Read Hatam HOSEA 10 Bible Online

HOSEA 10 - Hatam bible

HOSEA 10

¹Nipou ne mben Israel idem kep biei anggur di ningat hun tut. Ndigban di inyeng tut kum eisi bimang lene nimbar hum dok di iwin cem kum eisi bimang. Mun nyeng hagom di dem mem yok kum eisi lo, itas cou tig di kei-kau bibiyok ngon kep ide kwar di ikuk yok bak nya.

²Nogindini suar yo di ingon sren bi dima ibiang ide sisar di ibon nya nibuhunti. Allah mibindei timek nimbar hum dok di ide nya binjei cou tig nibiyok ngon kep ide kwar di ikuk yok bak bitti ningwig yon.

³Jei bi ne yoni mipai biyam “Ide nibou ndig hi ninyeng tak kep nye bi drek dip nittin tut Allah bi rin. Apo gi nibou ndig gom di ninyeng tak kep nye dima bon ninyeng mem nye e?”

⁴Isuglai mun bipreu-preu gwai biyam ba, ingot kep yam bingkiem kei tut gi preu di ipreu biyam di bon ninyeng bi cem. Ikiek-kiek nyen nikos tutti di sren kei di jo tu bibindei ba, mun di sren kei bi hei. Ba, gima dem kep krisieu kioi di hei ei miai di ikkin mingau ei su.

⁵Timiei minu ndig Samaria nya ittin. Yoni kin imam di ide nya di igyai midyai mem kwar sapi di iba mas bibon ei Betel[9] ingon ngguk bipim. Lewo ide kwar di ikuk yok bak ninyeng jeisi sar yon tu.

⁶Yoni mikon kwar dima ug ei minu Asyur binjei nok mun di ibigo belasten bak nibou ndig minu Asyur di ninyeng jei bibor. Mben Israel ibit ide ningon kanti di itin ei di bindei ba, itug ndei nimmaisi kin nisuwokti.

⁷Minu ndig Samaria kin nibou ndig mitimek bingwig dem kep biei nnir gom ngat di minyei hwen.

⁸ Siceu nya migya kep ig ngot di ingot ei mbigdip Betel[10] di nok mpia di mem ide kwar di mben Israel ikuk yok bak eisi bingwig. Ndia nggwen kin mintu-minta mehei ei nimbar hum dok di ideti. Leu api limwa nya yahara bak nungug nya “Ma jiprioi kep nye o!” Lene yahara bak mbigdip nya “Ma jitti hwen nye o!”

⁹ TUHAN pai “Nipou tirigi mben Israel yuum mun di cut igkep yok ei minu ndig Gibea[11] kikau kwei bipek ammani kep ihwen bit Da ba, igikes hon nihwen bit Dati bi. Gima rino pran mahatap yok bicut igkep yok ei minu ndig dima.

¹⁰Midiba siceu bihwen yo di ibon sisar dima bidikes hukum ei yok dip. Ngkiai nya mibicom yam mem gima ihwen yok lene hukum micut igkep yok drek dip ide sisar ngot di ibon nya.

¹¹Nipou yo ne mben Israel idem kep sapi nibo yo di ibiyai midyai kan ba, joi bibor tut gi co kep gandum nyen. Dijoi sut gima diba biei koisi bisrou nikimam di kei dima bi. Noro nogindini dikos tut mem dibidip huk noni mem gima yai midyai di buhun. Dicuk mben Yehuda mem gima iba bajak bikkin dihyei. Dicuk mben Israel mem gima iba akikam biroi dihyei bindung bram.

¹² Dipai ‘Mben Israel e, ma jiyai miai nijep mem jenti lene ma jindim ningan ningon srenti eisi. Ma jipuk ningat di kei di ntun him jide ningon di ngakei Dati di nijit a. Lewo njap dem mem gima jingkwei hanyen ndam Da di jide TUHAN tu. Leu api midikwei bidinjei Ditde mun di kei bije.’

¹³Noro jibon mun di dor tunggwei gima bijibrim jingkek tut gi jiyai kep mun di kinei bibor apino jipuk ningat ningon srenti hi bi. Jiyem kep ningat di ntun him jide niris munti nya.” TUHAN binut bu bipai “Mben Israel e, jiba jingon com jide kroba pran nya kin jide tentara nya di imang bibor dima,

¹⁴apino pran cut igkep jide limwa nya ug a. Siceu nya migya kep jide tentara nibousi di jiya coi nya hagom bibindei ba, timek bingwig. Gima noyam kin mpe di Nibou Ndig Salman bindei sar minu ndig Bet-Arbel ei pranti. Mpe dima lene noni co kep munggwom nya kin ipmem bat nya binem-nnai hak.

¹⁵Timiei minu ndig Betel e, mun di buhun dima micut igkep je drek dip mun di kinei nindig bibor di jibon nya. Tirigi ikon pran bit yam mem mpia nipriti rino jide nibou ndig mitug ndei nimai.”