Read Hatam OBAJA 1 Bible Online

OBAJA 1 - Hatam bible

OBAJA 1

¹ Srat dini ne nimbot kepti di Obaja tri tut TUHAN Di Ninyeng Jei Bibor nihyet di sok bak mben Edom ri. TUHAN pinak Nide awak di itri tut nihyet bak ngkiai nya leu api nyeni imiap tut nisok nihyetti di itri tut bipai “Ma jitin ei mem gima jikon pran! Ma jikwei ba, igya kep minu Edom bihwen!”

²TUHAN pai bak mben Edom “Dibindei ba, jinghuisi jet apino mben nindigsi nya hagom mibindei ba, jinyeng kinei.

³Jide ningon jeisi ris ei jeti. Jide minu ndig pmem dem kep nok tentara nibousi di jiya coi di jiwin ei hak mihyeti ei nungug tig. Jide mpia di jibong niti jo anai ei nungug dip. Gima rino jikan ‘Tou rima sindem mem gima bindei timek nye i?’

⁴Mbro nok gino jingot jide ig ei anai bibor bidem kep ha krubri naham lene tereu nok ig dima ngget ham mpia-bbed him nya cem lo, ningat ne midibindei timek je.

⁵Tirigi ninggimang mun cig kin nipos mun cig nya ikwei mem mmun lene ipos mun di ingon pri kep nya he. Yo di ipuk ba anggur ngat ei miaisi lene iba inda om ningat poi bijo. Noro jide nitok nya icok tut je ningwig a.

⁶Je di jintun Esau him e, siceu nya ikwei nggek je bicat ndigban jide di jo nikuti cem tu.

⁷Yo di jijem jisut bit yok iris mun bije ba, ijji je leu jide minu tu. Jisut bat nya ihwen je bijicut biyok ba, yo di igyem njita bit je cem isrou je. Ihig yam nyen ser je bipai ‘Ide ningon kiti nya no jo hantousi i?’

⁸Njap di dikes hukum ei mben Edom dip dima midibindei sar niba ningon ki bibon mun cig nya yahagom. Ba, ide ningon kiti nya hagom pror hak ba, hi jo bi sren.

⁹Nikon pran cig nya ei minu ndig Teman yahagom ingon ttin bibor lene tentara mben Edom yahagom mimai nimbiam ningwig a.”

¹⁰“Jiba nisibutti biyai jide adig-ajoi[1] di intun Yakub him. Gima rino jide nitok nya mibindei sar je ba, ighyet kinei sut je mem nijam di jei.

¹¹Njap di ide nitok nya inggek dimbou pmem ei minu ndig Yerusalem bigyai minu ndig dima bigyati lene jeni no jimbres jenti ei minu ting. Mpe di ipos mun di inyeng tut nya hagom ei minu ndig Yerusalem bimbut tut bikwas tut yam ne jigimbrap bi ba, jikimut juhui hak. Jeni cem jisibut bibor noyam kin ide nitok dima yok.

¹²Dem tut gima jingon kei kep timiei Yehuda drek dip mun di kinei di cut igkep yok bijingon nggei-hi-nggei ei njap di jide adig-ajoi nya isar dima bi. Dem tut gima jipa ndip yok mpe di mun di buhun cut igkep yok bi.

¹³Dem tut gima jicoi ug ei Ditde limwa nya ide minu ndig bijingon kei kep ide ninghuisi wei di om yok bijipos ide ndigban di inyeng tut nya ei njap di yuum mun di buhun bi.

¹⁴Dem tut gima jiya ser yok ei puig nahau yamti bijikat gi hi di inang leu ide nitok nya bijikes yok ei ide nitok nya indati mem njap di mun di buhun cut igkep yok bi.”

¹⁵“Njap di Da di TUHAN digwam nok nikei bidimbus ngkiai nya yahagom ingonti dideu su. Midibuhup mun di mben Edom ibon bak yonti hanyen. Ingkek kan bipia mun di ibon micut igkep yok hanyen.

¹⁶Ditde limwa nya idut ndia ngei di mpo-mpam drek dip hukum di cut igkep yok ei Ditde nungug di kwes[2] tu. Noro ngkiai nya di ibong ttai yok midut ndia ngei di mpo-mpam dor njiriek bu leu api bit bon ingwes ngun leu hukum dima kan bi. Yoni midut bingwig leu api isar bihigom hak.”

¹⁷“Noro bihi mingwes ngun ug ei Nungug Sion. Nungug dima ne gumihyep di jo pijum ei mem Da ri. Leu api yo di intun Yakub him migyai dihyei ninda rom di ide hanyen binok ide bu.

¹⁸Ditde limwa di mben Israel tereu nok hum di yem yo di intun Esau him bitimek bingwig noyam kin hum di yem gandum ntam ei miaisi bingwig. Yo di intun Esau him hi di ningwes ngun bi sren. Da di TUHAN disimbot dat tu!

¹⁹Timiei minu Yehuda di ibong ei nite bei mpia nibiho migyai Edom bigyati. Timiei nya di ibong ei nungug him ei nite bei mpia nicutti mibindei timek minu Filistin. Keret Benyamin migyai hanjop Gilead bigyati. Ditde limwa di mben Israel minyeng tak kep hanjop Efraim kin minu Samaria titut yam.

²⁰Mben Israel di ibon itimieisi ei nite bei mpia nijjai mingkwei hanyen leu ingkiaisi bigyai minu Fenisia kikau ug bipek kin minu ndig Zarfat bigyati. Timiei minu ndig Yerusalem di isima ei ingkiaisi ei minu ndig Sardis mingkwei hanyen bicoi minu ndig nya ei minu Yehuda ei nite bei mpia nibiho bigyati.

²¹Nicok tut siceu cig di igwam ei minu ndig Yerusalem nya mibindei timek mben Edom bicok tut yok. Leu api Da di TUHAN dinyeng mitak kep Ditde limwa nya bidinok nibou ndig.”