Read Hatam YEHEZKIEL 45 Bible Online

YEHEZKIEL 45 - Hatam bible

YEHEZKIEL 45

¹Nipou tirigi ikwas dihyei dima binok dihyei ninda rom tut keret Israel nya bigyo lene suar ikwas hanjop nsi gom tut TUHAN. Dihyei di ikwas tut TUHAN dima nijeisi dem kilometer simnaibrimigcan ba, meter sratus muhwi. Ba, ninyanti dem kilometer simnai.[37] Hanjop nsi dima titut yam kwes kei.

²Ma ipek hanjop nsi gom ei dihyei dima di bon nuhuisi bitai mem Tuhan De Ig a. Ba, hanjop nsi dima bikwop ninghas him hagom dem meter sratus can ningot muhwi. Biyati di jo ttai nya ninyanti dem meter ningot can ba, muhwi. Suar iwin Tuhan De Ig ei sirima.

³Suar ipek hanjop ei dihyei dima nittou nsi poi mem gima iwin Tuhan De Ig ei niti ba, gima ne nittou nsi di kwes kei ri. Ba, nittou nsi dima nijeisi dem kilometer simnaibrimigcan ba, muhwi lene ninyanti dem kilometer muhwi.

⁴Dihyei dima kwes kei ba, itin ei mem imam nya di igyai midyai nibie tut yo di ikuk yok biDa ei TUHAN De Ig. Dihyei dima nittou nsi poi minok mpia di imam nya iwin ide ig ei niti. Lene nittou nsi poi bu mem Tuhan De Ig a.

⁵Suar ipek hanjop poi bu ei dihyei nittou nsi dima mem yo di intun Lewi him di igyai midyai ei TUHAN De Ig ba, nittou nsi dima nijeisi dem kilometer simnaibrimigcan ba, meter sratus muhwi. Yoni miwin minu ndig nya[38] ei sirima mem yo dima ibong niti.

⁶Ter leu dihyei di kwes kei dima lene suar ipek dihyei hanjop nsi di nijeisi dem kilometer simnaibrimigcan ba, meter sratus muhwi lene ninyanti dem kilometer can. Hanjop nsi dima mem mben Israel iwin ide minu ndig gom bibong niti bit leu ingon kanti.

⁷Suar ipek hanjop nsi ei minu nittou nsi gom di ikes pijum ei mem ide nibou ndig. Dihyei dima jo leu hanjop nsi di ikwas pijum tut TUHAN ei nite bei mpia nicutti niya kwas yamti kikau ug bipek kin Muk Hacan ba, bei mpia nipriti niya kwas yamti kikau ug bipek kin minu Israel nohon keti ei nite bei mpia nipriti cem. Ba, nijeisi noyam kin dihyei hanjop nsi gom di ipek bak keret Israel nya nijeisi.

⁸Hanjop nsi dima nok nibou ndig de dihyei ninda rom. Tug hon nisinati dima ne noni mico kep Ditde limwa nya bu bi. Noni misindui sut ba, dihyei nindigsi jo hak mem mben Israel leu binhyepo ijem bou yok nok ide.

⁹TUHAN Di Ninyeng Jei Bibor pai “Je di nibou ndig Israel e, jibon sisar bidem tu! Ma jikes hon jide nisibut biborti kin jide nico kep limwa nyati dima hak ug. Ma jibon mun di igbit kin mun di sren kei nya. Ma jijji Ditde limwa nya leu ide dihyei bu au. Da di TUHAN Di Dinyeng Jei Bibor ditri tut dicukti dima bije.

¹⁰ Ma jikrau kep kilo kin brek nai di igbit.

¹¹Suar efa di mem ibinai mun di ngga noyam kin bat di mem ibinai ndia ngei. Nitriti mem gima ibinai mun nyeng hagom ninyeng rino homer. Homer nuut gom noyam kin efa nuut simnai ba, noyam kin bat nuut simnai cem.[39]

¹²Nibuhunti kilo gom ninyeng rino syikal ba, syikal gom noyam kin gera nyatungwagom ba, syikal ningot muhwindagom noyam kin mina gom.[40]

¹³Gino jibakilo gandum kin barli ngat mem gima jikwas tut TUHAN lene ma jikwas gom leu ningot muhwindagom tut Noni leu bibikwop jide gandum ngat nimangti ningot muhwindagom ba, nok gima cem tut jide barli ngat.

