Read Hatam DANIEL 4 Bible Online

DANIEL 4 - Hatam bible

DANIEL 4

¹Nibou Ndig Nebukadnezar sok nihyet ei nide awak nya dip bak timiei minu nya kin mben nya kin gi imbrap nihyet hiter nya ei dihyeisi dini hagom bipai biyok a, “Ma ningon jo nyahanti kieng kep jahagom!

²Ditri tut dihyet tut mindur kin bindo di Allah Di Ninyeng Jei Bibor ndo bida.

³Mbenjen! Nide bindo di ndo brei binye nindig bibor! Mbenjen! Nide mindur di bibon mem nye cem mipbor ngat! Allah ne nibou ndig bijo ninno bijo kikau ri. Ninyeng tak kepti ug hon nohonti bi sren.”

⁴Dibong kei digwam kei ei ditde ig nibou ndig bidiyem bidem njita nyeng hagom.

⁵Noro mpe di gom ne dibong mai leu lene dimumpriem tut mun di buhun bibor bididigit tut. Dingat ningat-hi-ngat nya cem di bindei ba, dingwes mba.

⁶Gima rino dihig yo di ipingok kep dingonti bidem minu Babel hagom kwei leu binhyepo ipai sut mumpriem dima ningat bida.

⁷Tirigi yo di ingon ki kin yo di nung kui yok kin yo di inda dut kin yo di iko mun ibinggok tut ndiyok nya yahagom idem yam ei su leu api dipai sut mumpriem dima biyok noro bit bon ipai ningat bida kan bi.

⁸Mpe dima lene Daniel di ninyeng hi Beltsazar kwei krau ba, ninyeng noyam kin ditde kwar. Ningon mpung tut Allah ninnei a. Gima rino dipai sut mumpriem dima binoni,

⁹“Na di Beltsazar di anyeng tak kep yo di ingon ki nya e, acem. Dikan tut bipia angon mpung tut Allah ninnei ba, angon dorti tut mimun hagom cem. Ma angig atingou mem ditde mumpriem leu api apai igbit mumpriem dima ningat bida.

¹⁰Tirigi dibong mai lene dingat ningat-hi-ngat gom. Biei di jei ndig krop ninjem gom hei ei dihyeisi dini ninggimau.

¹¹Biei dima anai bibor ba, ninjem nindig binddong kei cem. Ninggrupti jei bibor ug bipek kin mpia-bbed him. Apino tungwatu dihyeisi dini hagom ingat biei dima bou igyai him.

¹²Nimeng nggrou ba, ningat di kei-kau-kei ntun him. Ningat dima mang bibor bidem mem tungwatu dihyeisi dini hagom ipuk bigyem. Mindhe-ndhe di yehek bi nya ikkou bibong igbit nohousi. Ha nya cem itot yaham bidem ninda nya ba, mun di ninnei tau nuhwap nsi ninyeng hagom igyem ningat di ntun him nya cem.

¹³Tirigi diba dingon bisrip huk ningat-hi-ngat dima lene dingat malaikati gom srek kwei leu gwamti. Malaikati dima put-put nyen bitindei ser mun nyeng hagom di micut igkep noni.

¹⁴Noni ba nihyet nindig bibor bahara ‘Ma awim biei dima ba, ape ninda cem. Asrop nimeng ba, apuk ningat lene acom hagom hak ug. Ma ajji mindhe-ndhe di ibong nibehei nya kin ha nya di itot yaham ei ninda-nda nyati bingwig ug.

¹⁵Noro ma abet ningwam bijo nijoti leu api aba lante di aba ngkimom nitu kin ngkimom-tembaga bibon bikim leu binhyepo ningwam dima jo nijoti ei susti. Ma asindui sut ba, nggou kui noti leu api bong igbit susti bit mindhe-ndhe nya.

¹⁶Ma asindui sut ba, ningon mindhe luei ningon tungwatu kikau mem nijam ari bingwam muhwindacan.

¹⁷Nye di malaikati di niput-put nyen binitindei ser mun di micut igkep nye nikos tut bak no dima tu. Gima rino suar tungwatu dihyeisi dini hagom ikan tut bipia Allah Di Ninyeng Jei Bibor sindem tut nibou ndig nya bitut inyeng tak kepti nya hagom. Nongkom he rino ta nibou nya bit leu Nonti ningon kanti. Gino joi sut lene Noni ta no di bon ninyeng bi binok nibou ndig bu.’

¹⁸Beltsazar e, gima ne ditde mumpriem hagom ndia ri. Nogindini ma apai igbit mumpriem dima ningat bida. Bit bon yo di ipingok kep dingonti bidem minu Babel hagom ipai mumpriem ningat bida kan bi. Noro ma apai ningat bida kan lewo angon mpung tut Allah ninnei a.”

¹⁹Daniel di ninyeng hi Beltsazar miap nihyet dima lene digit tut ba, nga leu nindig bibor. Apino Nibou Ndig Nebukadnezar pai bak “Ma adigit tut ditde mumpriem kin mumpriem ningat au.” Beltsazar buhup “Andigpoi e, Dillei sut gino ade mumpriem kin nimbot kepti cem hagom bitut nani bi noro bitut ade siceu nya.

²⁰Biei dima jei ndig krop ba, ninggrupti pek mpia-bbed him leu api jo brei ei tungwatu dihyeisi dini hagom igyai him.

²¹Nimeng nggrou ba, ningat di ntun him mang bibor cem ba, dem mem tungwatu dihyeisi dini hagom ipuk bigyem. Mindhe-ndhe di yehek bi nya ikou bibong igbit nohousi ba, ha nya itot yaham bidem ninda nya.

