Read Hatam AMOS 5 Bible Online

AMOS 5 - Hatam bible

AMOS 5

¹Je di mben Israel e, ma jimiap kep dihyet lewo midiba doia ningon di ngguk bikiek je.

²Mben Israel nok sop gwam nitta pilei di cut tu bikiju hanyen bu bi sren! Tungwatu nya isindui sut noni ei nide dihyei ba, kiju leu nicut eisi bi. Hi brim ningkek mem gima kon noni bikiju hanyen bi.

³TUHAN Di Ninyeng Jei Bibor pai “Minu Israel ide minu ndig gom njei nide tentara ibou sribu gom mem gima yuug kon pran noro ibou sratus gom he ingwes ngun bingkwei hanyen. Minu ndig gom bu minjei nide tentara ibou sratus gom mem gima yuug kon pran noro ibou simnai he ingwes ngun bingkwei hanyen.”

⁴TUHAN pai bak mben Israel “Ma jingkwei hanyen ndam Da leu api mijiyai niyaijo.

⁵Ma juug ei hanjop Bersyeba mem gima jikuk je biDani ei sirima au. Ma jinggok Da ei minu ndig Betel au. Lewo minu ndig dima misar bingwig. Ma juug ei hanjop Gilgal cem au. Lewo siceu nya mikat timiei minu dima ug ei ingkiaisi.”

⁶Ma jingkwei hanyen ndam TUHAN leu binhyepo jiyai niyaijo. Gino jingkwei hanyen ndam Noni bi ne Noni mijuk kwei noyam kin hum di cig-cai biyem mben Israel bingwig. Bit bon timiei minu ndig Betel nya imu hum dima kan bi.

⁷Buhun bibor mem je lewo jikiek nikei nikos tutti di sren kei nya bit leu jingon kanti lene jiris yo di hiter ide mun di inyeng tut nya bingwig leu yok!

⁸ TUHAN Nonti rino pai tes ham Kartika kin Belantik ei mpia-bbed him. Noni bindei ba, nidinditi luei nitta binok nipigati hanyen leu api ninjapti luei nitta binok mmun hanyen bu. Noni tau muk ngei bisiber ug ei mam bei. Ninyeng rino TUHAN.

⁹Noni njei ba, hwen yo di mimbri kui ingkek binggek ide tentara nibousi di igya coi nya bingwig.

¹⁰Je di mben Israel jingon mpo tut yo di ibigen ser nikei nikos tutti di kinei bibor nya kin yo di ipai mun di nijit ei nikei noho bei.

¹¹Jico kep nuhui mbum nya bijipos ide gandum ngan cem leu yok. Gima rino mijibong ser ig di kei bibor kei di jingot mem jenti bijidut ba anggur ngei leu miai ba anggur nghousi nya di jita mem jenti cem bi sren.

¹²Dikan tut jiyai munti di mbuk bibor kin jide sisar di kinei bibor nya. Jihwen bit yo di ingon kwes kei ba, jisindui sut tungwatu nya iba mitiei bingot kep je bijibibon yo di yuhui mbum nya kinei-kinau cem ei nikei noho bei.

¹³Jiyai munti dima bindei ba, yo di ingon ki nya ikan bipia yahap iji mem nijam di kinei dima bi.

¹⁴Ma jita jibou ei jiyai munti di kei bibor keiti lene ma jibon mun di mbuk au. Apino mijiyai niyaijo. Leu api TUHAN Di Sindem Bibor ningat rin bit je nijit bit leu nok jipai ei juhui him tut Noni.

¹⁵Suar jingon mpo tut mun di mbuk bibor bijingon ngakei mun di kei bibor. Suar jahati tut nikei nikos tutti di sren kei nya. Mpaba TUHAN mingondut mben Israel nindigsi di imai bigyo drek dip jiyai munti dima e?

¹⁶TUHAN Di Sindem Bibor pai “Tungwatu nya mipim kui jei ba, ingon ngguk tut nimai kak simpak ei minu ndig dima. Timiei minu dima mihig yo di igyai miai kwei leu binhyepo ipim kui jei sut nimai nya bit yo di ingot kep yok mem gima ipim kep nimai a.

¹⁷Tungwatu nya di igyai midyai ei miai ba anggur nghousi yahagom igyai nggwei mikibor tut nimai lewo jei bi ne dihwou kes hukum ei je dip. Da di TUHAN disimbot dat tu.”

¹⁸Ningat ne buhun bibor mem je di jiyok jingon mem TUHAN de njap nitausi! Njap dima mibiang mun di kei hi kwei mem je bi. Njap dima mitau kep je noyam kin nidinditi di dindi-kai di nipigati srigsi bi.

¹⁹Njap dima noyam kin no di nang leu singa di huk no leu api ug um beruang bu! He noyam kin no di ngkwei hanyen ei nide ig bei bingget dring leu api wou piet ham ninda e!

²⁰Ningat ne TUHAN de njap dima mikwei sut nidinditi di dindi-kai di bon nipigati hi bi. Mmun ken minggai je.

²¹ TUHAN pai “Dingon mpo tut jide njap ndig nya lewo midut di jibon bou diyai him bindei ba, dingon him wei!

²²Tirigi jibon midut nindig mindhe kep hum kin midut nibipai sigyo biDa lene midirok je tut. Midirok jide mindhe-ndhe di pap-nap kei di jibet ei mem jibikuk je biDa cem ei ditta.

²³Ma jikes hon doia jide di sra nggai nya. Dikou sut gima jide nggong mbrei nya nigwei tibim ei ditingou nsi.

²⁴Ma jibrim jingkek leu binhyepo nikei nikos tutti di sren kei biam nok minyei di biam sindem ba, ningon sren-srausi biam bidem kep minyei di pingge kan bi cem.

²⁵ Je di mben Israel e, tirigi dibie tut je ei iggum ndigsi kikau mem ari bingwam ningot bitai pima lene dikak tut je tut mun di jibikuk je biDa kin midut di jibon ei nimbar hum dokti bi.

²⁶Noro tini bu ne jikuk je bak kwar Sakut di jipai sut bipia ninyeng tak kep je kin jide kwar Kewan dino ham mpia-bbed him di jikuk je bak. Suar jenti jikon kwar di jibon bou jinda him dima,

²⁷tirigi dicom je ug ei minu ting ei minu ndig Damsyik nite dima kwei. Da di TUHAN di dinyeng rino Allah Di Sindem Bibor disimbot dat tu.”