Read Hatam DANIEL 6 Bible Online

DANIEL 6 - Hatam bible

DANIEL 6

¹Tirigi niabiati Belsyazar mai leu su lene Darius di nok nibou ndig mem minu Media ta nonti nok nibou ndig mem mben Babel cem. Mpe dima lene Darius de njap ug ei ari bingwam ningot muhwindagom ba, can.

²Jei bi lene Darius kwas ninyeng tak kepti binok hanjop nsi sratus gom ningot can leu api ta nibou nya bibikwop hanjop nsi dima hagom.

³Noni kon Daniel kin nibou nya ibou can bu leu binhyepo ingig igyai kep nibou nindigsi nya binyohou dimig mun di bitut nibou ndig nonti.

⁴Jei bi lene jo nibreisi bipia Daniel nijoi bibor dor njiriek nibou nindigsi nya kin yo cin po ingig igyai kep yok pima yahagom. Daniel nijoi biborti bindei ba, Darius joi sut ta noni nok no di ninyeng jei bibor dor njiriek hiter ei nide ninyeng tak kepti.

⁵Gima rino nibou nya kin yo cin di ingig igyai kep nindigsi nya pima yuhum yam nsi binggok tut Daniel niyai mun tunggweisi nya mem gima ibipai kep noni drek dip. Noro ingat nitunggweisi nya hi bi sren. Lewo Daniel ningon gom ba, bon kep mun di kinei biris ei tungwatu nya dip cem bi.

⁶Gima rino isimbot kep biyam bipai “Bit bon inggok tut mun di ibisrou noni tug hon puig hiter kan bi noro tug hon gi noni bindei mbut nikuk no bak Allahti he.”

⁷Gima rino yahagom yuug ngat nibou ndig bipai binoni “Nnaba na di Nibou Ndig Darius ayaijo ninno!

⁸Nye dino nidimig mun nyeng hagom ei na di Nibou Ndig anyeng tak kepti bitut nibou minu kin wakil kin nibou kintrorti kin yo di inyeng tak kep mitiei kin sekertaris kin nikei kin nibou mem yo di igya ser nya nahagom nice tut yam hyet leu binhyepo na di Andigpoi atri tut nicukti di buhun gom leu binhyepo ade limwa nya yahagom ice tut ba, iba ingon di gom bibit. Gi kei mem na di Andigpoi atri tut nicukti di nibimbiti pai bipia harin dima ade limwa hi hara nide kwar kin tungwatu hiter mem mmun-njap ningot ningai a. Noro suar yahara na di Andigpoi nangkom he. Tungwa tou rino tunggwei nicukti dima ne icom noni ug ei jui di singa nya ibongti.

⁹Nahara na di Andigpoi leu binhyepo aba buk bitak srat nicukti dima lene ajem ninyeng bipia Minu Media Kin Persia Niggai Serti di bit bon na di Nibou Ndig aluei angonti tut kan bi.”

¹⁰Gima rino Nibou Ndig Darius ba buk bitak srat nicukti dima.

¹¹Tirigi Daniel kan tut bipia nibou ndig ba buk bitak srat nicukti dima tu lene noni ngkwei hanyen ug ei nide ig bikui ug ei ninsi di jo ninten hu kwei lene ba nibiau bicom mpia ei mpia di kendera mihyeti kau leu su gom bingat nadi bak Allah bit leu nok niyai kepti. Kendera mihyet dima birok kik minu ndig Yerusalem. Noni ngat nadi ei mpia dima mbiningai bikwop njap ngwa hagom.

¹²Tirigi Daniel de siceu nya igyok igyai kep noni bingat lo, noni ngat nadi bak Allah rino,

¹³yahagom ittei yam ba, yuug kkin kep ninghapti ei nibou ndig noho bei bipai bak “Andigpoi e, aba buk bitak srat nicukti gom di cuon ser tungwatu nya bipia harin dima yahara ide kwar kin tungwatu hiter mem mmun-njap ningot ningai a. Noro suar yahara na di Andigpoi nangkom he. Tungwa tou rino tunggwei nicukti dima bibit bi lene icom noni ug ei jui di singa nya ibongti.” Nibou ndig buhup “Igbit ri. Gima ne Minu Media kin Persia Niggai Serti di bit bon nibou ndig luei ningonti tut kan bi ri.”

