Read Hatam YEHEZKIEL 8 Bible Online

YEHEZKIEL 8 - Hatam bible

YEHEZKIEL 8

¹Nijam di icom nye ug ei ningkiaisi mbut ba, ug ei njap gi nimuhwi mem bed nimuhwindagom ei ari bingwam gi nimuhwindagom tu lene timiei Yehuda nya di icom yok dima ide nibou nya ikwei ngat da ei ditde ig ba, igwam nyen bit da. Leu api TUHAN Di Ninyeng Jei Bibor de nisindemti mpung pias hagau ei dingonti kros.

² Ditou kep kui bidingat mun di dem kep tungwatu. Hon nintig bou bijuk dem kep nok hum njeng. Lene hon nintig bou bikui piga mpia bidem kep ngkimom-tembaga di idip bisieng-siau kei.

³Mun di nok tungwatu dima su ninda bikrau dibou nta leu api diba ningat-hi-ngat pima bingat lo, Allah Ninnei kon da anai ug ei hou him bibuwak da ug ei TUHAN De Ig ei minu ndig Yerusalem. Noni kes da kui dimbou di ibicoi ug ei mpia di jo bas hak ei ninsi gom di jo ei nite bei mpia nijjai. Ba, kwar di tungwatu nya ikuk yok bak di bibon TUHAN nigga biborti jo ei sirima.

⁴ Leu api dingat nipigati di piga mpia kei di bindo tut Allah Israel di ningat rin ei sirima bou diyai him. Ba, gima noyam kin gi dingat ei mpe di dingat rin ei Minyei Pmem Kebar nipimat.

⁵Allah pai bida “Na di tungwatu di ayaijo kikau bi e, acap nite bei mpia nijjai.” Dibit nihyet dima bidingat kwar di tungwatu nya ikuk yok bak di bibon Allah nigga biborti jo nimbar hum dok nite di dideu puig di ibicoi mpia di jo bas hak dima.

⁶Allah pai bida “Na di tungwatu di ayaijo kikau bi e, angat mindei di pek kep dima i? Angig ayai kep nibon munti di kinei bibor di bindei ba, diyai ttin di mben Israel igyai kep nya. Mun di igyai dima boom Da ei minu ting leu Ditde Ig tu. Noro akwei ba, midindo mun di kinei bibor bu hi kin bu bina.”

⁷Leu api Noni buwak da ug ei dimbou di ibicoi ug ei mpia di jo bas hak di iba ngug tig bikrop ttai gi jo nisai lene bindo mihye di itu ei dring tigti bida.

⁸Noni pai bida “Abindei ba, mihyeti dini wer bres.” Diyai igbit nicuk dati leu api dingat dimbou nimeng gom.

⁹Noni pai bida bu “Ma acoi ba, angat nibon munti di kinei bibor di bindei ba, igyai ttin ninyeng gom di ibon ei dima.”

¹⁰Gima rino dicoi kak dimbou bidingat lo, hi kilis bidem wou nyeng hagom kin mindhe-ndhe di ipigig sut nindigsi nya[4] ei dring tig di ninsi dimati. Ba, ibikilis kwar di mben Israel ikuk yok bak nya cem ei dring tig dimati.

¹¹Mben Israel ide nibou di ibie tut limwa nya ibou ningot muhwindacan cem ingat rin ei sirima bitut Yaazanya di Safan nipmot cem. Bikwop tungwagom-gom krau bokor di indig biei nggrai di ui-gwang kei eisi ba, nimmup brou.

¹²Allah pai bida “Na di tungwatu di ayaijo kikau bi e, angat mun di nibou minu Israel nya ibon ku dima yok e? Ikuk yok ei ninsi di mpung tut kwar nya lewo ikan bigya dikes minu dini ei su bidingat ide nibon munti dima bi.”

¹³Leu api TUHAN pai bida bu “Akwei ngat mun di bindei di ayai ttin di dor njiriek gima bu.”

¹⁴Noni buwak da ug ei dimbou pmem di jo ei TUHAN De Ig ei nite bei mpia nijjai lene bindo sop nya di ipim kui jei sut Kwar Tamus[5] nimaisi bida lene dingat gima bou diyai him.

¹⁵TUHAN pai bida “Na di tungwatu di ayaijo kikau bi e, angat tu e? Mun nyeng mang bibor bu di mibindei ba, ayai ttin ningat no rinaha bu yo.”

¹⁶Lene Noni buwak da ug ei mpia di jo bas hak gom di jo ei TUHAN De Ig ninsi bidingat lo, ibou nyatungwagom muhwi ingat rin ei nimbar hum dok kin bisai di ibicoi kwei ei Ig dima nikieti. Iba inghim bak ninsi di kwes lene iba ibiau bicom mpia bikuk yok biba ingwak bikik mpia ndam bei mpia nipriti ba, ikuk yok bak mpia njap di pri kwei.

¹⁷Lene TUHAN pai bida, “Na di tungwatu di ayaijo kikau bi e, angat gima tu e? Timiei Yehuda dini ingon cut hon gi ibon mun di bindei di igyai ttin ningat dima he bi. Ba, ibon mun di kinei bibor di bit bon tungwatu ibonti bi pimo bidem minu dini nisurti-nipekti hagom he bi noro igyai ibou tut ei mpia dini ei Ditde Ig. Igyai munti dima bindei ba, digga bibor bidor njiriek bu. Angat i! Ibibon dinyeng kinei tug hon igyai munti di kinei bibor dini![6]

¹⁸Yoni mitug ndei Ditde niggati di buhun bibor! Dingondut yok bidikos ser ide sisar bi. Mbro nok gino iba nadi bahara tignam-tignam biDa lo, midimiap ighyet bi sren!”