Read Hatam HOSEA 4 Bible Online

HOSEA 4 - Hatam bible

HOSEA 4

¹TUHAN pai kep yo di ibong ei minu dini drek dip ide mun di srou yok. Je di mben Israel e, ma jimiap kep nihyet di pai bije “Tungwatu nya bidem minu dini nisurti-nipekti ingon gom tut yam bi ba, ingondut yam bi lene ijoi sut Da bikuk yok biDa cem bi.

²Yeheng biyam noro iluei ingonti tut hanyen ba, iris mun cem. Ihwen yam binggimang ba, icut tut yam cem. Nimbuk tut yamti bikum eisi bu ba, sisar nihwen yamti kieng kep ide minu dini hagom.

³Gima rino ide minu dini mingak-cai hanyen leu api mun di ninnei tau nuhwap nsi hagom mai bingwig bitut mindhe-ndhe nya kin ha nya kin wau nya cem hagom.”

⁴TUHAN pai “Je di imam e, ma jinjei kep Ditde limwa nya bijigga yok au. Lewo jeni rino jiyai mun tunggwei a.

⁵Jeni kin jide nabi nya cem jiyai munti nya kinei bikwop mmun-njap. Gima rino midibindei timek jipmem di Israel.

⁶Ditde limwa nya cem ijoi sut Da bikuk yok biDa bi apino mun di buhun micut igkep yok. Je di imam nya cem jijoi sut bijikuk je biDa bi ba, jikou sut Ditde nipingok jeti. Gima rino midikou sut je leu api midisindui sut jipmot bat nya ba, inok Ditde imam nya bu bi.

⁷Je di imam e, gino jimangti kum eisi bu ne sisar di jibon tut Da bikum eisi bu. Gima rino midibindei ba, tungwatu nya inggei sut je bu bi noro ighyet wer mpiahi tut je.

⁸Mun di jinyeng tut dima kum eisi bu tug hon Ditde limwa nya ide sisar di ibon nya. Gima rino gino ibon sisar kwop ne jijoi sut igyai munti dima.

⁹Hukum di micut igkep jide limwa nya micut igkep jeni cem! Midikes hukum ei jeni dip bit leu nok jiyai munti di kinei nya nimangti.

¹⁰Mbro nok gino jiyem mikwau di jiyai leu mindhe-ndhe di jindig ei nimbar hum dokti lo, jinggum kikau. Mbro nok gino jikuk je bak kwar di jikan bipia bindei ba, jitnem bat nya inghop lo, yoni ipijet. Gima hagom nok lewo jikiek joho leu Da ba, jiba joho rok nung nya.”

¹¹TUHAN pai “Ditde limwa jen, ba anggur nitimiei kin nijep bindei ba, nisindemti mem jikan-kan nyenti di kei pren leu je.

¹²Jahara biei ttou kin tom leu binhyepo indo puig di kei bije. Bon tom buhup bipingok jingonti e? Jahagom jinok sop wak cam di krar igkei. Jikes Da ei leu api jikes jenti ei nung nya indati.

¹³Jindig mindhe-ndhe nya ei kwar nya ide nimbar hum dokti ei mbigdip nya. Jindig biei nggrai di ui-gwang kei ei biei ndig di nimeng nggrou nya nibehei lewo mpia dima bon mpia di mbum-bra. Apino jipmisop bat nya ibon yonti nok sop di ikrar jut nya lene jignyot bat nya ibon yonti nok sop di icut tut pinai nya ariwace.

¹⁴Noro midikes hukum ei yok dip drek dip igyai munti nya dima bi lewo jeni cem jihig jisut bit sop di nibou buwei[3] di igyai kep midyai dini ei ig nung nibousi nya. Leu api jindig mindhe-ndhe bak kwar nya ei nimbar hum dokti bit yok. ‘Mben di ingon hukti tut Allah bi misar bingwig.’ Nihyet nibiti ninda dini igbit ri.

¹⁵Mbro nok gino je di mben Israel jingon gom tut Da bi lo, diyok dingon mem gima mben Yehuda ibon sisar di noyam ba, ingon mui bi. Ma jikuk je biDa ei minu ndig Gilgal kin Betel au. Ma jeheng bitug hon Da di TUHAN di niyaijo dinyeng ei minu ndig dima yok au.

¹⁶Je di mben Israel e, jingkek ndok bibor! Notou midinyohou je ei abris nghousi nok domba nya i?”

¹⁷Mben Israel iba yoho rok kwar nya ba, gima brim ingona. Jisindui sut yok ba, igyai igbit yonti ingon kanti.

¹⁸Niabiati idut ba anggur ngei nindig di pu yok lene ibou buwei kep nicut tut yamti. Ingon llei sut gi tungwatu nya ighyet wer mpiahi tut yok leu gima inggei sut yok.

¹⁹Gima rino yoni mibit hou di ten bibor di bindei ba, ipri didiei bipror bingwig. Leu api immai sut yonti drek dip mindhe-ndhe di indig ei nimbar hum dokti bak kwar nya.