Read Hatam MBEN ISRAEL IMBUT-MBUT NYEN 11 Bible Online

MBEN ISRAEL IMBUT-MBUT NYEN 11 - Hatam bible

MBEN ISRAEL IMBUT-MBUT NYEN 11

¹Lene mben Israel sindi inso-nso nyen bak TUHAN tut mun di buhun tak yok. Tirigi Noni miap gi inso-nso nyen nok lene Noni wok yok nindig bibor bikes hum di yem yok ei yok dip. Hum dima sindi yem yok bitut ide prak meng nya ndam ide prak meng yati ninghas him gom.

²Lene yoni yahara Musa leu binhyepo mpu yok. Gima rino noni ngat nadi bak TUHAN. Lene hum dima kes hon biyem yok bu bi.

³Gima rino ijem mpia ttou nsi dima ninyeng Tabera lewo TUHAN de hum cig-cai ei ikieti biyem yok ei sirima.

⁴Mpe dima ne ngkiai nya cem iba yo kum mben Israel kak puig sinon dima lo, ngkiai dima yok ikimam mikwau nindig bibor. Apino mben Israel cem sindi inso-nso nyen bipai “Ayo! Mikwau hi mem nye bigyem e!

⁵Gi nipou tirigi nyeni ingat rin ei minu Mesir lene igyem kep wau nghui nindig bibor mikuisi ba, iba mitiei bipek bi. Nok gima cem igyem bimen kin simarangka kin bawan ngwoi kin bawan lios nindig bibor ei minu dima.

⁶Noro nogindini nyeni inghuisi jet lewo njita ngwig leu nye tu ba, igyem kep manna nongkom bikwop njap ngwa hagom.”

⁷ Lene manna pima ninjek dip kep-kau nok njita njep di nitiei di wer nipuk.

⁸Njap bigyokti lene mben Israel igya bidem mpia di yohok prak meng ei dima bikam manna nok ikam njita. Lene yoho ei hukti binok tepun leu api ikang nok roti di ngge kei dem kep nok roti di mini zaitun srigsi.

⁹ Himmun tirigi ibong mai lene manna cut nyahan ug ei dihyei ninjek dip noyam kin nggoua.

¹⁰Lene gi po mben Israel yahagom inso-nso nyen pima tibim kwei ei Musa nitingou nsi lewo yahagom ibon nimpung nya bigya hammi ide prak meng nuhuigya. Lene Musa ningon pus tut yok lewo TUHAN wok yok nindig bibor.

¹¹Gima rino noni pai bak TUHAN “Abibon da kinei nok gini tut nggon i? Nggon rino angon kwes kin da bi i? Nggon rino akes yo dini ide mun di srou yok hagom ei dinghat dip i?

¹²Dipai tes yok ba, disrek tut yok cem bi. Nggon rino ando da mem gima duusap yok dem kep nok no di sop hon ningwoi-ngwoi kikau ug ei minu po apreu sut ei mem idigup bat-idigai bat nya pima i?

¹³Dinggok ser mikwau nok gi dem mem yo di imang bibor dini ei siritou i? Lewo inso-nso nyen ninno tu ba, ikimam mikwau bijo kikau.

¹⁴Bit bon dangkom dinyohou yo dini yahagom kan bi. Gini buhun bibor mem da.

¹⁵Gino abibon da nok gini lene ma angon nggriu sut da mbigom tug hon gima akes nimai ei da dip haninyai leu binhyepo mun di buhun bibor dini mibuhun tak da bu bi hak ug.”

¹⁶Lene TUHAN pai bak Musa “Ma anduk andigpoi nya di ibie tut Ditde limwa di mben Israel kan ibou ningot muhwindacan kwei bigya kui Ditde Prak Meng ei Doho bei simiak na.

¹⁷Lene midijuk hwou bidimbrap bit na ei sirima. Lene midikus nisindemti di diyai bina nipou su ndrim hi bidikwas tut yo dima bu. Gima rino yoni migyai nisindemti leu binhyepo yahati tut na apino mun di buhun pima mibuhun tak nangkom he bu bi.

¹⁸Nogindini ma aug tri tut bak ade limwa di mben Israel bipia suar idimig yonti ei lewo njap di hyep bu lene yoni migyem kep mikwau ug ri. Gi po inso-nso nyen nindig bibor tut gi ikimam mikwau ba, mun di pek kep mem igyaijoti ei minu Mesir kei bibor dor njiriek pima tibim ei ditingou nsi tu. Nogindini TUHAN miyai mikwau bije ba, suar jiyem.