¹⁴Leu api ipai bak nibou ndig “Daniel di akat kwei leu nitimieisi ei minu Yehuda kuk no bak na di Andigpoi bibit nicukti di atri tut dima bi. Noro ngat nadi mbiningai bikwop njap ngwa hagom bit leu nok niyai kepti.”

¹⁵Tirigi nibou ndig miap yo dima ibuhupti dima rino ningon buhun bibor binggok puig mem gima biteu Daniel leu hukum. Noni kan-kan nyen tut mun di buhun dini kikau ug bipek mpia jinjuisi.

¹⁶Jei bi lene yo dima ikwei hanyen bigya ei nibou ndig noho bei bipai “Jo nibreisi mem na di Andigpoi bipia srat nicukti dima ne Minu Media Kin Persia Niggai Serti di bit bon na di nibou ndig aluei angonti tut kan bi ri.”

¹⁷Gima rino nibou ndig cuk yo di igya ser nya leu binhyepo ikat Daniel binjei noni ug ei jui singati. Noni pai bak Daniel “Nnaba ade Allah di aba angon di gom bikuk na bak miteu na ba, angwes ngun.”

¹⁸Gima ngwig leu lene yo dima ibei tig mma nindig gom bibikibou kep jui nuhui leu api nibou ndig ba nide buk bitak ser tig mma leu binhyepo bit bon hi teu Daniel leu jui nsi dima biningwes ngun kan bi.

¹⁹Gima ngwig lene nibou ndig ngkwei hanyen ug ei nide ig noro kou sut gi yem njita lene bisindui sut ba, hi gwam ser ningon cem bi. Bit bon noni bong mai mem mmun jei dima kan bi.

²⁰Njap tekti rino noni kiju bibrim nimig ug ei jui dip.

²¹Ug krau lene ba ningon di pri bijem “Daniel, awak Allah di niyaijo e, ade Allah di aba angon di gom bikuk na bak sindem mem gima teu na ba, angwes ngun leu singa nya tu e?”

²²Mbigom lene Daniel buhup “Ma na di Andigpoi ayaijo ninno!

²³Ditde Allah cuk Nide malaikati gom kwei leu api noni tak kep singa yuhui ser leu ba, yaham da bi tu. Noni teu da bidingwes ngun lewo kan tut bipia dingon ngun. Dibon mun tunggwei sut Noni kin na di Andigpoi cem bi.”

²⁴Nibou ndig ningon nggan-triot kei bihig yo di igya ser nya kwei leu binhyepo ibrim Daniel kui leu jui nsi. Tirigi igyai igbit nicuk yokti dima leu lene ingat lo, Daniel tug ndei nibok hi bi lewo noni ba ningon com nide Allah.

²⁵Leu api nibou ndig cuk yo di igya ser nya bikat yo di ibakilak Daniel pima kwei leu api injei yok ug ei jui singa dimati bitut itnem bat kin imunggwom bat nya yahagom. Nipou tirigi icut kikau ug ei jui jou dima bigyo lene singa yaham yok bikinam injum bingwig.

²⁶Gima ngwig lene Nibou Ndig Darius pas srat nimeng gom bak timiei minu nya kin mben nya kin gi imbrap ighyet hiter nya ei dihyeisi dini hagom bipai biyok “Jahagom jicem o!

²⁷Dicuk tungwatu nya di ibong bidem dinyeng tak kepti nisurti-nipekti hagom leu binhyepo ittin tut Allah di Daniel kuk no bak ba, ikuk yok bak! Noni ne Allah di niyaijo bijo ninno bijo kikau ri. Nide ninyeng tak kepti jo kikau ug bipek kin njap ningwig honti. Bit bon hi bindei ba, Allah ninyeng tak kepti pror yon kan bi. Nide nisindemti cem ug hon nohonti bi sren.

²⁸Noni teu tungwatu nya bikwek yok leu mun di kat yok apino ingwes ngun. Noni bibon mindur kin bindo ei mpia-bbed him kin dihyeisi dini cem. Noni teu Daniel leu singa nya yuhui him leu api bit bon yaham noni kan bi.”

²⁹Lo bi lene Daniel yai ninyeng jei kikau mem nijam Darius ninyeng tak kep kin nijam di Kores leu minu Persia ninyeng tak kep.