Read Hatam DANIEL 7 Bible Online

DANIEL 7 - Hatam bible

DANIEL 7

¹Mpe di Belsyazar ninyeng tak kep mem ari bingwam gom tu lene dibong mai mem mmun gom leu api dimumpriem bidingat ningat-hi-ngat. Dipas kep ditde mumpriem ei srat meng gomti,

²bitut ningat-hi-ngat di dingat bou diyai him. Hou di nimig ten bibor cut kwei leu mpia nisurti-nipekti bibindei ba, muk ningwa dip tti nindig bibor.

³ Jei bi lene mindhe di nindig bibor ningut bitai ikiju kui leu muk jou ba, hagom ter leu yam.

⁴ Mindhe gi nigom noyam kin singa noro bon ninyehei dem kep nok hacam krubri ninyehei a. Tirigi diyai bong kep mindhe dima rino hi puk ninyehei bitiba lene tas noni biya pijum noyam kin tungwatu leu api yai nintin tungwatu bak.

⁵Mindhe gi nican di noyam kin beruang ba nimig gi ninghim biya. Noni ham ninggang njum ningai ser nuhui. Lene dimiap nihyet gom tibim kwei bipai bak “Gima ne ayem mikwau bit leu angon kanti hak ug!”

⁶Tirigi diyai bong kep ningat-hi-ngat dima lene mindhe ningut gom kin bu di noyam kin macan tutul tau kwei. Noni bon ninyehei bitai noyam kin ha ninyehei di ntun nitta kin nibou bitai cem ba, yai nisindemti mem gima ninyeng tak kep.

⁷ Tirigi diyai bong kep ningat-hi-ngat dima lene mindhe gi nibitai tau kwei. Mindhe dini sindem bibor cem anjan bibor cem bibindei ba, didigit tut nindig bibor. Noni ba nikwai nindig di nggwes nok ngkimom nitu baham nide siceu nya binem-nnai biduhwen yok leu api co kep nindigsi di noni bindei timek nya. Mindhe dini ter leu nindigsi nya lewo nibou nggai simnai ntun him.

⁸ Tirigi diyai bong kep ningat-hi-ngat dima lene dingat lo, nibou nggai gom kin bu ntun him nibou nggai nggreti nya. Nibou nggai dini nimien lo, sindem mem gima tiba nibou nggai ningai gi hiter bicom hak leu. Nibou nggai dini bon niyai kin nuhui noyam kin tungwatu ba, ningon jei binggei-nggwang tut nonti nindig bibor.

⁹ Tirigi diyai bong kep ningat-hi-ngat dima lene dingat banggo mbrei poi di sindi ikwei prion ei. Leu api No di niyaijo bijo ninno bijo kikau kwei gwam ei banggo mbrei gom dip. Noni juk sinsun di tiei kei ba, nibou nta dem kep nok bungguma. Banggo mbrei dima bon nimig nok kroba nimig ba, hagom piga kei noyam kin hum di srei nidweb a.

¹⁰ Hum dwim kwei leu banggo mbrei dima noyam kin minyei di biam kwei leu minyei bousi. Nide awak nya ibou sribu-ribu kin tungwatu nindigsi di imangti ibou juta-juta igya ei nimig him. Tto bou dem mem nikei mbus tungwatu nya ingonti leu api noni mbrek leu srat nya.

¹¹Tirigi diyai bong kep ningat-hi-ngat dima lene dimiap lo, nibou nggai mien pima nggei-nggwang tut nonti kikau. Mpe dima lene mindhe nibitai tug ndei nimai ba, icom noni ug ei humti leu api hum yem noni bingwig.

¹²Lene hi cut mindhe-ndhe ningut ningai gi nindigsi nya ide nisindemti bingwig leu yok lene sindui sut bigyaijo mem nijam poi bu bibou tto bou dem ug e.

¹³ Tirigi dingat ningat-hi-ngat dini bou diyai him mem mmun dima lene dingat mun nyeng gom kin bu di noyam kin tungwatu. Noni mbut kwei ndam da lo, bumbuhui nggai kep noni. Noni mbut ndam No di niyaijo bijo ninno bijo kikau ba, ibindo noni bak.

