Read Hatam DANIEL 9 Bible Online

DANIEL 9 - Hatam bible

DANIEL 9

¹ Ari bingwam gi nigom di Darius di nitimieisi leu Media di nicig ninyeng Ahasyweros ninyeng tak kep minu Babel lene da di Daniel dikwop-kwop nyen Allah nihyet di Noni yai bak mben Yahudi. Diba dingon bisrip huk minu ndig Yerusalem di tug ndei hukum mem nijam ari bingwam ningot muhwindacan bit leu nok TUHAN pai ei mem nabi Yeremia.

³Leu api duhuk nadi kikau bak TUHAN Allah leu binhyepo Noni ngondut Nide limwa nya. Diyem njita bi mem nituti poi bidijuk sinsun kron cem ba, dikuk da bidigwam atriemti.

⁴Lene dingat nadi bak TUHAN di nok ditde Allah bidipai jit sisar di dide bat mben Israel nya ibon tut Noni bidipai “TUHAN e, anyeng jei bibor ba, nikuk nye ei Aho bei. Angon gom tut mun di apreu ei mem nye nipou su ba, angondut yo di ingon ngakei Nani bibit Ade nicuk yokti nya.

⁵Nibon sisar binimbuk bibor ba, nibon mun tunggwei sut Na cem. Naham nimbuk kep Na binikou sut Ade nidimigsi nya biniba ninghim bak angon kanti di kei bibor mem nye cem.

⁶Ningig nitingou mem Ade awak di nabi nya ighyet tirigi itri tut ahyet tug hon anyeng bak nyende nibou ndig nya kin yo di ibie tut nye kin nidigup bat-nidigai bat nya kin mben Israel yahagom bi.

⁷TUHAN e, ayai munti nya hagom igbit. Noro nye di timiei minu Yudea kin minu ndig Yerusalem kin mben Israel di abindei binintek gimahap ug ei ningkiaisi kin minu di dideu nya hagom drek dip ningon gom tut Na bisi lene gima bindei ba, nimmai sut nyenti.

⁸Nyende nibou ndig nya kin nibou mien nya kin nidigup bat-nidigai bat nya yahagom igyai munti nya kinei bibor ba, ibon sisar tut Na di TUHAN.

⁹Mbro nok gino naham nimbuk kep Na lo, angon nggriu sut nye ba, akos ser nyende sisar tu.

¹⁰TUHAN di nok nyende Allah e, ningkek ndok tut ahyet tirigi asok kep nye bipia suar niyai munti nya hagom dem igbit Ade niggai serti nya di ayai binye tug hon Ade awak di nabi nya.

¹¹Mben Israel yahagom ipigau Ade niggai serti nya ba, itingou ndok ser ahyet. Nibon sisar tut Na apino ambriom nye bit leu nok Ade awak di Musa pas tut ei nide niggai serti nya.

¹²Akes hukum ei nyeni dip kin nyende nibou ndig nya dip cem bit leu nok apreu ei mem nye nipou su. Abindei ba, minu ndig Yerusalem tug ndei hukum nindig bibor dor njiriek minu nindigsi nya ei dihyei nisurti-nipekti hagom ide hukum.

¹³Abindei ba, hukum di Musa pas kep tut ei nide srat niggai serti nya hagom cut igkep nye tu. TUHAN di nyende Allah e, mbro nok gima lo, nikou sut gi nibindei angon llei sut nye. Nimbres nyenti leu sisar di nibon nya bi wer ninno tu biniyok ngon kep Ade ningginau nyeti nya cem bi.

¹⁴TUHAN di nyende Allah e, atin ei hukum mem nye nipou su leu api abindei ba, hukum dima cut igkep nye lewo ayai munti nya hagom igbit ba, sren-srau cem noro nikou sut gi ningig nitingou mem ahyet.

¹⁵TUHAN di nyende Allah e, ando Ade nisindemti tirigi po abuwak Ade limwa nya kwei leu minu Mesir. Tungwatu nya yahagom igyok ngon kep Ade nisindemti dima kikau kwei bipek ammani kep. Noro nibon kep sisar biniyai mun tunggwei cem tu.

¹⁶Aya srak ko hagau nye nipou su. Gima rino ma angon sibui sut minu ndig Yerusalem kikau au. Minu ndig dima ne Ade minu ndig kin Ade nungug tou di kwes-kwau ri.[3] Tungwatu di ibong bidem minu di gahai minu Israel inim kep minu ndig Yerusalem kin Ade limwa nya cem drek dip nyende sisar kin nidigup bat-nidigai bat nya igyai munti di mbuk bibor nya.

