Read Hatam MBEN ISRAEL IMBUT-MBUT NYEN 10 Bible Online

MBEN ISRAEL IMBUT-MBUT NYEN 10 - Hatam bible

MBEN ISRAEL IMBUT-MBUT NYEN 10

¹TUHAN pai bak Musa,

²“Ma aba perak nitug bibon pun mbrei ningat can mem gima jibinduk limwa nya ba, idem yam ei ba, jibicuk yok ba, ikiju bimbut cem.

³Tirigi pun mbrei hacem nibimbi bong lene bindo bipia suar limwa nya yahagom idem yam ei ba, igya ttai nani kui dimbou ei Ditde Prak Meng nuhui a.

⁴Noro tirigi pun mbrei gom ngat nibimbi bong lene bindo bipia nibou mem nide bat nya he rima idem yam ei ba, igya ttai nani a.

⁵Tirigi pun mbrei nibimbi di bong cun-cun lene bindo bipia keret nya di ibong ei prak meng yati nite bei mpia nipriti rima ikiju bimbut a.

⁶Tirigi pun mbrei nibimbi di bong cun-cun mbican bram yam lene bindo bipia keret nya di ibong ei prak meng yati nite bei mpia nibiho rima ikiju bimbut a. Gini bindo bipia gino pun mbrei nibimbi di bong cun-cun lene suar limwa nya ikiju bimbut.

⁷Gino nibimbi bong bijo ninno lene suar limwa nya idem yam.

⁸Suar Harun nipmot bat di igyai inyeng imam he rima imiep pun mbrei dima yok a. Suar jikrau kep nicukti dima bijo ninno bijo kikau.

⁹Tirigi jinjei siceu mem gima jikon pran ba, jibiya ngkiem ser jide siceu di icut igkep je mem gima ipos jide minu dima lene ma jimiep pun mbrei dima hacem. Leu api Da di TUHAN di dinok jide Allah midimpu jeni ba, diteu jeni bijingwes ngun leu jide siceu nya inda nsi.

¹⁰Lene suar jimiep pun mbrei dima hacem mem njap nindig di jiyai nillei tut Pesta Bed Jep kin njap ndig nindigsi nya cem ba, nibimbi bong tirigi jibon midut nindig mindhe titut kep humti kin midut nibiyai ningon kwes kin Allahti cem. Leu api midimpu jeni. Dani ne TUHAN ba, dinok jide Allah ri.”

¹¹Mpe dima ne bumbuhui sindi son kui leu TUHAN De Prak Meng dip ei njap ngon bou gi nyatungwagom ei bed gi nican mem ari bingwam gi nican niabiati mben Israel ijo leu minu Mesir.

¹²Leu api mben Israel ikiju bimbut bit leu ide nimpung nya leu iggum ndigsi Sinai sindam. Lene bumbuhui ya niyati binddong mpe di yoni yuug krau iggum ndigsi Paran.

¹³Gima ne nimbie him ngat di TUHAN cuk yok tug hon Musa di ikiju bimbut ri.

¹⁴Bikwop mpe dino imbut lene injei bram yam bit leu nok nicukti tut nimpung nya. Nimpung tentara di igwam coi minyahas nibicom yam Yehuda nya ibie ngat. Ba, nimpung tentara hi njei leu lene hi njei bram bu lene nok. Nahason di Aminadab nipmot ne nibou di bie tut nimpung keret Yehuda ri.

¹⁵Lene Nataneel di Zuar nipmot ne nibou di bie tut nimpung keret Isakhar ri.

¹⁶Lene Eliab di Helon nipmot ne nibou di bie tut nimpung keret Zebulon ri.

¹⁷Gima leu api ilet TUHAN De Prak Meng ba, Gerson nide bat nya kin Merari nide bat nya ittei Prak Meng dima ba, imbut tut bibram yok.

¹⁸Gima leu api nimpung tentara di igwam coi minyahas nibicom yam Ruben nya injei bram yok. Ba, nimpung tentara hi njei leu lene hi njei bram bu lene nok. Elizur di Syedeur nipmot ne nibou di bie tut nimpung keret Ruben ri.

