Read Hatam DANIEL 8 Bible Online

DANIEL 8 - Hatam bible

DANIEL 8

¹Belsyazar ninyeng tak kep ba, ari bingwam gi niningai lene dingat ningat-hi-ngat gom kin bu.[2]

²Ei ningat-hi-ngat dimati ne dingat lo, dingat rin ei hanjop Elam ei minu ndig Susan di nok minu ndig nipmem ei minu Persia. Diya dideu Minyei Ulai,

³bidingat lo, domba nikre ningut gom di bon nibou nggai can di sindi ntun him. Gi hi di ntun him abia bu jei ba, jep-jau cem dor njiriek gi hi di ntun him bibie.

⁴Dingat lo, domba nikre dima ba nibou nggai bidat mpia ei nite bei mpia nicutti kin nite bei mpia nijjai kin nite bei mpia nibiho. Mindhe hi di sindem mem gima tte tut noni ba, ningwes ngun leu ninda nsi bi. Domba nikre dima yai mun bipek kep nonti ningon kanti apino ningon jeisi kum eisi bu.

⁵Dibisrip huk mun dima sri lene dingat lo, kambir nikre ningut gom dor sindem kros kwei leu nite bei mpia nicutti. Noni dor sindem bibor ba, nimig jou gingget dihyei njek dip bi. Nibou nggai di mipbor ngat ntun niyai cin ikieti.

⁶Kambir nikre dor hallu bicut igkep domba nikre po dingat ei minyei pimat pima leu api ba niten bihwen.

⁷Dingig diyai kep noni tirigi cut igkep domba nikre bihwen. Kambir nikre ba niten-pos bidat apino bindei dahat nibou nggai po ntun domba nikre him hacem. Domba nikre sindem mem gima hwen kambir nikre di njei ug ei dihyeisi bico kep nyen-nyen bi. Ba, tungwa hi di mpu domba dima cem bi.

⁸Kambir nikre ninyeng jeisi bikum eisi bijei bibor. Noro ninyeng jeisi ug hon nohonti lene nibou nggai di mipbor ngat dahat. Leu api nibou nggai bitai di mipbor ngat bu ntun him nidahat leusi hanyen. Nibou nggai bitai dima birok kik nite bei mpia di ter leu yam.

⁹Leu api nibou nggai nimien gom ntun nibou nggai bitai dima gom him binindig bibor ba, ninyeng jei cem. Nide nisindemti mbut bidem nite bei mpia nibiho kin nite bei mpia nipriti bimbut ug ei nite bei minu di kei-kau dor njiriek minu nindigsi nya.

¹⁰ Nibou nggai dima nide nisindemti kum eisi binindig ba, wer dem mem gima hwen ham mpia-bbed him nya binjei ham ningat poi ug ei dihyeisi bico kep nyen-nyen.

¹¹Nibou nggai dima nihyet jei kep TUHAN di nok nibou tentara gwamti bibindei ba, midut gi nindig mindhe ei nimbar hum dokti bak nibou tentara gwamti bikwop njap-njap dima kes hon lene noni nggek TUHAN De Ig cem bitti.

¹²Leu api yo di ingat rin ei sirima sindi ibon mun tunggwei tug hon gi ibrim ingkek tut midut nindig mindhe ei nimbar hum dokti bit leu igyai kepti bu bi. Nibou nggai dima njei TUHAN de midut di nijit nya ug ei dihyeisi ba, nibon munti nya hagom pek kep bit leu ningon kanti.

¹³Leu api dimiap malaikati gom di pai bak nisut malaikati hiter “Mun di singat brei tug hon ningat-hi-ngat dima mimbut bipek njap pig bu i? Sisar nindig dima mimbut bico kep midut gi nindig mindhe ei nimbar hum dokti bikwop njap-njap dima mbut bipek njap pig bu i? Nibou nggai dima mico kep tentara gwamti kin TUHAN De Ig bipek njap pig bu i?”

