Read Hatam YEHEZKIEL 9 Bible Online

YEHEZKIEL 9 - Hatam bible

YEHEZKIEL 9

¹Leu api dimiap Allah di jem “Je di jikwei sut Ditde hukum di dikes ei minu ndig dini dip e, ma jikrau jide minggwen nya bijikwei sut.”

²Noni pai nok rino ibou muhwindagom ittau sur yam leu dimbou pmem di jo TUHAN De Ig nijjai nisai ma kwei ba, yahagom ikrau ide minggwen bijo indati. No di juk sinsun di iba minghas linen binap di krau mun pas srat ei nindati cem ningat rima bit yok. Yahagom icoi kwei bigya dideu nimbar hum dok ngkimom-tembaga.

³Leu api nipigati di piga kei di bindo tut Allah Israel di ningat rin ei mpia dima piga mpia srig kerub nya[7] ikieti bipri leu nijoti buug ya kui dimbou di ibicoi kwei ei TUHAN De Ig. Lene TUHAN jem no di juk sinsun linen dima bipai bak,

⁴ “Aug ba, aya bidem minu ndig nuhuisi nya hagom ba, akes bindo ei tungwagom-gom di ningon ngguk tut kin gi ningon buhun tut nibon munti hagom di bindei igyai ttinti di tungwatu ibon ei minu ndig dini ingwak a.”

⁵Dimiap gino Allah pai bak nindigsi nya “Jibit no dima bijiya bidem minu ndig nuhuisi nya hagom. Ma jingon nggriu sut tungwatu nya au. Noro ma jiyai nimai bak tungwagom-gom hak ug.

⁶Ma jiyai nimai bak pinai nya kin sop nya kin ndigpoi nya kin pilei nya kin andig-ndau nya kin munggwom nya yahagom. Noro tut yo di bindo pima jo ingwak ne ma jingget yo dima au. Ma jikinyon eisi ei mpia di Ditde Ig joti dini.” Leu api ikinyon ei ide midyai dimati bigyai nimai bak nibou minu Israel di ingat rin ei TUHAN De Ig dima bibie sindam.

⁷Allah pai biyok “Jibindei ba, map kui Ditde Ig dini. Jibindei ba, ninsi nya hagom mpung tut nimbiam ngut a. Jikinyon eisi!” Leu api ikinyon ei niyai nimai bak yo di ingat rin ei minu ndig dimati.

⁸Tirigi inda jo kep niyai nimai biyoti tu lene diya bidangkom. Diba dibiau bicom mpia bidahara “TUHAN Di Ninyeng Jei Bibor e, agga minu ndig Yerusalem bibor nok gima ba, ayai nimai bak yo di ingat rin ei Israel yahagom e?”

⁹Lene Noni buhup “Mben Israel kin Yehuda nya ibon sisar nindig bibor tu. Ihwen yam bidem minu dini hagom ba, iba mun di kinei birus minu ndig Yerusalem birom-rau tu. Ipai biyam bipia Da di TUHAN dikes minu dini ei su bidingat ide nibon munti nya kan bi.

¹⁰Gima rino dingondut yok bi. Midikiek mun di ibon bak yo di hiter ndam yonti hanyen.”

¹¹Leu api no di juk sinsun linen pima ngkwei hanyen bipai sut bak TUHAN hanyen “Dimbut tut acuk dati pima biput tu.”