²²Andigpoi e, biei di jei bibor bisindem bibor cem dima ne nani ri. Anyeng jeisi kum eisi kikau ug bipek kin mpia-bbed him. Ade ninyeng tak kepti mbut sindem bibor bikieng kep dihyeisi dini hagom tu.

²³Tirigi na di Andigpoi ayai bong kep biei dima lene malaikati gom juk kwei leu gwamti bipai ‘wim biei dima bisar hak ug noro ma abet ningwam bijo nijoti. Aba lante di aba ngkimom nitu kin ngkimom-tembaga bibon bikim leu binhyepo ningwam dima jo nijoti ei susti. Ma asindui sut ba, nggou kui noti bibong bit mindhe-ndhe nya kikau mem ari bingwam muhwindacan.’

²⁴Andigpoi e, dipai ningat bina. Allah Di Ninyeng Jei Bibor kos tut mun di micut igkep na.

²⁵Tungwatu mijji nani ug ei minu ting leu yok leu api abong bit mindhe-ndhe di tungwatu nya ipijuk bi nya. Ayem mintu-minta dem kep nok sapi nya ba, abong bas hak. Nggou kui nati cem kikau mem ari bingwam muhwindacan. Mpe dima lene angon jo kep bipia Allah Di Ninyeng Jei Bibor sindem tut nibou ndig nya bitut ide ninyeng tak kepti nya hagom ba, Nongkom he rino ta yok bit leu Nonti ningon kanti.

²⁶Malaikati pima yok icuk tungwatu nya bipia ibet ningwam bijo nijoti. Mumpriem dima ningat rino Allah mita nani ba, anok nibou ndig hanyen bu mpe dino angon hukti bipia Allah Nongkom he rino ninyeng tak kep dihyeisi dini hagom.

²⁷Gima rino na di Andigpoi e, ma ace tut ba, abit dipingok nati. Abon sisar bu au. Noro ma aba angon di kwes biyai mun di kei-kau ba, angondut yo di yuhui mbum nya cem. Mpaba tug hon nisinati dima ne mporo ma abong kei agwam kei bijo ninno.”

²⁸Mun dima yok hagom cut igkep da di Nibou Ndig Nebukadnezar.

²⁹Bed simnaibrimigcan gi nidipti bu tirigi diya-ya nyen ei mitou nghousi di jo ei ninten gi nuhu kwei ei ditde ig bou ninjek dip ei minu Babel,

³⁰bidikan “Mbenjen! Siyai bong kep minu Babel di kei bibor kei dini! Siwin side minu dini nok nibousi mem sinyeng tak kepti nok mun di bindo tut side nisindemti kin sinyeng jeisi kin side nikei-kau keisi.”

³¹Nipou tirigi dikes dihyet bigyo rino nihyet gom tibim kwei leu mpia-bbed him bipai bida “Nibou Ndig Nebukadnezar e, angig atingou mem dihyet! Ade ninyeng tak kepti di sindem bibor sindi pror hak leu na.

³²Tungwatu mijji na ug ei minu ting leu yok leu api abong bit mindhe-ndhe di tungwatu nya ipijuk bi nya. Ayem mintu-minta dem kep nok sapi nya kikau mem ari bingwam muhwindacan. Gima leu api angon hukti bipia Allah Di Ninyeng Jei Bibor sindem tut nibou ndig nya bitut ide ninyeng tak kepti nya hagom ba, Nongkom he rino ta nibou nya bit leu Nonti ningon kanti.”

³³Haninyai mun dima yok hagom cut igkep da bit leu nok Daniel nimbot kepti. Tungwatu ijji da ug ei minu ting leu api diyem mintu-minta dem kep nok sapi nya. Nggou kui dati bidibou nta jei bibor dem kep nok hacam krubri ninta ba, dinda ndungwak cem jei binoyam kin ha ninjon.

³⁴Mpe dino nijam ari bingwam muhwindacan ngwig leu lene dikon dibou biditou kep mpia-bbed him leu api dingon tungwatu hanyen bu. Gima rino dinggei sut Allah Di Ninyeng Jei Bibor. Dikon No di niyaijo bijo ninno bijo kikau ninyeng. Allah nok nibou ndig bijo ninno bijo kikau. Ninyeng tak kepti ug hon nohonti bi sren.

³⁵Noni mian huk tungwatu dihyeisi dini bingat lo, idem kep nok yo di ibon inyeng bi ei niyai him. Ninyeng tak kep malaikati nya ei gwamti kin tungwatu dihyeisi dini cem. Bit bon tungwa hi tte tut ningon kanti bihig simber Noni tut niyai munti nya kan bi.

³⁶Tirigi dingon tungwatu hanyen lene Allah ngkwei ditde ninyeng jeisi kin ditde nikei-kau-keisi kin dinyeng tak kepti di sindem bibor hagom hanyen bida. Yo po igya kui da kin nibou nya pima yahagom igya um da bipigo da leu api Allah bindei ba, dinyeng tak kep yok hanyen bu he bi noro dinyeng jei bibor dor njiriek gi nipou.

³⁷Gima rino nogindini da di Nebukadnezar dinggei sut Allah Di Ninyeng Tak Kep Gwamti. Dikuk da bak bidikon ninyeng bijo nai bibor. Niyai munti nya hagom kei-kau-kei bikwes-kwau cem ba, Noni sindem mem gima om yo di ingon jei nya ei nimig him.