Read Hatam AMOS 2 Bible Online

AMOS 2 - Hatam bible

AMOS 2

¹ TUHAN pai “Timiei minu Moab ibon sisar ninyen. Ide sisar bindei ba, dikes hukum ei yok dip. Lewo ibon mun kinei sut Nibou Ndig Edom di mai su tirigi inggek nijui bigyai ninjum nya lene indig kep hum ba, wer atriem ndung.

²Gima rino midipinak hum di cig-cai ug ei minu Moab leu api hum dima miyem timiei minu ndig Keriot ide tentara nibousi di igya coi nya. Mben Moab mitug ndei nimai ei tentara nya di imiep pun mbrei bighyet sra tut pran nya ikieti tirigi ikon pran bit yam.

³Midibindei ba, nibou ndig minu Moab kin yo di igya kui noni ei minu dima yahagom itug ndei nimai.”

⁴TUHAN pai “Timiei minu Yehuda ibon sisar ninyen. Ide sisar bindei ba, dikes hukum ei yok dip. Lewo itunggwei Ditde nicuk yokti nya bingkek ndok tut Ditde nipingokti nya. Nung nya di idigup bat-idigai bat nya ikuk yok bak ibindei ba, mben Yehuda israwir.

⁵Gima rino midipinak hum di cig-cai ug ei minu Yehuda leu api hum dima miyem tentara nibousi di igya coi nya ei minu ndig Yerusalem.”

⁶TUHAN pai “Timiei minu Israel ibon sisar ninyen. Ide sisar bindei ba, dikes hukum ei yok dip. Lewo yo di inyeng nya itri no di ningon gom di bit bon kum ningwam di dahat kan bi nok awak kin no di nuhui mbum di bit bon kum ningwam di dahat di nimangti dem sandal can nibok kan bi cem.

⁷Ico kep yo di inghuisi jet kin yo di isindem bi birok yo di yuhui mbum ei itta. Nicig-nipmot yahacem ibimangkrei dinyeng di dia-diau kei tug hon gi igyem njita tut ide sop awak gom.

⁸Tungwatu nya ibong tut sinsun di ipos leu yo di yuhui mbum nya bidem ig mbusyameisi nya nok mun di bindo bipia yo dima mirop ide ningwam biyok bidem ig. Lene idut ba anggur ngei di ipos leu yo di ikum ide ningwam biyok bigyo nya ei Allah De Ig cem.

⁹ Ditde limwa jen, mbro nok gima lo, dihwen mben Amori di intig bou jei tereu nok buom bisindem kei kin biei terpentin bitimek bingwig ei joho bei.

¹⁰Dibuwak je kwei leu minu Mesir leu api dibie tut je ei iggum ndigsi mem ari bingwam ningot bitai. Diyai mben Amori ide dihyei bije leu binhyepo jinyeng tak kep titut yam.

¹¹ Didimig jipmot bat nya ibou poi bidibindei ba, inok nabi nya. Didimig jide pinai pilei nya ibou poi bidibindei ba, inok nimpung Nazir[2] cem. Je di mben Israel e, gini hagom igbit rin bi e? Da di TUHAN disimbot dat tu.

¹²Noro jibidip huk nimpung Nazir bijibindei ba, idut ba anggur ngei bitunggwei sut gi preu di dipreu ei bit yok. Jicuon ser nabi nya leu binhyepo itri tut dihyet bi.

¹³Nogindini midicai je ug ei dihyeisi apino jijjei-ka noyam kin kroba di mpung tut gandum ngan di buhun bibor.

¹⁴Bit bon yo di idor sindem bibor nya ingwes ngun kan bi. Yo di isindem bibor inghuisi jet bibor. Bit bon no di mimbri kui ningkek teu nonti biningwes ngun kan bi.

¹⁵Bit bon niprindei mun cig ya ngkiem ba, nidor sindem cig kin niba kuda binang cig ingwes ngun cem kan bi.

¹⁶Tirigi njap dima dem ne tentara nikon pran cig mikes nide minggwen nya hagom ei binang bihigom leu. Da di TUHAN disimbot dat tu.”