Read Hatam HOSEA 5 Bible Online

HOSEA 5 - Hatam bible

HOSEA 5

¹TUHAN pai “Je di imam nya e, ma jingig jitingou mem dihyet! Je di mben Israel e, ma jiyok ngon kep dihyet! Je dino jintun nibou ndig him e, ma jimiap kep dihyet! Dikes hukum ei je dip lewo ningat ne suar jigwam nok nikei di nikos tutti nya kwes kei noro jiyai nok gima bi! Jinoyam kin bon di indin ei minu ndig Mizpa lene jinoyam kin kau di icom ei Nungug Tabor,

²lene jinoyam kin ndep jui di jut bibor di itig ei minu ndig Sitim cem. Gima rino midikes hukum ei jahagom dip!

³Na di Israel e, dikan tut mun di jo ei angon bei hagom. Bit bon aku mun nyeng gom bijo nding leu diyai him kan bi. Lewo akuk na bak kwar nya lene angon gom tut Da bu bi cem. Gima rino ade limwa nya idem mem gima ikuk yok biDa bi.”

⁴Mun di mbuk di mben Israel igyai dima bindei ba, bit bon ingkwei hanyen ndam ide Allah kan bi. Gi ikuk yok bak kwar nya dima kat yok bingkiem ba, ijoi sut Da bikuk yok biDa cem bi.

⁵Ingon di jei bibor jo nibreisi bou diyai him nok mun di bindo tut igyai munti di kinei bibor nya. Ide sisar bindei ba, icut leu api mben Yehuda icut bram yok bu cem.

⁶Yoni iba ide domba nya kin sapi nya di indig ei nimbar hum dokti binggok TUHAN noro hagom dem mem bi. Lewo Noni kes yok ei su. Bit bon igya um Noni kan bi.

⁷Yoni ingon gom tut TUHAN ba, imunggwom bat nya inok TUHAN nimunggwom bat nya bi. Gima rino jei bi lene Noni bindei sar yahagom bitut ide minu hagom bitimek bingwig.

⁸Ma jimiep pun mbrei ei minu ndig Gibea! Ma jibui brem-brem ei minu ndig Rama ba, jibijem nikon pran cig nya kwei! Ma jihyet sra tut pran ei minu ndig Betel! Je di tentara Benyamin e, ma jinjei siceu a!

⁹Jei bi ne mben Israel mitimek bingwig lewo tto bou dem mem itug ndei hukum tu. Je di mben Israel e, ma jiyok ngon kep bipia mun di buhun dini micut igkep je.

¹⁰TUHAN pai “Dingon sibui sut nibou minu Yehuda nya lewo ihwen mben Israel bipos ide dihyei leu yok. Gima rino midikes hukum di noyam kin minyei di su nindig bibor ei yoni dip.

¹¹Ico kep mben Israel leu api mben Israel ide hanjop nsi di nok ide dihyei ninda rom nya ngwig leu yok drek dip gi iba ingon com ngkiai nya ba, yahara yok bikwei mpu yok. Noro ningat ne ngkiai dima yok isindem bi.

¹²Gima rino midibindei ba, mben Israel itimek bingwig ba, mben Yehuda nya itug ndei hukum.

¹³Mpe dino jo nibreisi mem mben Israel kin mben Yehuda bipia isindem bi lo, mun di buhun cut igkep yok ne mben Israel yuug hara nibou ndig di ninyeng jei ei minu Asyur leu binhyepo noni kwei mpu yok. Noro bit bon nibou ndig dima mpu yok biteu yok leu mun di micut igkep yok kan bi.

¹⁴Midittem mben Israel kin mben Yehuda noyam kin mindhe singa di ttem mun di yem. Dangkom he rino dibriug-briug nyen yok leu api dikes yok ei bidimbut leu. Gino dittem yok bidikri yok ne bit bon hi teu yok bingwes ngun leu dindati kan bi.

¹⁵Midikes Ditde limwa nya ei bidimbut leu yok kikau bibou itug ndei inghuisi di wei nindig bibor drek dip ide sisar ug e leu api ingkwei hanyen ba, iba ingon com Da. Mpaba ninghuisi wei di micut igkep yok dima mibindei ba, ibrim ingkek binggok Da hanyen e?”