Read Hatam YEHEZKIEL 32 Bible Online

YEHEZKIEL 32 - Hatam bible

YEHEZKIEL 32

¹Nijam di nibong ei ningkiaisi dima ug ei njap gi nigom mem bed gi nisimnai ei ari bingwam gi nisimnaibrimigcan lene TUHAN pai bida,

²Na di tungwatu di ayaijo kikau bi e, ma asok kep nibou ndig minu Mesir sindem. Atri tut Ditde nisokti dini bak “Mbro nok gino awer na singa nehen pap ei mben nindigsi nya ikieti lo, adem kepti rino unggor di bong kep minyeisi. Aba amig biroi minyei ba, abindei mumpiang bingwig ei minyei hagomti cem.

³Mpe dino mben nya idem yam ei lene midiba Ditde jala bikat na leu api midisindui sut ba, mben dima ikri na ug ei mam bei.

⁴Midinjei na ug ei dihyeisi leu api midisindui sut ha nya kin mindhe-ndhe nya di ingat rin ei dihyeisi dini hagom igyem anghui a.

⁵Bidibindei ba, nungug nya kin mbang briep nya mpung tut ade nimbiam di kroi bimpiei nya.

⁶Midiba anggrom di disiber biprok nungug him nya ba, anggrom muut kep minyei nibiamti nya cem.

⁷ Nituti dima dibindei sar nani ne midinggai kep ser mpia-bbed him bidibindei ba, ham com nimig haigtu bi. Midiku mpia njap bijo nding ei bumbuhui ninghim lene bed com nimig bi.

⁸Midimu ninjeng ei mpia-bbed him nya hagom leu ba, dibindei minu dip dini bidindi-kai hak. Da di TUHAN Di Dinyeng Jei Bibor disimbot dat tu.

⁹Mpe dino ditri tut atimekti ei minu di akan tut bigyo nya ne ingon mbut-mbut nyen tut.

¹⁰Midimem dinghat tut Ditde singau simeda bidibindei timek na apino nibou ndig nya kin ide limwa nya mingat Ditde niyai munti di bitut na dima. Mpe dima lene yoni migwam nidigitti ba, iji kibi-kibou yam lewo ittin tut gi imai a.”

¹¹TUHAN Di Ninyeng Jei Bibor pai bak nibou ndig minu Mesir “Nibou ndig minu Babel mimem ninghat tut nide singau simeda kep nani.

¹²Disindui sut ba, mben di isibut bibor nya ide tentara mikus ide singau simeda ba, ibiyai nimai bak ade limwa nya yahagom. Limwa ade nya kin ndigban di abikon anyeng nya hagom mitimek krebou-krebai hak.

¹³Midibui mindhe nimuhup tu ade nya hagom ei minyei di idut kep nya nipimat. Tungwatu nya kin mindhe nya miroi-roi nyen minyei dima binghet bu bi.

¹⁴Leu api midibindei pimbai minyei di jo minu ade nya ba, minyei dima biam nyahan. Da di TUHAN Di Dinyeng Jei Bibor disimbot dat tu.

¹⁵Mpe dino dibindei minu Mesir binok iggum ndigsi ningkom di mpia mbum-bra bram ba, dibindei sar mun nyeng hagom di jo minu dima bingwig lene ikan tut bipia Dani ne TUHAN ri.

¹⁶Nisok kep ngkiemti dini rinok doia ningon nggukti. Nimpung sop mben hiter nya mikon doia dima binok doia ningon ngguk tut minu Mesirti bitut nide limwa nya yahagom. Da di TUHAN Di Dinyeng Jei Bibor disimbot dat tu.”

¹⁷Nijam di nibong ei ningkiaisi dima ug ei njap gi nisimnaimuhwidip mem bed gi nigom ei ari bingwam gi nisimnaibrimigcan lene TUHAN pai bu bida,

¹⁸“Na di tungwatu di ayaijo kikau bi e, ma angon ngguk tut limwa minu Mesir nya ug. Apinak yok ug ei minu nimai nya ide bit minu di isindem nindigsi nya.

¹⁹Apai biyok ‘Jikan bipia jeni rino juubbu ngat dor njiriek nindigsi nya e? Mijijuk ug ei minu nimai nya ide bijibong nyahan ei yo di ikan tut Allah bi nya ikieti.’

²⁰Mben Mesir mimai bit yo di ikrop ei pranti. Singau simeda nipup gom tin ei mem gima yai nimai bak yahagom tu.

