Read Hatam YEHEZKIEL 47 Bible Online

YEHEZKIEL 47 - Hatam bible

YEHEZKIEL 47

¹ No dima buwak da hanyen kwei ei dimbou hui di ibicoi ug ei TUHAN De Ig. Lene dingat lo, minyei biam leu dimbou hui di itu ei TUHAN De Ig dima nibehei bei mpia nipriti bit leu Tuhan De Ig nibirok kikti. Minyei dima biam kwei leu dimbou hui nibehei ei nite di birok kik mpia nibiho bimbut sir nimbar hum dok ninghas nite di birok kik mpia nibiho.

²Leu api noni buwak da binimbut kak dimbou pmem di birok kik mpia nijjai. Noni bie tut da ug ei dimbou pmem di birok kik mpia nipriti. Minyei bousi dima biam nyahan sir dimbou pmem dima ei nite bei mpia nibiho.

³Noni buwak da bu binibit minyei dima nibiamti ug ei nite bei mpia nipriti kikau ei meter sratus muhwi leu api ba nide tom binai minyei nijutti bicuk da bidisigon lo, mpia di disigonti dima ne minyei gwam dimig mbuk he.

⁴Leu api noni mbut bu lene ba nide tom binai minyei nibiamti ug ei meter sratus muhwi bu bidisigon ba, minyei kui bigwam dibiau he. Noni mbut bu lene ba nide tom binai minyei nibiamti ug ei meter sratus muhwi bu bidisigon ba, minyei kui bigwam dintig bou.

⁵Noni nai minyei nibiamti ug ei meter sratus muhwi bu lo, minyei nibiamti jut bibor ba, bit bon disigon kan bi. Gino hi joi sut ug dihip ei nite hi lene suar ha minyei he.

⁶Leu api noni pai bida, “Na di tungwatu di ayaijo kikau bi e, ayok ngon kep gini yok hagom mungkun kei.” Leu api noni buwak da binikak minyei nintig dip,

⁷bidingat lo, biei mang bibor hei ei mam bei ei nite hi nite hi.

⁸Noni pai bida “Minyei dini biam ei nite bei mpia nipriti kak minu dini lene biam kak Mbang Briep Yordan bibiam ug ei Igpong Nsim. Gino ningei ug com Igpong Nsim lene ningei di nyop ei igpong dimati nok minyei su ba, nyop bu bi.

⁹Ei mpia di minyei dini biam ug eisi nya lene bikwop wau ninyeng hagom kin mindhe-ndhe hagom idigek bibor. Minyei di biam dini mibindei ba, Igpong Nsim ningei midem minyei su ningei di nyop bi. Minyei dini nibiamti bindei ba, mun nyeng hagom yai niyaijo hanyen.

¹⁰Minyei bousi En-Gedi kikau ug ei minyei bousi En-Eglaim ne minyei nipimat mpung tut nipos kep wau cig nya di idis jala di ide nya hek mpia. Bikwop wau ninyeng hagom mijo ei minyei dimati noyam kin gi jo ei Muk Hacan ningeisi cem.

¹¹Noro minyei di ut ei lipigti kin minyei utti di jo sir minyei nintig dip nya nnai bi noro nok nsim nibousi a.

¹² Bikwop biei nyeng di ngat ningat nya hagom hei ei mam bei cin di ug ninno dima. Biei dima nimeng mimbriong bi sren. Ningat nya mintun him bijo ninno bijo kikau. Ningat di nijep mintun biei dima him bikwop bed tug hon minyei di yai ningei bak bibiam kwei leu TUHAN De Ig a. Ningat nya nok njita mem tungwatu nya ba, indung nimeng binok obat.”

¹³TUHAN Di Ninyeng Jei Bibor pai “Tirigi keret Israel simnaibrimican ikwas ide hanjop nsi tut yam lene keret Yusuf ide dihyei hanjop nsi can nok ide dihyei ninda rom.[43]

¹⁴Diba neheng bipai bak jidigup bat-jidigai bat nya bipia midiyai dihyei dini biyok. Gima rino jiyai dihyei dini lene ma jiba jingon di kwes kin yam bikwas tut yam.

¹⁵Minu Israel de minu niya kwas yamti ei nite bei mpia nijjai leu Muk Hacan mbut hallu ndam mpia nipriti kikau bikwam tunggwei ug ei minu ndig Hetlon bikui ug ei nitinggoisi ei Hamat kikau ug ei minu ndig Zedad,

¹⁶kikau ug ei minu ndig Berota kin Sibraim (minu ndig cin dima jo ei minu ndig Damsyik kin Hamat ikieti). Leu api minu niya kwas yamti mbut kikau ug ei minu ndig Hazar-Enan buug bipek kin minu ndig Hauran niya kwas yamti.

¹⁷Gima rino ikinyon ei minu niya kwas yamti ei nite bei mpia nijjai ei Muk Hacan kikau ug ndam nite bei mpia nipriti bipek kin minu ndig Hazar-Enan lo, minu ndig Damsyik kin Hamat nya jo bei mpia nijjai ei minu niya kwas yamti nite dima kwei.

¹⁸Minu niya kwas yamti ei nite bei mpia nipriti krop bimbut ug ei nite bei mpia nibiho ei mpia ttou nsi gom di jo ei minu ndig Damsyik kin Hauran nya ikieti. Minyei Pmem Yordan nok niya kwas yamti mem dihyei Israel bei mpia nicutti kin Gilead bei mpia nipriti kikau ug ei nipekti ei minu ndig Tamar ei Igpong Nsim nintig dip.

¹⁹Minu niya kwas yamti ei nite bei mpia nibiho krop bimbut leu minu ndig Tamar ba, hallu ug ei bei mpia nicutti kin nibiho ikieti kikau ug ei minyei bousi Kades-Meriba leu api mbut hallu ug ei bei mpia nicutti kin mpia nijjai ikieti ba, sir minu Mesir de minu niya kwas yamti kikau ug bipek kin Muk Hacan.

²⁰Minu niya kwas yamti ei nite bei mpia nicutti ne Muk Hacan ri. Gima mbut kikau ug ei bei mpia nijjai ug bipek kin mpia ttou nsi gom ei nite bei mpia nicutti di bon puig di ibikak ug ei nitinggoisi Hamat.

²¹Ma jikwas dihyei dima tut yam bit leu mben Israel imangti ba,

²²dihyei dima nok jide dihyei ninda rom bijo ninno bijo kikau. Ma ngkiai nya di ibong timiei bigyai imunggwom bat nya srig jikieti cem igyai hanjop nsi hi ei jide dihyei ninda rom nok ide dihyei ninda rom. Ma jibibon yok nok limwa ningat-ngat nya nya noyam kin je di mben Israel cem. Yoni mibit niko-nibinggok tutti bitug ndei ide hanjop nsi ei mpe di jikwas dihyei tut yam.

²³Suar bikwop ngkiai nya di ibong timiei itug ndei ide dihyei ninda rom bit je di limwa Israel di ibong bit je nya. Da di TUHAN Di Dinyeng Jei Bibor disimbot dat tu.”