¹⁹Mijiyem kep mikwau dima mem njap gom kin njap can kin njap muhwi kin njap simnai cem njap nyatungwagom he bi.

²⁰Noro mijiyem kep mikwau dima kikau mem bed nitindur gom bibou mikwau dima nos je bijinjim tut. Mun dini micut igkep je drek dip gi jingon mpo tut Da di TUHAN di dingat rin ei jikieti cem drek dip gi jinso-nso nyen biDa bijipai ikan nye ikwei leu minu Mesir mem mindei i?”

²¹Lene Musa buhup “Dibie tut Ade limwa dini yok imangti ibou sribu sratus muhwindagom. Notou asindem mem gima ayai mikwau biyok kikau mem bed nitindur gom i?

²²Bit bon nyeni nibui sapi kin domba nya nok gi dem mem igyem kep ikimamti kan bi. Wau nya ei muk ngeisi cem nok gi dem mem yo dini yahagom bi.”

²³Lene TUHAN pai bak Musa “Ditde nisindemti ug hon nohonti bi sren. Jei bi lene ma angat mun di dipai bina dima mipek kep mem je nya hagom bou ayai him.”

²⁴Gima rino Musa hei ug ei nisai bitri tut TUHAN ningon kanti bak mben Israel. Noni nduk nibou nya ibou ningot muhwindacan pima yok kwei binyohou dimig yok bigya bikrop ttai TUHAN De Prak Meng.

²⁵Lene TUHAN juk kwei ei bumbuhui ttou di nggai kep Noni bimbrap bit Musa. Leu api Noni kus nisindemti po yai bak Musa pima ndrim hi biyai bak nibou nya pima. Tirigi TUHAN Ninnei coi ug ei yo dima ingonti lene sindi itri tut nihyet mem nituti poi dem kep nok nabi nya.

²⁶Noro ibou can di inyeng Eldad kin Medad leu ibou ningot muhwindacan pima ikieti ingat rin ei ide prak meng behei ba, yahatap nindigsi di igya bikrop ttai TUHAN De Prak Meng bigyo. Lene TUHAN Ninnei coi ug ei yo cin dini cem ingonti ei ide prak meng yati ba, sindi itri tut nihyet dem kep nok nabi nya.

²⁷Lene pinai pilei gom dor bipai sut mun di timon Eldad kin Medad bak Musa.

²⁸Lene Yosua di Nun nipmot po ya kui Musa habiei nipilei yo bimpu noni pima hap niji bisrep tut bipai “Andigpoi e, acuk yo cin dima mem gima ikes hon ba, itri tut nihyet bu au.”

²⁹Noro Musa buhup “Nani abrim angkek mem ampu dani e? Dijoi sut bipia TUHAN yai Nonti Ninnei bak Nide limwa nya yahagom ba, bindei yahagom ba, inok nabi nya.”

³⁰Lene Musa kin nibou nya ibou ningot muhwindacan pima yok yahagom ingkwei hanyen ug ei ide prak meng yati.

³¹Lene TUHAN kes hou di cut kros kwei leu muk ngeisi bittei ha dumti nya di idimba kin dihyeisi nok nanaisi dem meter gom leu api hagom idwop juk bingwig ttai prak meng yati kin minu di gahai dima kou cem ug ei kilometer poi.

³²Gima rino mben Israel yahagom ikrau ha dima yok kikau mem njap nitindur can kin mmun gom cem. Bikwop tungwagom-gom krau ha dumti nya nibuhunti kilo sribu gom binjiriek mem nonti. Tirigi ibui bisrat hagom tu lene idis mikwau dima hek mpia.

³³Noro nipou tirigi igyem mikwau dima hagom bingwig leu yok bigyo lene TUHAN wok yok biba nsuwer ajar bihwen yok.

³⁴Gima rino tungwatu nya ijem mpia ttou nsi dima ninyeng “Niduhwen Mikwau Ijui Dip” lewo itig yo di inso-nso nyen tut gi ikimam mikwau pima yok ingut ei sirima.

³⁵Gima ngwig lene mben Israel imbut ba, yohok ide prak meng nya hanyen bu ei Hazerot.