¹⁹Lene Selumiel di Zurisyadai nipmot ne nibou di bie tut nimpung keret Simeon ri.

²⁰Lene Elyasaf di Rehuel nipmot ne nibou di bie tut nimpung keret Gad ri.

²¹Gima leu api Kehat nya di ittei ndigban di kwes-kwau nya injei bram yok. Tirigi yuug krau mpia ttou nsi di yohok ide prak meng nya eisi bu lene Gerson Merari nya yohok TUHAN De Prak Meng hanyen.

²²Gima leu api nimpung tentara di igwam coi minyahas nibicom yam Efraim nya injei bram yok. Ba, nimpung tentara hi njei leu lene hi njei bram bu lene nok. Elisama di Amihud nipmot ne nibou di bie tut nimpung keret Efraim ri.

²³Lene Gamaliel di Pedazur nipmot ne nibou di bie tut nimpung keret Manasye ri.

²⁴Lene Abidan di Gideoni nipmot ne nibou di bie tut nimpung keret Benyamin ri.

²⁵Ningwigsi lene tentara nya di igwam coi minyahas nibicom yam keret Dan nya injei niabiati. Yo dini injei niabiati ngat ser nimpung nindigsi nya. Ba, nimpung tentara hi njei leu lene hi njei bram bu lene nok. Ahiezer di Amisyadai nipmot ne nibou di bie tut nimpung keret Dan ri.

²⁶Lene Pagiel di Okhran nipmot ne nibou di bie tut nimpung keret Asyer ri.

²⁷Lene Ahira di Enan nipmot ne nibou di bie tut nimpung keret Naftali ri.

²⁸Bikwop mpe di mben Israel ikiju bimbut mem gima ipri leu mpia ttou nsi hi ug ei mpia ttou nsi hiter bu lene ibit leu nipuig di injei dima yok ba, nimpung tentara hi njei leu lene nimpung tentara hi njei bram bu.

²⁹Lene Musa bon nidohoi Hobab di nicig ninyeng Rehuel leu Midian. Gima rino Musa pai binoni “Nyeni minimbut ug ei minu di TUHAN preu ei mem nye bipia miyai bak nyeni. TUHAN preu sut ei mem nye di mben Israel bipia minjei mun di kei binye. Gima rino ma abit nye ba, nani cem ayai mun dikei dima bit nye.”

³⁰Noro Hobab buhup bak “Dipai sigyo, noro dingkwei hanyen ug ei ditimieisi hanyen bu ug ri.”

³¹Lene Musa pai “Ma akes nyeni ei ba, ambut leu nye au. Nisuar nani mem gima abie tut nye ei iggum ndigsi dini lewo akan tut mpia di kei mem nohok prak meng nya hanyen eisi.

³²Gino abit nye lene mun di kei di TUHAN njei bak nyeni lene mininjei gima hi bak nani cem.”

³³Tirigi po mben Israel ikes Nungug Sinai po TUHAN pigig ser pima bimbut lene imbut mem mmun-njap ningai. Mpe dima ne TUHAN De Brua Gi Preu bie tut yok leu binhyepo ndo igbit mpia ttou nsi di kei mem gima yohok ide prak meng nya eisi.

³⁴Tirigi ibong-bong nyen bidem mpia ttou nsi dima hagom lene TUHAN de bumbuhui ttou jo nai hammi yoho bei bikwop njap-njap.

³⁵ Bikwop mpe dino Brua Gi Preu sindi bie tut yok lene Musa ngat nadi bipai “TUHAN e, ma akiju ba, ahwen Ade siceu nya ba, ajji yo di ingon mpo tut Na binang ningwig ug.”

³⁶Bikwop mpe dino Brua Gi Preu jo nijoti bibie tut yok ei puig sinon bu bi lene noni ngat nadi bu bipai “TUHAN e, ma akwei ya tut nye di mben Israel dino nibon nyende keret nya nimangti sribu-ribu dini.”