu ndig di wer ig kum kroi ne gima bindei ba, ade ngug tig nya ugwa-kwei.

¹¹Nimpung tentara di ibri kuda dima miba singau simeda biya kep ade timiei nya kak puig sinon ba, ibiyai nimai biyok. Inggek ade cou nindig nibiyok ngon kep di aba tig biwin di nindig bibor di ngkiem kei nya leu api hagom mitti ug ei dihyeiti.

¹²Ade nitok dima yok mipos mun di anyeng tut nya kin ade ndigban nitri-nipek nya bingwig leu na. Yoni minggek ade ngug tig nya kin ade ig di kei-kau-kei nya cem bitti ningwig ba, ikon ig kum kroi di nok tig kin biei sra kin dihyei pima ba, icom hagom ug ei muk ngeisi.

¹³ Midibindei ade doia nya kin nggong mbrei nya hagom kes hon ba, hyet bu bi.

¹⁴Gi ndi dikes ei rino tig bou ngwak gom ngat he. Ba, gima nok mpia di nipos kep wau cig nya idis kep ide jala nya eisi ri. Hi dima miwin minu ndig dima hanyen bu bi. Da di TUHAN Di Dinyeng Jei Bibor disimbot dat tu.”

¹⁵TUHAN Di Ninyeng Jei Bibor pai bak minu ndig Tirus “Tirigi ade timiei di ibong les him nya imiap nicot tut acutti ba, imiap nimbiam di sindi itug ndei nimai di ikrop ei yam dip yaharati lene yoni migwam nidigit kin nittinti.

¹⁶ Nibou ndig di inyeng tak kep minu di jo sir muk pimat nya mingat mun di cut igkep na lene mikiju leu ide banggo mbrei bijuk ide sinsun nibou ndig kin sinsun di iba minghas linen bibon bikes ei leu yok. Leu api igwam nidigit-digoiti ei dihyeisi. Ittin bibor ba, gi mbun ingon jo nyahan kan bi.

¹⁷Leu api ikon doia nibitig nimaisi dini drek dip na di nibimbiti pai bipia, Minu ndig di ninyeng jei bibor cut hak tu! Icok tut nide kibar minyei nya hagom leu muk ndigsi tu.[21] Timiei nya di nipou inyeng tak kep bidem muk ngeisi titut yam pima ibindei ba, yo di ibong les him nya ittin tut yok.

¹⁸Noro tini bu ne siceu nya ibindei timek na. Gima bindei ba, timiei di ibong mios nya igwam nidigitti he. Ingat atimekti di nindig bibor he lene yahagom idigit tut.”

¹⁹TUHAN Di Ninyeng Jei Bibor pai “Dibindei ba, mpia mbum-bra tut na noyam kin minu prenti di bon timiei nya bi. Midibindei ba, asar ei minyei jou.

²⁰Midipinak na ug ei minu nimai nya ide apino abicom yam bit yo di imai ei nijam gi nipou nya. Disindui sut na ba, abong kikau ei minu nimai nya ide dima ei ig kum kroisi di jo mimbrek ngan tu bit yo di imai su nya. Apino hi mibong ser atimieisi ba, kwop anyeng bit yo di igyaijo nya inyeng bu bi.

²¹ Dibon nani nok bindo di bibon nittinti mem yo di hiter. Gima ne ayaijo ningwig honti ri. Tungwatu nya minggok ser na noro mingat na bou igyai him bi. Da di TUHAN Di Dinyeng Jei Bibor disimbot dat tu.”