Read Hatam HOSEA 11 Bible Online

HOSEA 11 - Hatam bible

HOSEA 11

¹ TUHAN pai a “Dingondut Israel habiei nimien yo ba, dihig dimunggwom dima kwei leu minu Mesir.

²Noro tirigi dihig kikep yok ninyen lene ibimbut ninna leu Da leu api imbres yonti leu Da bikum eisi bu. Ditde limwa nya indig mindhe-ndhe ei nimbar hum dokti bak Baal bindig biei nggrai di ui-gwang kei bak kwar nya.

³Mbro nok gino dipingok mben Israel tut gi imbut imig ba, diba dingon di nem nggriou yok bidinyohou yok cem lo, ijoi sut Da bikuk yok biDa bi.

⁴Diba dingon di nggriu kin dingon di ngondut yok bibrim yok hanyen dideu Da lene dibindei ba, inggwenti nya buhun haigtu bi ba, diba dibou coi bitri njita tut yok cem.

⁵Noro mben Israel ikou sut gima ingkwei hanyen ndam Da. Gima rino suar ingkwei hanyen ug ei minu Mesir ba, mben Asyur inyeng tak kep yok.

⁶Ide siceu nya mikon pran bit yok ei itimieisi binggek dimbou pmem nya hagom leu binhyepo ihwen Ditde limwa nya bibindei ba, itimek bingwig. Mun dini yok hagom micut igkep yok drek dip igyai munti nya hagom di bit leu yonti ingon kanti ba,

⁷iba ingkek di ndok bikiek yoho ter leu Da cem. Gima rino yoni mitug ndei mun di buhun di micut igkep yok. Mbro nok gino yahara hiter mem gima kwei mpu yok lo, bit bon hi teu yok bingwes ngun kan bi.”

⁸ TUHAN pai “Je di mben Israel e, bit bon disindui sut je bidikes je ei kan bi. Mbro nok gino dibindei ba, mben Adma isar bingwig ba, dibibon mben Zeboim[12] kinei lo, gino dibibon je nok gima ne gima dem dingon bi lewo dingondut je nindig bibor!

⁹Midiba dingon sibuisi bikes hukum ei jeni dip bidibindei ba, jitimek bijingwig bu bi sren. Lewo Dani ne Allah rin ba, dinok tungwatu dihyeisi bi. Dani ne No Di Kwes-Kwau ri. Dingat rin bit je ba, dingon sibui sut je hanyen bi cem.”

¹⁰TUHAN binut bu bipai “Gino diyau noyam kin singa niyausi ne dibindei ba, ide siceu nya idigit leu api Ditde limwa nya mibit Da. Ditde limwa nya mibrim imig kwei haninyai leu nite bei mpia nicutti kwei mem gima ikuk yok biDa.

¹¹Yoni mikwei didiyam leu minu Mesir noyam kin ha di dimba ba, ikwei leu minu Asyur noyam kin nimpung hakimoi mbrei. Leu api midibuwak yok hanyen ug ei ide ig bei nya. Da di TUHAN disimbot dat tu.”