Read Hatam MBEN ISRAEL IMBUT-MBUT NYEN 18 Bible Online

MBEN ISRAEL IMBUT-MBUT NYEN 18 - Hatam bible

MBEN ISRAEL IMBUT-MBUT NYEN 18

¹Lene TUHAN pai bak Harun “Tut niyai tunggweisi hagom di pek kep tug hon midyai nya ei TUHAN De Prak Meng nsi lene suar na di Harun kin apmot bat nya kin Lewi nya jibiang nibuhunti sur yam. Noro gino imam nya igyai midyai tunggwei lene nanti kin apmot bat nya he mijibiang nibuhunti.

²Suar abuwak keret Lewi di jintun yam him pima ug ei Prak Meng nsi ba, igyai midyai bit na bimpu nani kin apmot bat nya.

³Suar keret Lewi yuusap nani tut midyai ba, igyai ibou tut midyai di inyeng joti nya ei Ditde De Prak Meng nsi. Noro harin dima idideu nimbar hum dok ba, ingget ndigban di kwes-kwau ei Ninsi di Kwes cem a. Gino itunggwei sut nicukti dima lene yoni kin nani cem mijitug ndei hukum nimai hak ug.

⁴Suar igyai ibou tut midyai di inyeng joti nya ei Ditde Prak Meng nsi ba, yahati tut nani. Noro ma asindui sut ba, yo di idem mem gima igyai midyai dima bi nya igyai midyai bit nani au.

⁵Suar na di Harun kin apmot bat nya he rima jiyai jibou tut midyai nya ei Ninsi Di Kwes kin gi ei nimbar hum dok leu binhyepo digga mben Israel hanyen bu bi.

⁶Ningat ne dinyeng tak kep ade bat keret Lewi nya pijum leu mben Israel ikieti pijum bidiyai yok bak nani tereu nok munkwas di diyai bina. Didimig yok pijum ei mem Dani leu binhyepo igyai midyai ei Ditde Prak Meng nsi.

⁷Noro nani kin apmot bat nya he rima jiyai jibou tut imam de midyai ba, gima ne midyai nyeng hagom di bitut nimbar hum dok kin ndigban ei Ninsi Di Kwes-Kwau cem ri. Gima ne ade midyai di ayai abou tut nya rin lewo dita nani leu binhyepo ayai anyeng imam. Ma asindui sut ba, yo di idem mem igyai midyai dima bi nya idideu ndigban di kwes-kwau dima yok au. Leu gi nok lene midikes hukum nimai ei yok dip.”

⁸Lene TUHAN pai bak Harun “Ma ayok ngon kep bipia munkwas di ade limwa nya ittei kwei mem ibikuk yok pijum bak Dani di indig ei nimbar hum dokti bi ne hagom ade kin ade nintun him yamti di bram yam nya ide ri. Mijima munkwas nite dima bou je bijo ninno bijo kikau bit leu dikos tutti.

⁹Munkwas di kwes-kwau nya mem nibon midut njita nibipai sigyo bak Allahti kin nibon midut nibiyai nikos ser sisarti kin nibon midut nibikum TUHAN de ningwam cem di indig ei nimbar hum dokti bi pima lene nani kin apmot bat nya jima bou je nok jide.

¹⁰Ma jibibon munkwas dima kwes mem jeni ba, jiyem ei mpia di kwes cem. Noro ma pinai nya he rima igyem kep a.

¹¹Munkwas nindigsi di ter leu gi pima di mben Israel ibikuk yok bak Dani hagom ne jide ri. Diyai gima bak nani kin apmot bat-apmisop bat nya. Nicukti dima jo kep bijo ninno bijo kikau. Noro disindui sut ba, bikwop ade bat nya di map kui yok bi cem igyem kep.

¹²Diyai ningat di kei bibor di mben Israel ipuk nimbie him ngat di ittei mem ibikuk yok bak Dani bikwop ari bingwam hagom bina. Nok mini zaitun kin ba anggur ngei kin gandum ngan.

¹³Ama mun nyeng dima yok hagom bou na nok ade. Noro disindui sut ba, bikwop ade bat nya di map kui yok bi cem igyem kep.

¹⁴ Mun nyeng hagom di mben Israel ikwas pijum ei tut Dani pima ne ade ri.

¹⁵Bitut mben Israel ipmot mighumbou nya kin ide mindhe-ndhe nihyen kep nipmot bou nya hagom di ikwas pijum tut Dani ne ade ri. Noro suar asindui sut ba, mben Israel iba mitiei bipek ipmot mighumbou nya kin ide mindhe-ndhe di map kuisi nya hanyen.