²¹Tentara di mimbri kui ingkek di ibrim ingkek nya kin yo di itti kin mben Mesir di ikon pran nya iba ingon di nggei-hi-nggei bicigit mben Mesir bikwei ei minu nimai nya ide. Yahara ‘Yo di ikan tut Allah bi dima ikrop ei pranti ba, nogindini yo rini kwei ba, ikwei bong ei mpia dini o!’

²²Minu Asyur bong ei mpia dima. Iba ide tentara nya ijui bigahai minu Asyur lewo yahagom ikrop ei pranti.

²³Ijui no jo ei minu nimai nya ide di jo nijou ngat ei minu nimai nya ide. Tirigi igyaijo yo pima ne ibindei ba, ngkiai nya yahagom ingon ttin bibor. Noro tini bu ne ijui bigahai minu Asyur de jui dip.

²⁴Minu Elam ningat rin ei mpia dima ba, nide tentara nya ijui bigahai minu Elam de jui dip ba, ikrop ei pranti nipou tirigi igyai midut sunat bigyo leu api ijuk ug ei minu nimai nya ide. Tirigi igyaijo yo ne ibindei ba, ngkiai nya yahagom ingon ttin bibor noro tini bu ne imai ba, suar ibiang ide nimmai sut yonti nibuhunti bit yo di ikrop ei pranti nya.

²⁵Minu Elam bong ei yo di ikrop ei pranti nya ikieti ba, nide limwa imang bibor ijui jo ttai nijui dip a. Yahagom igyai midut sunat bigyo tirigi po ikrop tug hon singau simeda. Tirigi igyaijo yo ne ibindei ba, ningon ttin biborti kiju ei dihyeisi dini. Noro tini bu ne imai ba, suar ibiang ide nimmai sut yonti nibuhunti bit yo di ikrop ei pranti nya.

²⁶Minu ndig Mesekh kin Tubal ingat rin ei mpia dima ba, ide tentara nya ijui bigahai yonti ijui a. Yahagom ikrop ei pranti nipou tirigi igyai midut sunat bigyo. Tirigi igyaijo yo ne ibindei ba, ningon ttin biborti kiju ei dihyeisi dini.

²⁷Hi ba midut di bon ninyeng bitig yok noyam kin yo di mimbri kui ingkek di ibrim ingkek di nipou nya bi.[26] Yo di ibrim ingkek di mimbri kui ingkek ijuk ug ei minu nimai nya ide bitut ide minggwen hagom poi ggai. Itig yo dima ba, ibitau singau simeda. Lene ikes mun di ibipukep tibor ninggwenti nya bijo[27] ei ingget dip. Mpe di igyaijo yo ne yo dima ibrim ingkek bibor ba, hiter nya yahagom ittin tut yok.

²⁸Nok gima cem itig mben Mesir ingut ba, ikes yok bibong ei yo di ikan tut Allah bi di ikrop ei pranti nya ikieti.

²⁹Minu Edom ningat rin ei mpia dima bit nibou ndig nya kin pinjoi ndig di inyeng tak kep limwa nya yahagom. Nipou yo ne tentara dima yok isindem noro tini bu ne ibong ei minu nimai nya ide bit yo di imai nindigsi nya di ikan tut Allah bi.

³⁰Nibou ndig nya leu nite bei mpia nijjai yahagom ingat rin ei mpia dima bitut mben Sidon cem. Nipou yo ne ide nisindemti bindei ba, yo di inyeng tak kep yok nya ingon ttin bibor. Noro tini bu ne ibiang ide nimmai sut yonti nibuhunti bijuk tut ug ei minu nimai nya ide tirigi igyai midut sunat bigyo bit yo di ikrop ei pranti. Ibong ei mpia dima ba, inghim koi sut nirom-rausi di rap yok bit yo di ijuk ug ei minu nimai nya ide.

³¹Mpe dino nibou ndig minu Mesir ya tut nide tentara nya ba, ijuk ug ei minu nimai nya ide bingat yahagom di ikrop ei pranti tu ne ingwes gwam. Da di TUHAN Di Dinyeng Jei Bibor disimbot dat tu.

³²Dani rino dibindei di nibou ndig minu Mesir yai nittinti bak yo di igyaijo nya. Noro noni kin nide tentara nya mikrop ei pranti leu api yuug bong bit yo di ikan tut Allah bigyo di ikrop ei pranti yahagom. Da di TUHAN Di Dinyeng Jei Bibor disimbot dat tu.”