Read Hatam AMOS 6 Bible Online

AMOS 6 - Hatam bible

AMOS 6

¹Je di mben Israel jinyeng jei bijibong kei jigwam kei ei Sion kin jide limwa nya di iba ingon com je tut gi jimpu yok kin je di timiei mben Israel di mipbor ngat nya kin je di jibong kei jigwam kei ei Samaria e, mun di buhun bibor micut igkep je!

²Juug ngat minu ndig Kalne leu api juug kikau ug ei minu ndig Hamat kikau ug ei minu ndig Gat ei minu Filistin. Jikan bipia minu ndig dima yok hi nindig bibor bisindem bibor cem dor njiriek minu Yehuda kin Israel nya inyeng tak kepti e?

³Jingkek ndok bijikan bipia njap di buhun bibor no ting yo. Noro jiyai munti nya bindei ba, njap dima dideu su!

⁴Buhun bibor mem je dino jibong kei jigwam kei ei jibongti di kei bibor kei bijiyem sapi kin domba nimien ninghui nindig bibor!

⁵Jiluei-luei nyen doia nijep nya bit leu nok Daud niyaisi leu api jiba nggong mbrei nya bipai doia dima yok.

⁶Jidut ba anggur ngei ei mok nindig di ut bipias hagauti lene jiba mini ibou di nibok kak bibor bidip je noro jingon gi ngguk tut minu Israel nitimek bingwigsi di mikwei yo bi.

⁷Gima rino midibindei ba, jide siceu nya ikat je ug ei jingkiaisi bibie leu mben hiter nya. Mijibindei mbut pesta kin midut nya bu bi ba, nohonti ndia ri.

⁸TUHAN Di Sindem Bibor ba, Ninyeng Jei Bibor cem sok kep je ngkiem “Dingon mpo tut mben Israel ide ningon jei biborti ba, dingon buhun tut ide ig di kei bibor kei nya. Gima rino midikes ide minu ndig pmem bitut timiei minu dima yahagom ei ide siceu nya indati.”

⁹Gino tungwatu nya ibou simnai iku yo nyahan ei ig gom lene yahagom mitug ndei nimai.

¹⁰No di mai su nide bat gom di bie tut midut nitig nimai ngutti mikon nimai kwei leu ig bei bihig ser no di gwam ig bei nite dima kwei “No di mai bigyo hi gwam bit nani e?” Leu api no dima buhup “Hi bi!” No di bie tut midut dima micuon ser no dima “Ma ambrap bu au! Suar sikimut suhui bisindat TUHAN ninyeng bu au!”

¹¹Tirigi TUHAN kes nicukti ei yok dip ne ig mien kin ig ndig hagom mitimek bingwig.

¹²Bon kuda nya idor sindem ei bor ngug dip e? Bon no di yai miai ba sapi kin ngkimom nitu biwim muk ngwa dip noyam kin dihyei ninjek dip e? Noro jikiek nikei nikos tutti di sren kei nya binoyam kin krisieu di ten ba, jikiek mun di nijit binoyam kin mun di nitrowai.

¹³Jirai pri tut bipia minu ndig Lodebar cut bije. Jinsi bbet tut gi jipai “Nisindem mem gima nikon pran bit minu ndig Karnaim.”

¹⁴TUHAN Di Ninyeng Jei Bibor di Sindem Bibor cem Nonti rino pai “Je di mben Israel e, midipinak tentara ngkiai nya hwou ndam je leu api ikieng kep jide minu. Tentara dima yok mihwen bit je ei puig Hamat ei nite bei mpia nijjai kikau ug bipek kin Mbang Briep Araba ei nite bei mpia nibiho.”