Read Hatam AMOS 3 Bible Online

AMOS 3 - Hatam bible

AMOS 3

¹Je di mben Israel e, ma jingig jitingou mem TUHAN nisok kep jeti dino Noni sok kep mben nitindur gom di buwak kwei leu Mesir! Noni pai,

²“Jeni ne mben ningat-ngat di didimig ei bidinyohou cem dor njiriek ngkiai nya yahagom ri. Gima rino jide sisar buhun bibor ba, suar dikes hukum ei je dip drek dip.”

³Ibou can di itin ei mem ittei yam ne isimbot kep biyam tut mpia di yuum yam eisi nipou tirigi imbut bigyo bi e?

⁴Singa yau-yau nyen ei bigbehei nipou tirigi noni ham mun di yem bigyo e? Singa nehen pap yau-yau nyen ei nahamti nipou tirigi noni ham mun di yem bigyo e?

⁵Apo ha biam bon gino hi ndin bon nipou ei bigyo e? Apo kau biam mindhe hi gino mindhe hi biam kau bi e?

⁶Gino pun mbrei di sok kep timiei minu hi tut pran nitausi tibim ne gima bindei ba, tungwatu nya idigit tut bi e? Gino TUHAN kes mun di buhun ei minu ndig gom dip bi lene mun di buhun dima micut igkep yok e?

⁷TUHAN Di Ninyeng Jei Bibor kinyon ei Nide midyaiti nipou tirigi Noni tri tut bak Nide awak di nabi nya bigyo bi sren.

⁸Gino singa yau-yau nyen ne tou rima ningwes mba bi i? Gino TUHAN Di Ninyeng Jei Bibor mbrap ne tou rima ba nibou coi bitri tut nihyet dima hanyen bi i?

⁹Ma jitri tut nihyet di disok ei jeni dip bak yo di ibong ser ig nibou ndig nya ide ei minu Mesir kin minu ndig Asdod bijipai biyok “Ma jinduk yam kwei ei nungug tou nya di jo ttai minu ndig Samaria leu binhyepo jicap timiei minu ndig dima ide nimbuk tut yamti kin mun di ibon tunggwei sut yamti bou jiyai him.”

¹⁰TUHAN pai “Timiei minu ndig Samaria iba mun di igyai tunggwei sut yam bipos ndigban nindig bibor leu tungwatu nya binju hagom ei ig nibou ndig nya ide. Bit bon iba ingon gom biyai mun nyeng gom kan bi.

¹¹Gima rino ide siceu nya migyon ttai ide minu binggek tentara nibousi di igya coi nya lene ibipos ndigban hagom bingwig leu ide nibou ndig nya ide ig.

¹²Bit leu nok gembala di yai domba di singa ham nikien cin kin nitingou meng gom he ba, gima bindo tut mben Israel di ibong kei-kau ei ibongti di nggriu-nggrop kei ei Samaria ba, ibou poi he mingwes ngun.”

¹³TUHAN Di Sindem Bibor biNinyeng Jei Bibor cem pai “Nogindini ma jiyok ngon kep dihyet lene ma jisok kep yo di intun Yakub him.

¹⁴ Njap dino dikes hukum ei mben Israel dip drek dip ide sisar ne midinggek nimbar hum dok nya ei minu ndig Betel. Midibindei ba, nimbar hum ndok ninggai di tug bidem nimbar hum dok nuhuisi nya hagom micut ug ei dihyeisi.

¹⁵Midibindei ig di ibong ser mem bed di biang hou kin ig di ibong ser mem bed di biang mpia wam timek bingwig. Ig dino iba gajah nikwai bimau mitti bingwig. Ig nindig nya hagom mitimek bingwig.