¹⁴Dimiap nisut malaikati hiter buhup “Mun dima yok mimbut ug bipek njap sribu gom sratus gom ningot muhwi bu. Midut gi nindig mindhe ei nimbar hum dokti bikwop mmunti kin njap tekti mimbut mem nijam dima yok bi. Gima leu api map mikui TUHAN De Ig bu bi lewo Nide limwa nya mipindi Ig dima binok gi nipou hanyen.”

¹⁵Tirigi dibingon mem gima dingon huk niti tut ningat-hi-ngat dima nimbot kep ningatti lene no di noyam kin tungwatu kwei ya kros ei doho bei.

¹⁶ Dimiap nihyet gom hara kwei leu Minyei Ulai nite dima ug di pai “Gabriel e, ambot kep tut ningat-hi-ngat dima bak no dima!”

¹⁷Leu api Gabriel di ya doho bei dima son dideu da apino didigit tut nindig bibor biditti ug ei dihyeisi. Noni pai bida “Na di tungwatu di ayaijo kikau bi e, suar akan tut bipia ningat-hi-ngat dima bindo tut nijam ningwig honti ri.”

¹⁸Tirigi noni mbrap kep bit da lene no dinghuisi mbris biditti ei dihyeisi yo. Noro noni su ninda bibrim da kui ba, dikiju bidiya hanyen. Leu api noni pai,

¹⁹“Midindo brei bina tut mun di mipek kep ei nidipti bu tug hon Allah de nigga biborti. Lewo ningat-hi-ngat di angat pima ndo tut nijam ningwig honti ri.

²⁰Domba nikre di bon nibou nggai can di angat bibie bindo tut nibou ndig minu Media kin nibou ndig minu Persia bitut ide ninyeng tak kepti.

²¹Kambir nikre bindo tut minu Yunani bitut ninyeng tak kepti ba, nibou nggai di mipbor ngat di ntun niyai cin ikieti pima ne nibou ndig gi nipou ngig-ngat ri.

²²Nibou nggai bitai di ntun him niabiati nibou nggai gi nigom dahat leu pima ne bindo tut minu Yunani ninyeng tak kepti di kwas binok ninyeng tak kepti bitai ri. Noro ninyeng tak kepti dima yok ide nisindemti noyam kin ninyeng tak kepti gi nipou ngig-ngat pima nide nisindemti bi.

²³Dideu ninyeng tak kepti dima yok ningwig honti lene ide mun di kinei bibor kui bipek nipekti leu api nibou ndig di ningkek ndok di ris kep mun cig mikiju ba, ninyeng tak kep bu.

²⁴Ba, nide nisindemti mikum eisi bibor noro nisindemti dima tug hon nonti bi. Noni mibindei ba, nibindei timek buhun biborti cut igkep tungwatu nya. Noni yai mun bipek kep ningon kanti lene bindei sar yo di inyeng jei nya kin Allah de limwa nya cem.

²⁵Noni yai mun bipek kep niris ei tungwatu nyati lewo noni ne niris kep mun cig ri. Noni mikon nonti lene bindei sar yo di imang bibor kros nipou tirigi sok kep yok tut bigyo. Mbenjen! Noni miyai nibou tut gi hwen bit Nibou Ndig Di Ninyeng Jei Bibor cem. Noro noni mitug ndei gi cut bisar bihigomti lo, gima tug hon tungwatu nya ide nisindemti bi.

²⁶Ningat-hi-ngat tut midut nindig mindhe ei nimbar hum dokti bikwop mmunti kin njap tekti di hi mbot kep tut pima mipek kep nijit-jau a. Noro gima yok mipek kep ei nijam gi nidipti bu di no ting yo. Gima rino ma ambot kep tut bak tungwa hi au.”

²⁷Leu api dinghuisi mbris ba, dinggwen njap poi drek dip ningat-hi-ngat di dingat dima. Gima ngwig leu api dikiju hanyen bidinda jo kep midyai di nibou ndig cuk da tut hanyen. Dikan-kan nyen tut ningat-hi-ngat dima yok ba, dingon mbut-mbut nyen drek dip lewo dingon guhuk niti tut bi.