Read Hatam HOSEA 6 Bible Online

HOSEA 6 - Hatam bible

HOSEA 6

¹Mben Israel ipai biyam “Jikwei ba, yahagom ingkwei hanyen ndam TUHAN. Noni yai ninghuisi wei binye noro bindei ba, ikei hanyen. Noni bindei ba, ibok-ba noro Noni ba perban bingot kep hagom hanyen.

²Noni miwin nyeni hanyen mem njap can ningai bu e, leu api igwam coi Noni hanyen bu.

³Gima rino ma jikwei ba, ita ibou ei gi ingon jo kep Noni hanyen. Noni mittau kep nye hanyen noyam kin mpia di com mem njap tekti kin biget di but kwei ei dihyeisi dini mem bed di biang biget ningwigsi.”

⁴Noro TUHAN pai “Je di mben Israel kin Yehuda nya e, dinggon ndei je i? Jingon di ngakei Da pren-pren nyen haninyai noyam kin bumbuhui kin nggou di pren mem njap tekti.

⁵Gima rino dicuk Ditde nabi nya hwou ndam je leu binhyepo itri tut dikos datti nya bije bidipai bipia jei bi ne mijitug ndei hukum bijitimek bijingwig. Diyok dingon mem mun nyeng can di kwei leu jeni ba, hacem jo nibreisi.

⁶ Diyok dingon mem gima jingon jo kep Da kin gi jingon ngakei Da ba, mun nyeng can dini bon ninyeng nindig bibor dor njiriek nindig mindhe-ndhe ei nimbar hum dokti bak Dati.

⁷Noro noyam kin mun di pek kep ei minu mien Adam[4] ba, jinjiriek nipreu di jipreu ei bit Da.

⁸Gilead ne hanjop di mpung tut yo di ibon mun di kinei bibor kin yo di igyai nimai bak tungwatu nya ri.

⁹Imam nya di ibong ei hanjop dima idem kep nimpung nipos kep ndigban cig di ikkin ser tungwatu di injiriek yok nya. Igyai nimai bak tungwatu nya ei puig di ikak ug ei minu ndig niya coi Sikhem cem! Ibisinggre ba, ibon mun di kinei dima yok hagom.

¹⁰Dingat mun nyeng gom di bibon ningon ttinti ei minu Israel. Ditde limwa nya ibindei ba, map kui yokti tug hon nikuk no bak kwarti nya.

¹¹Je di mben Yehuda e, dikos tut njap gom tirigi dikes hukum ei jeni dip cem drek dip jibon munti nya.”