Read Hatam DANIEL 12 Bible Online

DANIEL 12 - Hatam bible

DANIEL 12

¹ Malaikati di juk sinsun di iba minghas linen bibon dima pai bu “Mpe dima lene Mikhael di malaikati di sindem di ya ser ade mben tau kwei. Leu api nijam di buhun bibor cut igkep tungwatu nya. Mun di buhun bibor di cut dima cut habiei ei nijam di mben nya ingat rin ei dihyeisi dini kikau kwei bipek nijam di buhun bibor dima nicunti bigyo. Nijam dima dem lene ade mben di inyeng jo ei Allah de sratti yahagom ingwes ngun.

² Imang bibor di imai nipou su nya igyai niyaijo hanyen bu ba, bihi itug ndei niyaijo kikau lo, hiter bu itug ndei nimmai sut yonti bijo ninno bijo kikau.

³Mporo nibou di ingon ki nya ipiga mpia bidem mpia-bbed him di piga kei. Lene yo di ingginau tungwatu nya imang bibor di ibindei ba, yo dima iba ingon di sren bibon mun di kei nya ipiga mpia bidem ham nya di piga mpia-bbed him bijo ninno bijo kikau.”

⁴ Leu api malaikati dima pai bida “Daniel e, nogindini ma akibou kep srat dima lene aba lem bikrau kep ser leu binhyepo jo nok kikau ug bipek nijam ningwig honti. Tungwatu nya imang bibor ibingon mem gima inggok tut mun di sindi pek kep lo, icom yahanggwap mikui-kausi he.”

⁵Gima ngwig leu api dingat pinai nya ibou can. Gi nigom ya ei minyei pimat nite dini kwei lene gi nican ya ei minyei pimat nite dinu ug.

⁶Pinai gi nigom hig pinai di wer ya dideu minyei nibrig “Apig api mindur di pek kep dini yok ngwig hon i?”

⁷ Lene no dima su ninda hacem kui mpia-bbed him. Dimiap gi noni heng bitug hon Allah di niyaijo kikau ninyeng bipai “Mun di pek kep dima yok mbut biyem ari bingwam nitindur ningai ba, bed nitindur muhwindagom. Hammi tirigi nihwen bit Allah de limwati nya kes hon rino mun di pek kep di wer mindur dima yok cem kes hon.”

⁸Dimiap mun di malaikati simbot dat dima yok noro dingon guhuk niti bi. Leu api dihig ser “Andigpoi e, notou mun dima yok hagom kes hon i?”

⁹Noni buhup “Daniel e, nogindini aug hak lewo suar iku mimun tut nihyet dima kikau ug bipek nijam ningwig honti.

¹⁰ Yo di imang bibor itug ndei ingon di kwes kei tug hon mun di bingon yok. Yo di ibon kep mun di kinei bibor nya ingon huk niti bi. Leu api ibon mun di kinei bibor kikau. Yo di ingon ki nya he rima ingon huk niti a.

¹¹ Leu njap di nibon midut nindig mindhe ei nimbar hum dokti bikwop njap-njap dima kes hon ba, nijam di bibon ningon ttinti di ijem Nisibutti Di Bindei Map Kui TUHAN De Ig[11] tau lene nijam dima miyem njap sribu gom sratus can ningot muhwindatai.

¹²Yo di inyohou ide ningon di gom kikau bipek njap gi sribu gom sratus ningai ningot ningai bimuhwi ningwigsi nya mitug ndei ningon nggei-hi-nggeisi.

¹³Na di Daniel e, ma anyohou ade ningon gomti kikau ug bipek ayaijo ningwig honti. Mpe dima lene mporo abong kep anghuisi ug bipek nijam ningwig honti leu api akiju hanyen ba, atug ndei amuhup.”