Read Hatam MBEN ISRAEL IMBUT-MBUT NYEN 19 Bible Online

MBEN ISRAEL IMBUT-MBUT NYEN 19 - Hatam bible

MBEN ISRAEL IMBUT-MBUT NYEN 19

¹Nok lene TUHAN cuk Musa kin Harun,

²bigyai nicukti nya dini bak mben Israel. Ma jijem sapi niwek di bon ninta ngwoi ningut gom kwei. Lene ma sapi dima bok-ba ba, hi ngot biei niprion ei ninggibi dip cem bi sren.

³Ma jijem sapi dima kwei bijiyai bak Imam Eleazar. Lene jehei sut noni bijijem sapi dima ug ei prak meng yati nisai leu api jibui ei Eleazar noho bei.

⁴Leu api suar Imam Eleazar tau sapi dima ninggrom poi mien bigimahap mbimuhwindacan hammi ndam mpia di TUHAN De Prak Meng yati.

⁵Lene suar jindig mindhe dima titut kep hum bitut ningkek kin ninghui kin ninggrom kin ninghop hagom ei Eleazar noho bei.

⁶Gi bram bu lene suar Imam Eleazar ug yai biai ttou gom-gom kin biei hisop nintam gom kin mong ngwoi nimbier gom leu api com hagom ug ei hum di yem kep sapi di ninta ngwoi pimati.

⁷Leu lene suar imam dima ba minyei bipiap nide sinsun bikek minyeiti cem. Gima leu api noni coi hanyen ug ei jide prak meng yati. Noro map kui noti kikau ug bipek mpia nicutti kep.

⁸Suar no di ndig sapi kep hum dima ba minyei bitot nide sinsun bikek minyeiti cem. Noro map kui noni cemti kikau ug bipek mpia nicutti kep.

⁹ Leu api suar tungwagom di nipuig kwes ug kam sapi dima ningum keyam ba, kes ei mpia di kwes ei prak meng yati nisai. Noni mibet sapi dima ningum ei leu binhyepo limwa mben Israel iba ningum dima bitin ei minyei mem nibon midut nibiyai nikos ser sisarti.

¹⁰Suar no di ug kam sapi dima ningum keyam ba minyei bitot nide sinsun. Noro map kui noti kikau ug bipek mpia nicutti kep. Nicukti dini jo ninghig-niker ei siri mem mben Israel kin ngkiai nya di ibong timiei ei ikieti cem.

¹¹Tungwa tou rino ngget nimai ngut lene map kui no kikau mem njap muhwindacan.

¹²Suar noni ba minyei midut pima bipiap nonti ei njap gi niningai kin njap gi nimuhwindacan api noni pwoi hanyen. Noro gino piap nonti ei njap gi niningai kin njap gi nimuhwindacan bi lene map kui noni kikau.

¹³Tungwa tou rino ngget nimai ngut lo, piap nonti bi lene map kui noni kikau lewo ba minyei midut biprok nonti bigyo. Tug hon nisinati dima lene noni bindei ba, map kui TUHAN De Prak Meng nsi apino noni nggre kin Ditde limwa nya bu bi.

¹⁴Gino tungwagom mai ei jide prak meng nsi gom lene tungwa tou rino ningat rin ei prak meng nsi dima kin tungwa tou rino coi ug ei prak meng nsi dima lene map kuisi kikau ei njap muhwindacan.

¹⁵Ba, map kui dibijig kin yeng di iba igtuyap bibon di nibou jo kep bi nya hagom.

¹⁶No di ngget nimbiam ngut kin no di ngget no di nonti mai ningut ei ngoi dumti lene map kuisi kikau ei ninsi njap muhwindacan. Nicukti dini mem no di ngget jui dip kin nimai njum nya cem.

¹⁷Suar yo dima yuug yai sapi niwek ningwoi po indig mem nibon midut nibiyai nikos ser sisarti pima ningum poi mien mem gima ibindei kwes yonti leu gi map di kui yokti pima. Leu api ikes sapi ningum dima poi mien ei yeng igtuyap gomti leu api yuhug minyei di itau kwei leu minyei bousi eisi.

¹⁸Gi nigom tut gino tungwa hi mai ei prak meng nsi lene suar hiter di nipuig kwes ug yai biei hisop pima nintam gom lene tur ei minyei dimati ba, bigimahap prak meng dima bitut mun nyeng hagom di joti kin tungwatu nya di ingat rin ei sirima cem. Gi nican tut gino tungwa hi ngget nimai ngut kin jui dip kin nimai njum nya lene suar hiter di nipuig kwes ba minyei bigimahap yok noyam kin gi pima cem.

¹⁹Suar hiter pima bigimahap yok ei njap gi niningai kin njap gi nimuhwindacan. Nibon midut nibindei pwoi yo di map kui yokti pima ngwig ei njap gi nimuhwindacan. Suar yo dima itot ide sinsun bikek minyeiti. Hon mpia nicutti lene ipwoi hanyen tu.

²⁰Tungwa tou rino map kui noti lo, bon midut nibindei kwes nonti bi lene map kui noti kikau yo. Lewo hiter ba minyei midut pima biprok noni bi. Tug hon nisinati dima noni bindei ba, map kui TUHAN De Prak Meng nsi apino noni nggre kin Ditde limwa nya bu bi.

²¹Nicukti dini jo ninghig-niker ei siri. Suar no di ba minyei midut pima bigimahap yok dima cem piap nide sinsun a. Lene no di ngget minyei dima ne map kuisi kikau bipek mpia nicutti kep.

²²Gino no di map kuisi ngget ndigban nyeng gom lene map kui ndigban dimati cem. Lene map kui nindigsi nya di ingget ndigban dima cem sindam kikau ug bipek mpia nicutti kep.