Read Hatam YEHEZKIEL 4 Bible Online

YEHEZKIEL 4 - Hatam bible

YEHEZKIEL 4

¹Allah pai bida “Na di tungwatu di ayai jo kikau bi e, aug yai tig mma nindak gom kwei ba, akes ei aho bei. Leu api akilis ei tig mma dima dip ba, abibon minu ndig Yerusalem ningwes eisi.

²Akilis ningwes eisi nok gini. Ma akilis niyon ttai minu ndig dimati eisi bitut got di bikrop ttai kin dihyei di injei bikui sur ngug tig nidip kin prak meng yati di yohok keyam nya kin dihim biei ndig di ibinggek dimbou pmem ei ngug tig di jo ttai hagom.

³Ayai yeng ngkuong ningat gom ba, aba gima bingon nok ngug tig ei aho bei ba, bikkin nani kin minu ndig Yerusalem di abingon mingon dima. Leu api aba aho rok minu ndig dima dem kep nok gino nani rino ayon ttai ngug tig dima. Gima ne mun di bindo tut mben Israel ri.

⁴Aba angha bei anda prak bibong lene midikes[1] mben Israel ide nitunggweisi nya ei nanti dip. Nijam di abong nok gima lene njap dino abiang mben Israel ide sisar nibuhunti ri. Abong nok gima ei ninsi njap sratus ningai ningot muhwindatai leu binhyepo abiyai niwei drek dip yo dima itunggweisi. Njap gom di abong nok gima mibindo tut mun di buhun di cut igkep yok mem ari bingwam gom lene bibikwop nok.

⁶Gima leu api aba angha bei anda com bibong bu ba, atug ndei hukum drek dip timiei Yehuda nya itunggweisi ei ninsi njap ningot bitai. Njap gom mibindo tut mun di buhun di cut igkep yok mem ari bingwam gom lene bibikwop nok.

⁷Ma atou kep niyon ttai minu ndig Yerusalemti nggilun leu api acom anda nitug ndam minu ndig dima ba, abitri tut disokti di bitut hukum dima dibihwen yok biyok.

⁸Midingot nani ser leu binhyepo bit bon akiek na leu bei anda prak ug ei bei anda com kan bi ba, akiek na leu bei anda com ug ei bei anda prak cem kan bi ba, nok gima kikau bibou niyon ttai minu ndig dima bingwig kep ug e.

⁹Nogindini ma aug yai gandum nitu kin gandum barli kin kiju ngwoi kin kiju gula kin gandum sekoi kin gandum di nggriu-nggrop kei. Aba gima srig yamti api abibon roti ba, ayem kep. Gima ne ade njita di ayem ei ninsi njap sratus ningai ningot muhwindatai di aba angha bong bei anda prak pa ri.

¹⁰Anyohou kwas roti dima mungkun kei leu binhyepo ayem kep kilo niken he bikwop njap-njap. Ma ayem dor njiriek leu gima au.

¹¹Minyei di adut cem ma adut nindig bi noro adut mok nuut can mem njap gom lene bibikwop nok.

¹²Ma aba tungwatu yooi di ngak-cai bindig hum leu api aba hum dima binon roti ba, ayem roti dima ei yahagom yoho bei.”

¹³TUHAN pai “Mpe dino dicom mben Israel ug ei ingkiaisi lene yoni migyem njita di Musa de nicukti ggai ser[2] pima nok gima ug ri.”

¹⁴Noro dibuhup “Ayo, TUHAN Di Ninyeng Jei e! Leu dimien yo kikau bipek ammani kep dibindei ba, map kui da drek dip gi diyem mindhe di mai hak ninghui kin ninghui di mindhe di niten-pos yem di niken jo ei bigyo ba, dibiyem njita di ipigig ser cem hi bigyo sren.”

¹⁵Gima rino Allah pai “Nnaba gi nok lene ma aba sapi oi biluei tungwatu yooi ba, abinon roti mem nanti.”

¹⁶Leu api pai bida bu “Na di tungwatu di ayaijo kikau bi e, dicok tut njita di jo ei minu ndig Yerusalem hagom. Tungwatu nya miba ingon di bos-bos nyen kin ingon di ku yok bikwas njita di igyem kin minyei di idut tut yam ba, igyem njita bidut minyei cem poi mien he.

¹⁷Yoni mingon cut leu drek dip roti kin minyei di ngwig leu yok. Leu api ibimai drek dip yonti ide sisar di ibon nya.”