Read Hatam DANIEL 3 Bible Online

DANIEL 3 - Hatam bible

DANIEL 3

¹Jei bi lene Nibou Ndig Nebukadnezar cuk tungwatu nya biba mas bibon kwar di nindig krop di nijeisi dem meter ningot can ba, muhwindacan. Lene ninyanti dem meter ningai leu api cuk yok ba, itas kwar dima biya pijum kei ei briep bousi Dura ei minu Babel.

²Noni sok nihyet bak nibou nya bidem nide minu dima hagom leu binhyepo induk yam kwei ba, yahagom ingat rin tirigi nibou ndig piga nide kwar di tas biya pijum kei dima. Yo di nduk yok kwei dini ne yo di nibou minu ndig kin wakil kin nibou kintrorti kin yo di inyeng tak kep mitiei kin sekertaris kin nikei kin yo di igya ser nya ide nibou nya cem yahagom ri.

³Tirigi yahagom induk yam bigya kui kwar dima nimig him rino,

⁴nibou ndig nisut gom di tri tut nihyet kan kiju biya lene ba nihyet nindig bibor bipai biyok “Je di jikwei leu minu ndig nya kin mben nya kin je di jimbrap jihyet ter leu yam nya jahagom e,

⁵mbigom ne pun mbrei nibimbiti mitibim leu api porei kin nggong mbrei kin rebab kin gambus kin serdam nya bitut mun di ikek nindigsi nya hagom nibimbi tibim bram yam. Tirigi nibimbiti bong ne suar jahagom jikuk je bak kwar di Nibou Ndig Nebukadnezar tas ei dima bijinggei sut.

⁶Tungwa tou rino kuk no binggei sut kwar dima bi mitug ndei hukum dino tentara nya micom no dima tut niyaisi ug ei tong nsi di hum njeng cig-cai eisi.”

⁷Gima rino tirigi nibimbiti tibim tu lene yo di ikwei leu minu ndig nya kin mben nya kin yo di imbrap ighyet ter leu yam nya yahagom imiap leu api ikuk yok bak kwar di Nibou Ndig Nebukadnezar tas ei dima binggei sut.

⁸Mun di pek kep dima bon nikwesti di kei bibor mem mben Babel ibou poi ipai kep mben Yahudi.

⁹Gima rino ipai bak Nibou Ndig Nebukadnezar “Ma na di Nibou Ndig ayaijo ninno!

¹⁰Na di Andigpoi acuk tungwatu bipia mpe dino nibimbiti pima bong ne suar yahagom ikuk yok bak ade kwar mas binggei sut ade kwar mas.

¹¹Tungwa tou rino kuk no binggei sut kwar dima bi mitug ndei hukum dino tentara nya micom no dima tut niyaisi no rinaha ug ei tong nsi di hum njeng cig-cai eisi.

¹²Noro Sadrakh kin Mesakh kin Abednego di mben Yahudi di na di Andigpoi ata yok ba, igya kui Daniel binyeng tak kep minu Babel bit noni pima isrep tut ahyet. Inggei sut ade nung nya ba, ikuk yok bak kwar di atas ei cem bi.”

¹³Tirigi nibou ndig miap ighyet nok rino noni gga nindig bibor leu api cuk yo di igya ser nya bikri ibou ningai dima kwei bigya ei noho bei.

¹⁴Noni hig ser yok “Sadrakh kin Mesakh kin Abednego e, jipai igbit bida! Jikou sut gi jinggei sut ditde nung nya di dikuk da bak ba, jikou sut gi jikuk je bak kwar mas di ditas ei dima cem e?

¹⁵Gi nok ne tirigi pun mbrei kin porei kin nggong mbrei kin rebab kin gambus kin serdam nya bitut mun di tungwatu ikek nindigsi nya hagom nibimbiti tibim hanyen ne suar jikuk je bak kwar dima bijinggei sut. Gi bi ne yo di igya ser nya micom je tut jiyaisi ug ei tong nsi di hum njeng cig-cai eisi. Jikan bipia kwar ninyeng hi mikwei teu je leu hukum dima e?”