¹⁷Allah e, ma angig atingou mem dihyet kin ditde nahara binati tug hon nadi. Ma apindi Ade Ig di yo di imbuk nya inggek bingwig hanyen leu binhyepo tungwatu nya yahagom mikan tut bipia Nangkom he rino Allah.

¹⁸Allah e, ma amiap kep nyeni nihyet. Ayok ayai kep mun di buhun di cut igkep nye kin Ade minu ndig di ibijem kin anyeng di nggek bingwig su. Ningat nadi bak Nani drek dip niyai munti di kei bibor nya bi. Noro ningat nadi lewo angon nggriu sut nye.

¹⁹TUHAN e, ma angig atingou mem nyeni nihyet ba, akos ser nyende sisar cem ba, ayok ngon kep nyeni cem leu api ma ayai abou tut nye haninyai! Ma abinyen au leu binhyepo mijo nibreisi mem tungwatu nya yahagom bipia Nangkom he rino Allah! Lewo anyeng tak kep minu ndig Yerusalem kin Ade limwa di ningat-ngat nya.”

²⁰Duhuk nadi kikau bidipai jit ditde sisar kin dide bat mben Israel ide sisar. Dibidip huk TUHAN di ditde Allah leu binhyepo Noni pindi Nide Ig bikei hanyen.

²¹ Nipou tirigi dikes dihyet bigyo rino malaikati Gabriel di dingat bou diyai him tug hon ningat-hi-ngat pima dwop juk kwei biya simiak da. Noni kwei krau tirigi jam dem mem mben Israel ibon midut ei nimbar hum dokti mem mmunti.

²²Leu api noni ngginau da bipai “Daniel e, dikwei mpu na leu binhyepo angon hukti tut ningat-hi-ngat dima.

²³Tirigi sindi ahara bak Allah pima ne Noni buhup ahyet. Dikwei mbot kep bina lewo Allah ningon ngakei na. Ma angig atingou mem dihyet lewo dicoi ei ningat-hi-ngat dima ningatti bidipai bina ri.

²⁴Allah kos tut bipia ug ei nijam ari bingwam nitindur sratus bitai ningot muhwindatai ne Noni kwek asut bat mben Israel nya kin jide minu ndig di kwes-kwau dima leu sisar kin mun di mbuk nya ri. Noni kos ser sisar leu api ta ninyeng tak kepti di sren-srau di jo ninno bijo kikau leu binhyepo ningat-hi-ngat bitut nimbot kepti dima dem igbit ba, Nide limwa nya ipiga TUHAN De Ig di kwes-kwau hanyen ei mem Noni.

²⁵Ma apas kep dihyet dini ba, ayok ngon kep bipia tirigi nicukti tibim mem gima ipindi minu ndig Yerusalem hanyen kikau ug bipek no di Allah ta mem gima bie tut yok nikweisi dima yem ari bingwam nitindur sratus bitai ningot muhwindatai. Ipindi minu ndig Yerusalem hanyen bitut simpak nya kin tentara nibousi di igya coi nya di bikrop ttai minu dima bijo nok mem ari bingwam nitindur sratus bitai ba, ningot ningai bitai. Noro nijam dima mpung tut mun di buhun bibor.

²⁶Tirigi nijam dima ug hon nohonti ne no di Allah ta mem gima bie tut yok bon mun tunggwei hi bi lo, noni tug ndei nimai. Nibou ndig di sindem bibor gom de tentara ikon pran bit mben Yerusalem bibindei timek yok bitut itimiesi kin TUHAN De Ig hagom bitimek bingwig. Nijam dima nohonti cut igkep yok dem kep nok minyei di su di biam tut pran kin mun di binggek yok bingwig di Allah tin ei mem yok.

²⁷ Nibou ndig pima kin tungwatu nya imang bibor iba ingon gom bipreu ei mem yam kikau mem ari bingwam muhwindacan bu. Ug ei nijam dima nahacanti lene noni ggai ser nibon midut ei nimbar hum dokti kin munkwas di igyai bak Allah. Noni bindei ba, nide awak nya itas Nisibutti Di Bindei Map Kui TUHAN De Ig[4] biya anai ei ig bou ninjek dip bijo nijoti kikau bibou nibou ndig di bindei dima tug ndei hukum nimai di Allah tin ei mem noni ug e.”