¹⁴Gino jitau mini zaitun nimangti sratus gom lene ma jikwas gom leu sratus gom dima tut TUHAN. Nitriti mem gima ibinai ndia ngei ninyeng rino bat pima. Bat nuut gom noyam kin homer gom ba, noyam kin kor gom cem.

¹⁵Nitriti mem gima ibinai mindhe-ndhe nya di nok domba. Gino domba ningut sratus can lene ma ikwas ningut gom tut TUHAN. Suar jikwas gandum mem midut njita nibipai sigyo bak Allahti kin mindhe mem midut nindig mindhe titut kep humti kin mindhe mem midut nibiyai ningon kwes kin Allahti tut Allah leu binhyepo Noni kos ser jide sisar di jibon nya. Gima ne Da di TUHAN Di Dinyeng Jei Bibor dicuk jeti ri.

¹⁶Suar timiei mben Israel ittei munkwas dima yok hagom bigyai bak nibou ndig di ninyeng tak kep Israel.

¹⁷Suar noni rima pek mindhe-ndhe nimuhup tu mem midut nindig mindhe titut kep humti kin gandum mem midut njita nibipai sigyo bak Allahti kin midut nisiber anggur ngei ei TUHAN Noho bei mem mben Israel yahagom ei njap ndig nya kin midut Njap Ndig Bed Jep kin midut Njap Nigwam Kep Ninghuisi nya kin njap ndig nindigsi nya. Noni rima mikwas mindhe-ndhe dima mem midut nibiyai nikos ser sisarti kin midut njita nibipai sigyo bak Allahti kin midut nindig mindhe titut kep humti kin midut nibiyai ningon kwes kin Allahti tut Allah leu binhyepo bahara Noni mem gima kos ser mben Israel ide sisar.”

¹⁸TUHAN Di Ninyeng Jei Bibor pai bak nide limwa nya “Ug ei njap gi nigom ei bed gi nigom lene suar jibindei pwoi Ditde Ig tug hon midut nibui sapi nikre di nehen pap ningut gom di bok-ba bi.

¹⁹Suar imam yai mindhe di ibui mem midut nibiyai nikos ser sisarti dima ninggrom hi ba, bidip cou dimbou nya kin nimbar hum dok nuhuisi bitaisi nya kin dimbou di ibicoi ug ei mpia di jo bas hak gi ninsi nide cou dimbou nya hagom ei Ditde Ig.

²⁰Ma jibon nok gima cem ei njap gi nimuhwindacan ei bed gi nigom dima drek dip tungwagom-gom de sisar di bon kin gi bisinggre bi kin gi kan tut bi a. Tug hon nisinati dima ne jibinyohou Ditde Ig nikwes-kwausi.

²¹ Ug ei njap gi nisimnaibrimigtai ei bed gi nigom lene suar jibon midut nibiyok ngon kep Pesta Njap Ndig Paskah. Suar yahagom igyem roti dwoi bi kikau mem njap muhwindacan.

²²Suar nibou ndig bui sapi nikre ningut gom mem midut nibiyai nikos ser sisarti mem nonti kin nide limwa nya cem ei njap gi nigom.

²³Ei ninsi njap muhwindacan di midut dima mbut lene suar noni bui sapi nikre ningut muhwindacan kin domba nikre ningut muhwindacan di bok-ba bi. Lene indig hagom titut ei humti bak TUHAN bikwop njap-njap. Lene suar noni bui kambir nikre ningut gom cem mem midut nibiyai nikos ser sisarti bikwop njap-njap.

²⁴Ter leu gima lene suar noni kwas gandum nimangti dem liter simnaimuhwidip brimigtehican biniken ba, ibikrau kin sapi nikre ningut gom-gom ba, kwas mini zaitun dem liter ningai ba, ibikrau kin domba nikre ningut gom-gom.

²⁵ Tirigi jikinyon ei Njap Ndig Ig Jibei Mpam Meng ei njap gi nisimnaimuhwidip mem bed gi nimuhwindacan lene suar nibou ndig kwas mun nyeng dem kep gi kwas pima mem midut nibiyai nikos ser sisarti kin midut nindig mindhe titut ei humti kin midut njita nibipai sigyo bak Allahti kin midut nisiber mini zaitunti hagom hanyen bu.”