¹⁴ No di niyaijo kikau yai ninyeng di jei kin nisindemti binoni noyam kin nibou ndig. Apino bikwop timiei minu nya kin mben nya kin gi imbrap ighyet hiter nya yahagom ikuk yok bak. Nide nisindemti jo ninno bijo kikau ba, ninyeng tak kepti ug hon nohonti bi sren cem.

¹⁵Ningat-hi-ngat di dingat bou diyai him dima bindei bidingon kiowi tut ba, dingon buhun nindig bibor cem.

¹⁶Gima rino dibrim dingkek kep tungwagom di ningat rin ei sirima bidahara noni leu binhyepo mbot kep tut mun dima hagom bida. Gima rino noni coi ei ningatti bipai igbit bida.

¹⁷“Mindhe ndig ningut bitai dima ne nibou ndig ibou bitai bitut ide ninyeng tak kepti di mikiju ei dihyeisi dini ri.

¹⁸ Noro Allah Di Ninyeng Jei Bibor De limwa nya migyai nisindemti leu binhyepo inyeng tak kep tungwatu nya yahagom ba, ide ninyeng tak kepti dima jo ninno bijo kikau.”

¹⁹Gima leu lene dijoi sut dikan tut nimbot kep mun ningat tut mindhe nibitai di noyam kin mindhe-ndhe nindigsi nya bi dima. Gi hi dima bindei ba, didigit tut nindig bibor lene ba ninjon ngkimom-tembaga kin nikwai ngkimom nitu baham nide siceu nya binem-nnai biduhwen yok leu api co kep niken-ken di noni bindei timek tu nya.

²⁰Lene dijoi sut dikan tut nibou nggai simnai di ntun him kin nibou nggai mien di ntun him bu di bindei ba, nibou nggai nindigsi nya ningat ningai hom bingwig leu pima. Lewo nibou nggai mien bon niyai kin nuhui noyam kin tungwatu ba, ningon jei binggei-nggwang tut nonti nindig bibor. Nibou nggai nimien dima bindei ba, dingon ttin bibor.

²¹ Tirigi dikan-kan nyen tut nibou nggai dima rino noni kon pran bit Allah de limwa nya leu api bindei timek yahagom.

²² Leu api no di niyaijo kikau pima kwei bikos tut bak Allah Di Ninyeng Jei Bibor De limwa nya bipia ingon kwes. Tto bou dem mem Nide limwa nya igyai nisindemti mem gima inyeng tak kep tungwatu nya tu.

²³No di tri tut nimbot kepti pai bida “Mindhe nibitai pima ne nibou ndig nibitai bitut nide ninyeng tak kepti di mikieng kep dihyei nisurti-nipekti di ter leu nibou ndig nindigsi yahagom ri. Ninyeng tak kepti dima mibindei sar biduhwen dihyeisi dini leu api bico kep tungwatu nya yahagom di noni bindei timek yok tu nya.

²⁴ Nibou nggai simnai pima ne nibou ndig ibou simnai ide ninyeng tak kepti di kieng kep dihyei nisurti-nipekti mem nijam dima ri. Jei bi ne nibou ndig gom kin bu tau kwei noro noni titer leu nibou ndig nindigsi nya. Noni bindei cut nibou ndig ibou ningai pima bitimek bingwig.

²⁵ Nihyet wer mpiahi tut Allah Di Ninyeng Jei Bibor bihwen bit Allah de limwa nya cem. Noni brim ningkek mem gima nggek tut limwa dima yok ide niggai serti nya kin ide njap ndig nya cem ba, ninyeng tak kep yok mem ari bingwam ningai ba, bed muhwindagom.

²⁶Mpe dima lene tto bou dem mem nikei gwamti mbus tungwatu nya ingonti leu api noni micug nibou ndig nimien pima nisindemti bingwig leu noni lene bindei cut noni bitimek bingwig.

²⁷ Mpe dima lene Allah Di Ninyeng Jei Bibor miyai ninyeng tak kepti ide nisindemti kin nikei-kau-keisi ei dihyei nisurti-nipekti hagom bak Nide limwa nya. Ide nisindemti mem inyeng tak kep mijo ninno bijo kikau leu api nibou ndig dihyeisi dini yahagom mikuk yok biyok bibit ighyet.”

²⁸Nimbot kepti nohonti ndia ri. Lene dittin tut nindig bibor ba, diimaisi hai. Dimbot kep tut ningat-hi-ngat dima bak hiter bi noro diku hagom nyahan ei dingon bei.