Read Hatam YEHEZKIEL 41 Bible Online

YEHEZKIEL 41 - Hatam bible

YEHEZKIEL 41

¹Lene no dima buwak da ug ei ninsi gi jo hacan di ijem Ninsi Di Kwes. Noni nai puig di mbut ug ei ninsi dima lo, nijeisi dem meter ningai,

²lene ninyanti dem meter muhwi. Dring tig di sir ninghas cin dima nindokti dem meter can biniken. Leu api noni nai ninsi dima lo, nijeisi dem meter ningot can ba, ninyanti dem meter simnai.

³Leu api noni coi ug ei ninsi nohon keti di jo ninsi bibor binai puig di mbut ug ei ninsi dima lo, nijeisi dem meter gom lene ninyanti dem meter ningai. Ba, dring tig di jo ninghas cin dima nindokti dem meter ningai biniken.

⁴Noni nai ninsi di jo ninsi bibor di bon nuhuisi bitai ba, nijeisi kin ninyanti hacem dem meter simnai leu api pai bida, “Ninsi Di Kwes-Kwau” rigini.

⁵Gima leu lene no dima nai dring tig di jo bei ninsi ei TUHAN De Ig lo, nindokti dem meter ningai. Ninsi di ninyanti dem meter can nya no iwin kin dring tig di iwin mem Tuhan De Ig a.

⁶Ninsi dima yok jo-jo yam dip bibon ig jou ningai. Ba, bikwop ig jou dima bon ninsi ningot ningai. Bikwop ninsi di jo-jo yam dip di bon ig jou ningai dima ne gi jo nidip bon dring tig bei nisai dile bibor leu dring tig ei ig jou gi nibehei nindokti. Lene bibikwop nok apino iba tindang nya bicim dring tig ei Tuhan De Ig bi. Noro ninsi dima yok hagom rok kui dring tig dima he.

⁷Gino imian huk dring tig dima leu nisai ma kwei lene nindokti leu dihyeisi ug bipek kin nindokti gi anai hacem noyam. Lene itas lin mbrei di nindig can di jo dring tig nite dini ug ei ninsi dima yok ba, dem mem tungwatu ikui leu ig jou gi nigom ug ei gi nican kikau ug ei gi niningai.

⁸Dingat lo, iprion tig nindig mem Tuhan De Ig nikiou ba, nanaisi dem meter ningai. Lene ninsi di ibikum bu pima yok cem bon nikiou di nanaisi dem meter ningai.

⁹Dring tig di bitut ninsi dima yok di jo nibiho nindokti dem meter can biniken ba, nikieti di leu gi gahai ig ngat dini kou kin ninsi di imam nya ide,

¹⁰bon mpia di jo bas hak di iba ngug tig bikrop ttai di gahai ig nitta ba, ninyanti dem meter simnai.

¹¹Ninsi di iwin dima bon dimbou di ibicoi TUHAN De Ig ei nite bei mpia nijjai nya kin dimbou gom kin bu di ibicoi TUHAN De Ig ei nite bei mpia nibiho. Iba tig di iprion dima bibon bisai gahai ig ngat pima ba, ninyanti dem meter can biniken.

¹²Ig nindig di nijeisi dem meter ningot bitai ba, muhwi lene ninyanti dem meter ningot ningai ba, muhwi no ya mpia di jo bas hak ei nite dinu kwei ei bei mpia nicutti. Nide dring tig nya nindokti dem meter can biniken.

¹³No dima nai Tuhan De Ig nijeisi lo, dem meter ningot muhwi. Noni nai leu Tuhan De Ig ninghim ug bipek kin dring tig bei ig nindig di ya bei mpia nicutti pima ninghim cem ba, dem meter ningot muhwi.

¹⁴Noni nai leu TUHAN De Ig nuhui him bei mpia nipriti ug bipek kin mpia di jo bas hak bei anda prak kin anda com lene ninyanti cem dem meter ningot muhwi.

¹⁵Noni nai ig nindig di iwin ei nite bei mpia nicutti di birok mpia di jo bas hak pima ba, ninyanti dem meter ningot muhwi. Ba, gima bitut dring tig ei nite bei anda prak kin anda com cem. Ninsi nya di jo ei TUHAN De Ig rino ninsi gi nuhui dip dini ug kin Ninsi Di Kwes kin Ninsi Di Kwes-Kwau ba,

¹⁶iba biei di bon nuhuisi bitai bimau hagom leu ig jou dip ug bipek kin kendera mihyeti nya lene ipindur minghas di ndok ser nimihyeti nya.

¹⁷Dring tig bei ninsi titut yam ne,

¹⁸iba dui sraba kin kerub ningwes bikilis eisi. Ba, ikilis dui sraba ningwes biya bikwop ei kerub can ningwes nikieti sindam ba, kerub dima bon niimaisi can.

¹⁹Ba, niimaisi gom noyam kin tungwatu niimasi bibirok kik dui sraba ningwes di ikilis ei bei nite anda prak lene niimaisi gom bu di noyam kin singa niimasi bibirok kik dui sraba ningwes di ikilis ei bei anda com. Nikilisti dima jo bidem TUHAN De Ig titut yam,

²⁰leu ig jou kikau ug bipek kin dimbou nidip cem.

²¹Lene dihim dimbou nya ei Ninsi Di Kwes bon nuhuisi bitai. Mun di dem kep nimbar hum ndok di iba biei bibon jo ei Ninsi Di Kwes-Kwau.

²²Nanaisi dem meter gom biniken lene ninyanti dem meter gom. Iba biei bibon nuhuisi kin nikiou kin nitta nya. No dima pai bida, “Gini ne meja di jo ei TUHAN Noho bei di bindo bipia Noni ningat rin ei mpia dini.”

²³Dimbou gom no jo ei puig di ibicoi ug ei Ninsi Di Kwes niyenti ba, gom kin bu no jo ei puig di ibicoi ug ei Mpia Di Kwes-Kwau niyenti a.

²⁴Dimbou dima yok bon nimeng can di ikau hacan.

²⁵Iba dui sraba ningwes kin kerub ningwes bikilis ei dimbou Ninsi Di Kwes nya. Gima noyam kin gi ikilis ei dring tig nindigsi nyati cem. Lene ibon biei sra di nyan nimeng gom bipindur ei dimbou mem ninsi di ibehei ug ei nisai ser.

²⁶Kendera mihyeti nya jo dring tig dima bei anda prak kin anda com ba, iba dui sraba ningwes di ikilis bimau.