¹⁶Sadrakh kin Mesakh kin Abednego ibuhup “Na di Andigpoi di anyeng jei bibor e, nipai mun mem nibisu tindei binimbrap gau nyenti bi.

¹⁷Nyende Allah sindem mem gima teu nye leu hum nindig bibor di ninjeng cig-cai dima biteu nye leu na di Andigpoi anda nsi cem.

¹⁸Ne gino Noni teu nye leu hum dima bi cem ma na di Andigpoi ayok ngon kep bipia mininggei sut ade kwar nya binikuk nye bak kwar mas di atas ei bi sren.”

¹⁹Ipai nok rino Nebukadnezar gga nindig bibor ba, ninnei kui mem gima yai nimai bak Sadrakh kin Mesakh kin Abednego. Gima rino noni cuk yo di igya ser nya bindig hum bininjeng cig-cai bibor ba, niwamti mbimuhwindacan njiriek gi nipou a.

²⁰Lene noni dimig ibou poi di isindem bibor dor njiriek yo di igya ser nindigsi nya leu api yo dima ingot yok binjei yok ug ei tong nsi di hum cig-cai eisi.

²¹Ingot ibou ningai dima haninyai sut igyai yaisi kin ide sinsun kin ide topi nya hagom binjei yok ug ei tong nsi.

²²Nibou ndig nicuk yokti tut gi indig hum di dut bibor dor njiriek nindig hum ngan-nganti bindei ba, tirigi yo di igya ser nya ison dideu tong nuhui lene hum yem yok bingkiong.

²³Gima rino Sadrakh kin Mesakh kin Abednego di ingot yok bingkiem dima icut ug ei hum di cig-cai di sror nindig bibor dimati.

²⁴Haninyai Nebukadnezar kiju biya binggap leu nindig bibor lene hig ser yo di igya kui noni “Apo ingot ibou ningai binjei yok ug ei hum di cig-cai dimati bi e?” Lene ibuhup “Andigpoi e, apaisi dima igbit ri.”

²⁵Leu api noni hig ser yok “Nggon rino dingat ibou bitai di imbut-mbut nyen ei hum di cig-cai dima ninggimau i? Kuk pas leu yok tu ba, hum yem yok bi! Dingat lo, no di ba no kum yok ne malaikati hi ri!”

²⁶Leu api Nebukadnezar ug ya kui mihyeti di itu ei tong nsi di hum cig-cai eisi dima bahara “Sadrakh kin Mesakh kin Abednego e, jo nibreisi mem da bipia jeni ne awak mem Allah Di Ninyeng Jei Bibor ri! Jibipbur bijehei kwei leu hum di cig-cai dima!” Lene yehei leu tong nsi hak ug.

²⁷Nibou minu ndig kin wakil kin nibou kintrorti nya yahagom induk yam bingwig ttai yok bigyok igyai kep yok. Hum yem ibou nta kin ide sinsun ba, hum mmup ninghap cem kui yok bi.

²⁸Leu api nibou ndig pai “Dinggei sut Sadrakh kin Mesakh kin Abednego ide Allah di ikuk yok bak! Noni pinak Nide malaikati gom kwei biteu yok leu hum di cig-cai lewo iba ingon com Noni. Yoni ibit dihyet bi lene isindui sut bitug ndei nimai leu gima ikuk yok bak kwar nya lewo ikuk yok bak yonti ide Allah Nongkom he.

²⁹Gima rino ditri tut bipia bikwop tungwagom-gom di leu timiei minu nya kin mben nya kin gi mbrap nihyet hiter nya di nihyet wer mpiahi tut Sadrakh kin Mesakh kin Abednego ide Allah mitug ndei hukum nikos noni kukiau kin, nilet nide ig bingwig biwer ig kum kroi cem. Bit bon kwar hi teu tungwatu nya noyam kin Allah di teu yo dini kan bi.”

³⁰Gima ngwig lene nibou ndig bindei ba, Sadrakh kin Mesakh kin Abednego igyai inyeng di jei bibor ei minu Babel.