Read Hatam HOSEA 13 Bible Online

HOSEA 13 - Hatam bible

HOSEA 13

¹Nipou yo ne keret hi ter nya ibou cut bak keret Efraim. Gino keret dima kes nihyet di buhun kwei ne keret Israel nindigsi nya ittin. Noro keret Efraim ibon sisar tug hon gi ikuk yok bak kwar Baal. Gima rino yoni mipror bingwig hak.

²Keret Efraim dima no ibon sisar kikau kwei bipek ammani kep. Iba perak bibon kwar nya bikuk yok bak. Kwar dima yok intun tungwatu nya ide nikan-kan nyenti him leu api tungwatu ibon bou inda him. Itri tut “Ma jibon midut nindig mindhe ei nimbar hum dokti ba, jibikuk je bak kwar dini yok!” Mbenjen! Yo dima imei kwar sapi pmot cem!

³Gima rino yoni mipror hak bidem kep bumbuhui kin nggou njap tekti. Yoni idem kep gandum nicap di pri bibit hou nimig ei mpia di ico kep gandum eisi ba, inoyam kin hum mmup di brou leu kau ngkimom nitu cem.

⁴TUHAN pai “Dani ne TUHAN bidinok jide Allah rin ba, dibuwak je kwei leu minu Mesir. Dangkom he rino jide Allah lene hi ter hi bi. Dangkom he rino diteu je bijingwes ngun.

⁵ Tirigi jimbut-mbut nyen ei bigum ndigsi di bon bigum brei di kinei bibor lene dinyohou je.

⁶Noro tirigi jicoi ug ei minu di nnum kei bijiyem njita bidem njita nyeng hagom bijibong kei jigwam kei bijei bi lene jingon jei ba, jingon prion ser Da cem.

⁷Gima rino midittem je noyam kin singa di ttem mun di yem. Dikos dik sir jide puig dem kep nok macan tutul.

⁸Midittem je noyam kin beruang niwek di nimien nya sindi ipror leu noni leu api dibriug-briug nyen je. Midaham je bijingwig ei jiyati dem kep nok singa di ham mun di yem ba, noyam kin mindhe bigbehei di ttem-ttem nyen je ba, jibitun-ta.

⁹Je di mben Israel e, midibindei ba, jitimek bijingwig! Lene tou rikwei mpu je i?

¹⁰ Jahara Da tut nibou ndig kin no di bie tut je nipou su noro nogindini yoni yuug ei siritou i? Isindem mem gima iteu je bijingwes ngun e?

¹¹ Diba dingon di sibui bindo jide nibou ndig nya leu api diba Ditde nigga biborti bipos yok bingwig hanyen leu je.”

¹²TUHAN pai “Dipas kep mben Israel ide sisar kin ide mun di igyai tunggwei nya hagom ei su ba, dikon srat dima ei nijoti tu.

¹³Nituti mem mben Israel igyaijo tau su noro ingon mbum bibor bibrim ingkek mem nituti dima bi. Inoyam kin ningwoi-ngwoi di kou sut gima srek kwei leu nipmem ninghopti.

¹⁴ Miditeu yo dini bingwes ngun leu gumihyep nimai nide nisindemti bi. We Nimai e, nna ba ade nsuwer ajar ham nye hak ug! We Nimai e, nna ba ade nisindemti bindei cut nye hak ug! Midingondut yo dini bu bi.

¹⁵Mbro nok gino mben Israel ibong kei igwam kei noyam kin minta di nnum kei lo, midibindei ba, hou di wam bibor di cut kwei leu mpia nipriti bindei ba, ide minyei bousi nya hagom pingge bingwig. Hou dima mipijuk mun di bon ninyeng hagom bingwig leu yok.