¹⁶Ma iba mitiei perak nitig muhwi bit leu nok nibok di ikrau kep ei Ditde Prak Meng nsi bipek ipmot mighumbou di nide njap ug ei bed gom hanyen ba, nibok dima jo kep.

¹⁷Noro disindui sut ba, iba mitiei bipek sapi kin domba kin kambir nihyen kep nipmot bou hanyen bi. Suar ibui mindhe-ndhe nihyen kep dima mem Dani lewo Ditde nya ri. Lene ma iba ninggrom dima biprok nimbar hum dok nitta leu api indig nimmau kep hum mem nibon midut njita nibipai sigyo bak Allahti. Lene midijoi sut ninghap di ngge kei dima.

¹⁸Lene ama mikwau di nok ningget kin nindimuhum nite ninda com di imam su ninda tut biDa bou na nok ade.

¹⁹Munkwas di mben Israel ittei di ikwas pijum tut Dani hagom diyai bak nani kin apmot bat-apmisop bat nya. Nicukti dima mbut mem jeni bijo ninno bijo kikau ba, bit bon hi nggek tut cem bi ba, noyam kin gi preu di ngot kep Dani kin nani kin ade nintun him di bram yamti nya.”

²⁰Lene TUHAN pai hanyen bu bak Harun “Atug ndei mun nyeng hi nok mun ninda rom bi. Midipek dihyei hanjop nsi gom ei minu di dipreu kep mben Israel tut dima gom bak nani cem bi. Da di TUHAN di nok ade mun ninda rom ri.”

²¹ TUHAN pai bak Harun “Bikwop mben Israel ide munkwas gom leu ningot gom lene nok hagom midiyai bak Lewi nya. Gima ne ide mun ninda rom nok imuhup di itug ndei drek dip midyai di igyai ei Ditde Prak Meng nsi ri.

²²Ma mben Israel nindigsi nya idideu Prak Meng dima au. Leu gi nok lene gima mibindei bingon mui apino itug ndei hukum nimai drek dip.

²³Hon njap di ammani kui lene Lewi nya he rima inyohou dimig Ditde Prak Meng ba, igyai ibou tut midyai di inyeng joti nya hagom. Nicukti dini mbut mem ade nintun him di bram yam nya bijo ninno bijo kikau. Mun nyeng hi ei minu Israel nok Lewi nya ide mun ninda rom bi,

²⁴lewo diyai munkwas gom leu ningot gom lene nok di mben Israel ikwas pijum tut Dani pima hagom bak Lewi nya nok ide mun ninda rom ri. Tut gima ripo dipai bak Lewi nya pima bipia yoni mitug ndei mun ninda rom hi ei minu Israel bi.”

²⁵Lene TUHAN cuk Musa,

²⁶bipai sut nicukti dini bak Lewi nya “Tirigi jima mun di mben Israel ikwas gom leu ningot gom lene nok bou je po TUHAN kes bije nok jide pima lene suar jikwas gom leu ningot gom lene nok sindam tut TUHAN nok munkwas nidor njiriekti.

²⁷TUHAN ngat munkwas nidor njiriekti dima noyam kin gandum ngan kin ba anggur ngei nimbie him di yo di igyai miai ikwas bit leu igyai kepti.

²⁸Tug hon nisinati dima lene mijiba mben Israel ide munkwas gom leu ningot gom di jima bou je pima bikwas munkwas nidor njiriekti pima tut TUHAN. Lene ma jiyai munkwas nidor njiriekti dima bak Imam Harun.

²⁹Ma jiba gi hi di kei bibor kei nongkom leu mun di jima bou je dima bikwas munkwas dima tut noni.

³⁰Tirigi jikwas nite hi di kei bibor kei dima tu lene nikenti jo mem jenti noyam kin no di yai miai di kwas munkwas leu api ma niken di jo bou no nok nide.

³¹Ma jiyem nikenti dima bit jide ig bei nsi nya ei mpia di jijoi sutti ba, gima nok jimuhup di jitug ndei tug hon midyai di jiyai ei TUHAN De Prak Meng nsi ri.

³²Gino jikwas nite di kei bibor kei tut TUHAN leu su lene jiyem nikenti dima ba, mijitunggwei sut bi. Noro ma jibimangkrei munkwas di kwes po mben Israel ikwas pima tug hon gi jiyem nikenti di jo bije nipou tirigi jikwas nite di kei bibor kei pima tut TUHAN bigyo au. Leu gi nok lene mijitug ndei hukum nimai hak.”