Read Hatam DANIEL 10 Bible Online

DANIEL 10 - Hatam bible

DANIEL 10

¹Nibou Ndig Kores ninyeng tak kep minu Persia ug ei ari bingwam gi niningai lene nimbot kepti tut nihyet gom tibim kwei ei Daniel di ninyeng hi Beltsazar nitingou nsi. Nihyet dima igbit lo, nggruk bibor mem gima ningon huk niti.[5] Tirigi Daniel bingon-ngon nyen mem gima ningon hukti tut lene nicoi ei ningatti dima jo nibreisi mem noni tug hon ningat-hi-ngat di noni ngat.

²Mpe dima lene digwam bidiyem njita bi kikau mem ari nitindur ningai.

³Diyem njita di mmau kei kin mikwau bi bididut ba anggur ngei bi mem nijam ari nitindur ningai. Dipri dibou mem nijam dima cem bi.

⁴Ug cut njap nyatungwagom bitai mem bed gi nigom ei ari bingwam dima lene diya ei Minyei Pmem Tigris nipimat.

⁵ Dikiek da biditou kep kui mpia-bbed him bidingat tungwagom di juk sinsun di iba minghas linen bibon di ba mas di pimbai kei bikri kep nintig bou.

⁶Ningut piga mpia kei bidem kep tig permata ba, niimaisi njeng kei bidem kep kigyei di ninjeng srei pimo. Niyai njep cem njeng-jau bidem hum njeng. Ninda kin nimig piga mpia kei bidem ngkimom-tembaga di idip kep di njeng-njau kei pimo. Nihyet di tibim kwei dima dem kep tungwatu nya imang bibor ighyet di bong yamti.

⁷Dangkom he rino dingat ningat-hi-ngat dima. Yo di ingat rin bit da igingat bi. Noro ittin bibor ba, inang biku yok.

⁸Inang leu da bidiya bidangkom bidingig diyai kep ningat-hi-ngat di biyai dingon digit dima lene dinghuisi sindem bu bi ba, diimaisi cem hai bibor tu.

⁹Tirigi dimiap nihyet rino dimbris biditti ba, diba doho bei bikibou dihyei.

¹⁰Leu api ninda gom ngget da bibindei ba, dikiju lo, diba dinda kin dibiau buhu dihyei.

¹¹Malaikati dima pai bida “Daniel e, Allah ningon ngakei na. Ma akiju ba, aya leu api angig atingou mem dihyet di dipai bina dini mungkun. Lewo hi pinak da bidikwei ngat na.” Pai nok rino dikiju bidiya lo, didigit.

¹²Leu api noni pai bida “Daniel e, ma attin tut au. Lewo Allah miap ade nadi habiei leu njap gi nigom po akos tut mem gima aom nanti leu binhyepo angon dorti tut mun di pek kep nya. Dikwei nok nibuhup ade naditi ri.

¹³ Noro malaikati di ya ser minu Persia ninyeng tak kepti hwen bit da ei ninsi njap nyatungwagom bigom. Leu api Mikhael di nibou mem malaikati nya kwei mpu da. Dikes noni ei minu Persia bidikwei leu.

¹⁴Dikwei mem gima diba ningat-hi-ngat gom kin bu biyai angon di huk niti tut mun di pek kep mem ade mben nya ei nidipti bu.”

¹⁵Tirigi noni pai bida nok rino duhuk bou ba, digimbrap bi.

¹⁶Leu api malaikati di dem kep tungwatu dima su ninda bingget duhui. Lene dipai binoni “Andigpoi e, ningat-hi-ngat di dingat dima bindei om da bibor ba, diyai deti bi bibor.

¹⁷Didem kep nok no di awak di ya ei niceu noho bei. Notou mem gima dimbrap bit na di Andigpoi i? Lewo nisindemti ngwig leu da bidinnei cem cun.”

¹⁸Lene noni su ninda bingget da mbigom kin bu. Leu api dingkek kan lo, ditde nisindemti kum eisi.

¹⁹Noni pai bida “Yo, ma ayai nisindemti. Angon digit ba, attin tut au! Lewo Allah ningon ngakei na.” Pai nok rino dingkek kan lo, ditde nisindemti kum eisi bidor njiriek bu. Lene dipai bak “Gima ne na di Andigpoi e, apai angon kanti bida hak ug. Lewo abindei ba, ditde nisindemti kum eisi bu tu.”

²⁰Leu api noni buhup “Akan tut nggon rino dikwei ngat na i? Dikwei leu binhyepo dimbot kep tut srat bokti di jo ei Srat Nijitti bina. Nogindini suar dingkwei hanyen mem gima dihwen bit malaikati di ya ser minu Persia ninyeng tak kepti. Gima leu lene malaikati di ya ser minu Yunani kwei hwen bit da. Hi dima mpu da tirigi dingkwei bidihwen bit malaikati cin dima bi. Noro malaikati Mikhael di ya ser ade minu Israel he rino mpu da ba.